"Gruaja drejton ekonominë shtëpiake në përgjegjësinë e vet të plotë",
thuhej në ligjin e dikurshëm. Kjo nënkuptonte: gruaja pastron, gatuan,
hekuros dhe kujdeset për fëmijët. Ndërsa për një punë jashtë shtëpisë,
ajo duhej të merrte lejen e burrit.
Por kohërat kanë ndryshuar - në favor të femrës. Sot gati katër dekada
pas nxjerrjes së këttij ligji, femra është e punësuar kudo. Sipas një
studimit të firmës së konsulencës "PriceWaterhouseCoopers" gati 72 % e
femrave janë me punë, që do të thotë rreth 10 % më shumë se para 10
vitesh.
Gjermania në rrugë të mirë
Sociologia Jutta Allmendinger
"Gjermania është në një rrugë të mirë, që të arrijë një barazi të plotë
të femrës me mashkullin në punë. Në studimin tonë thuhet se Gjermania
është përmirësuar dhe tani zë vendin e tetë, që do të thotë se është
shumë më mirë se mesatarja e OECD", pohon Petra Justenhoven nga firma
"PriceWaterhouseCoopers". Në vitin 2000 Gjermania ishte në vendin e 18,
që do të thotë nën mesataren e vendeve të OECD. Por kur bëhet fjalë për
pozitën e femrës në shoqëri, ajo tani është përmirësuar në të gjiha
kategoritë. Por megjithë angazhimet e mëdha të politikës, barazia e
plotë e femrës dhe mashkullit në shoqëri dhe në vendet e punës është
ende larg.
"Kuotat e kandidaturave mes gjinive për vende pune vërtetë janë gati të
barabarta. Dallimi është vetëm 6- 7 % në favor të meshkujve. Por kur
shikon vendet e punës që zënë meshkujt dhe femrat, dallimi është shumë i
madh", pohon profesorja e sociologjisë Jutta Allmendinger, presidente e
Qendrës për Studime Sociologjike në Berlin. Sipas saj, femrat punësohen
kryesisht në vende pune me orar të shkurtuar. Ndërkohë që kur shikon
përvojën e punës, meshkujt kanë një përvojë shumë më të gjatë, sepse
femrat shpesh e ndërpresin punën për t'u përkujdesur për fëmijët dhe
prindërit.
Vetëm 62 % e femrave të punësuara në Gjermani kanë një vend të plotë
pune. Kjo është shumë më pak se sa në Hungari dhe Sllovaki ku 94 % e
femrave të punësuara punojnë me orar të plotë pune. Dallime të mëdha mes
femrave dhe meshkujve ka ende edhe sa i përket rrogave. Në Gjermani ky
dallim është 16 % në favor të meshkujve. Ndërsa në Irlandë ky dallim
është vetëm 4 %.
Ministrja për Familjen Manuela Schwesig
Një problem edhe më i madh është: femrat në postet drejtuese.
Në vitin 2013 vetëm 6 % e drejtuesve në 30 koncenet më të mëdha të
indeksit DAX30, kanë qenë femra. Politika synon që edhe këtu të bëj
ndryshime. Ministrja për Familjen Manuela Schwesig pohon se kjo çështje
do të rregullohet me ligj, i femrave u garanton një kuotë prej të paktën
30 % të posteve drejtuese. Ajo shpreson se sipërmarrjet do ta zbatojnë
vullnetarisht këtë ligj.
Më të vështirë e kanë femrat me origjinë të huaj
Më të vështirë në Gjermani e kanë femrat me origjinë të huaj. Në
Gjermani ato kanë edhe probleme shtesë për shkak të mos njohjes së
diplomave, mungesës së njohjes së gjuhës gjermane dhe mungesës së
mbështetjes në familje. Të gjitha këto bëjnë që femrat me origjinë të
huaj në Gjermani gati kurrë nuk e fitojnë mundësinë të zënë ndonjë vend
të mirë pune.
"Kemi shumë raste të femrave me origjinë të huaj të cilat jetojnë në
Gjermani për 10 apo 20 vjet dhe megjithë kualifikimet në shkencat
natyrore, nuk kanë gjetur ndonjë vend pune. Ato mbeten në shtëpi deri në
rritjen e fëmijëve", thotë Jutta Lutz-Kadereit, nga Qendra
Ndërkombëtare e Femrave në Bon, duke shtuar se pas rritjes së fëmijëve,
"shpesh bëhet tepër vonë për të filluar ndonjë punë serioze".
Jutta Lutz-Kadereit mendon se përpjekjet e politikës dhe sipërmarrjeve
për të ndryshuar pozitën e femrës në shoqëri, nuk mjaftojnë nëse nuk
bëhet edhe disa ndryshime rrënjësore: "Shpresoj se shoqëria jonë do të
hapet më shumë, sikur ajo në Francë apo në Suedi, ku është e
vetkuptueshme që femra të shkojë në punë. Në Gjermani ende ka shumë
njerëz, jo vetëm burra por edhe femra, të cilat mendojnë se gruaja e ka
vendit pranë fëmijëve në shtëpi."
Edhe sociologja Jutta Allmendinger mendon se në shoqërinë gjermane duhet
të bëhen ndryshime serioze. "Rimendimi është i domosdoshëm dhe ky
ndryshim duhet të jetë shumë më i madh se sa që është menduar deri tani.
Duhet të ndryshojë modeli sipas së cilit mashkulli duhet të punojë 100
%, ndërsa femra me orar të shkurtuar", pohon ajo.dw
Comments (0)
Dërgoja shokut
Printo
