VOAL - Online Zëri i Shqiptarëve - FITORE TË EUROSKEPTIKËVE NË ZGJEDHJET PËR PARLAMENTIN EVROPIAN

Anketat kudo në Bashkimin Evropian flasin për fitore të të ashtuquajturve euro-skeptikë si në ekstremin e djathtë edhe në atë të majtë në zgjedhjet për Parlamentin Evropian.

Kryeministri francez Manuel Valls i quajti rezultatet e së dielës "një tërmet" për Europën dhe Francën, ku partia e së djathtës ekstreme, Fronti Kombëtar i zonjës Marie LePen fitoi bindshëm. Për herë të parë, Fronti Kombëtar do të ketë vende në parlament.

"Sonte, unë falënderoj popullin francez. Ne kishim të drejtë që patëm besim te populli. Populli sovran foli me zë të lartë dhe të qartë si në të gjitha momentet e mëdha në historinë e tij, se ata duan të marrin përsëri në dorë frenat e fatit të tyre," tha zonja LePen.

Sipas sondazheve në qendrat e votimit, partitë nacionaliste kanë fituar në Danimarkë dhe Britani. Partitë e së djathtës ekstreme njihen për kundërshtimin e imigracionit dhe në përgjithësi si një forcë që kërkon të pakësojë pushtetin e Bashkimit Evropian.

Në Greqi, anketat i japin fitore koalicionit radikal të majtë. Të majtët grekë i kundërshtojnë me forcë masat ekonomike shtrënguese të qeverisë dhe kushtet e ndihmës së Bashkimit Evropian për Greqinë.

Votuesit në 21 prej 28 vendeve të BE-së votuan të dielën. Shtatë vendet e tjera kishin votuar pak ditë më parë.

Rezultatet zyrtare të zgjedhjeve të Parlamentit Evropian priten sot.za