Ministri Kulturës, Rinisë dhe Sportit, Valton Beqiri, priti aktoren e shquar britanike, Vanesa Redgrev, e cila, në cilësinë e Presidentes së Bordit, po merr pjesë në edicionin e parë të Festivalit Ndërkombëtar të Filmit "PriFilmFest". Me këtë rast, Ministri Beqiri, pasi i uroi mirëseardhje dhe e falenderoi për angazhimin e saj humanitar dhe artistik gjatë dhe pas luftës në Kosovë, i ndau zonjës Redgrev një Mirënjohje me këtë motivacion: "Për sensibilizimin e çështjes së Kosovës në opinionin botëror, për humanizmin ndaj fëmijëve dhe refugjatëve kosovarë, për mbështetjen dhe miqësinë e madhe në ditët e vështira të Golgotës Shqiptare dhe për inkurajimin e vazhdueshëm të artistëve kosovarë". Aktorja Vanesa Redgrev e përjetoi me emocion të veçantë nderimin me këtë mirënjohje, përmes të cilës MKRS dhe Ministri Beqiri kanë shprehur respektin dhe konsideratën e veçantë të insititucioneve shtetërore, të komunitetit artistik dhe të popullit të Kosovës ndaj rolit dhe angazhimit humanist të zonjës Redgrev në shërbim të çështjes së Kosovës. Edhe Kryetari i Prishtinës, Isa Mustafa, kishte rezervuar dje pritje për aktoren britanike Vanesa Redgrev. "Është privilegj të takoj në zyrën time një aktore të madhe e cila ka pas vetës një karrierë të shkëlqyer në teatër, film dhe televizion, ku dhe ka fituar çmimet më prestigjioze në këto fusha", tha kreu i kryeqytetit Mustafa. "Prishtina ka një mysafire të veçantë e cila do të bëjë edhe hapjen e edicionit të parë të Festivalit Ndërkombëtarë të Filmit të Metrazhit të gjatë PriFilmFest", tha Kryetari Mustafa, duke e falënderuar aktoren britanike Redgrev, për vizitë. Ndërkaq, aktorja Redgrev falënderoi kreun e Prishtinës për pritje duke u shprehur se në Prishtinës ndjehet shumë e lumtur. Redgreve e falënderoi të parin e kryeqytetit për mbështetjen që i ka dhënë Komuna e Prishtinës këtij Festivali. Po ashtu Redgrave u interesua për çështje që kanë të bëjnë me Prishtinën, si në rrafshin e kulturës, arsimit, ekonomisë , infrastrukturë dhe zhvillimit, ku për të arriturat dhe sfidat e qytetit u informua nga kryetari i Prishtinës. Kryetari Mustafa aktores britanike, fituese e çmimit ?Oscar?, Vanessa Redgrave, i dhuroi simbolin e Prishtinë, "Hyjneshën në Fron".
(http://www.kosova.com)