VOAL - Online Zëri i Shqiptarëve - PERSPEKTIVA E INTEGRIMIT TË SHQIPËRISË NË BE

Të gjitha vendet e Ballkanit perëndimor kanë perspektivë të integrimit në Bashkimin Evropian dhe kjo perspektivë është duke ndihmuar në stabilizimin e rajonit.

Kështu ka thënë të hënën presidenti i Bashkimit Evropian, Herman von Rompoj, në një konferencë për shtyp me presidentin e Republikës së Shqipërisë, Bujar Nishani, i cili ndodhet për vizitën e tij të parë në cilësinë e presidentit të shtetit në Bashkimin Evropian.

Herman von Rompoj ka thënë se Shqipëria ka ende rast që këtë vit të bëjë avancim drejt integrimeve në proceset e integrimeve në BE, duke inkurajuar autoritetet e Shqipërisë që të përmbushin 12 kriteret e parashtruara nga Komisioni Evropian.

Rompoj ka theksuar se Komisioni pritet që në tetor të nxjerrë edhe rekomandimet për Shqipërinë dhe që Këshilli të diskutojë për to në takimin e dhjetorit.

Ai posaçërisht ka inkurajuar punën e përbashkët të Qeverisë dhe të opozitës në Shqipëri, duke marrë parasysh edhe pozicionet e shoqërisë civile, për ta avancuar Shqipërinë në procesin e integrimeve evropiane.

Edhe presidenti i Këshillit të Bashkimit Evropian, Herman von Rompoj, i është bashkuar thirrjeve për Shqipërinë që ky vend të bëjë më shumë, sidomos në luftën kundër korrupsionit.

Ndërkaq, presidenti i Shqipërisë, Nishani, ka thënë se ai është duke u zotuar në takimet që ka në Bruksel për gatishmërinë e Shqipërisë që të bëjë më shumë në luftën kundër korrupsionit dhe të garantojë reformat e nevojshme sipas kërkesave të Komisionit Evropian.

"Perspektiva në Bashkimin Evropian ka ndihmuar dhe vazhdon të ndihmojë dhe të stimulojë bashkëpunimin rajonal", ka thënë presidenti i Shqipërisë, Bujar Nishani, mirëpo ka përmendur sfidat që ende mbeten në raportet bilaterale.

Nishani ka thënë se Shqipëria do të vazhdojë kontributin e vet në bashkëpunimin rajonal dhe në pjesëmarrjen inkluzive në nismat rajonale.

Presidenti i Shqipërisë, Nishani, gjatë qëndrimit në Bruksel do të ketë takime edhe me kryetarin e Komisionit Evropian, Hose Manuel Barroso, ndërsa të martën do të vizitojë NATO-n, ku do të takohet me sekretarin e Përgjithshëm të kësaj aleance, Anders fog Rasmusen.