ARRESTOHET NJË AGJENT I AKIsë NË KOSOVË
E Mërkurë, 08.08.2012, 02:10pm (GMT+1)
Prishtinë, 8 gusht - Mentor Nikajt i janë zënë
gjashtë karta të lëshuara nga ish-pjesëtari i Shërbimit Informativ të
Shqipërisë, Maksim Ferra, i cili drejton të ashtuquajturën Qendra Shqiptare e
Studimit të Luftës Kundër Terrorizmit dhe Krimit të Organizuar në kuadër të së
cilës funksionon edhe Agjencia e Kërkimit dhe Investigimit (AKI). Ferra
konfirmon se ai është agjent i tij dhe se ka bashkëpunim me deputetë të Kosovës
Drejtori i së ashtuquajturës Qendra Shqiptare e Studimit të Luftës Kundër
Terrorizmit dhe Krimit të Organizuar, Maksim Ferra, e ka pranuar se Mentor
Nikaj është punëtor i tij në Kosovë. Ai ka thënë se nuk e di që ai është
arrestuar dhe se do ta përjashtojë atë nga puna. Ferra ka deklaruar për "Kohën
Ditore" se ka disa agjentë në Kosovë dhe ka edhe filialin në Prishtinë. Ai ka
mohuar se merret me punë kriminale në Kosovë, siç dyshohet nga Policia.
"Do t'i qes në gjyq të gjitha ato gazeta në Kosovë që kanë marrë në gojë emrin
tim", ka thënë ai, për të treguar se agjencia e tij merret me kërkimin e
personave të trafikuar kudo që ka shqiptarë. Ferra ka pohuar se organizatën e
ka regjistruar në Kosovë në Ministrinë e Administratës Publike që në 2008-n.
"Kam licencë për këtë veprimtari", ka deklaruar ai. Ferra ka thënë se ka
biseduar me disa deputetë dhe me anëtarë të një komisioni parlamentar. Ka
treguar se njëri prej tyre është deputeti Halit Krasniqi i PDK-së.
WWW.VOAL-ONLINE.CH
|