Nis sot aplikimi për Lotarinë Amerikane 2014. E gjithë procedura është
online në faqen e internetit të ofruar nga Ambasada Amerikane. Afati i
fundit për të gjithë të interesuarit që duan të nisin jetën në SHBA, është data
3 nëntor. Verifikimi për shpalljen e fituesve do të bëhet direkt në faqen e
internetit përmes kodit personal. Në një intervistë për gazetën Lyra Carr,
Konsulle, e Shteteve të Bashkuara të Amerikës në Tiranë, jep të gjitha detajet
për mënyrën e aplikimit dhe përzgjedhjen e fituesve. Ajo këshillon gjithashtu
qytetarët, për hapat që duhet të ndërmarrin në mënyrë që të mos s'kualifikohen.
Çfarë është programi i Vizave të Shumëllojshmërisë?
Programi i Vizave të Emigrantëve të Diversitetit, i autorizuar nga Kongresi i
Shteteve të Bashkuara të Amerikës, administrohet nga Departamenti i Shtetit çdo
vit dhe bazohet në ligjet e SHBA. Ligji u mundëson viza emigruese personave
prej vendeve me shkallë historikisht të ulët emigrimi në Shteteve të Bashkuara.
Për vitin fiskal 2014 do të jenë në dispozicion 50 000 viza emigrantësh të
shumëllojshmërisë (lotarisë). Shqipëria është një nga vendet e kualifikuara për
Programin e Vizave të Shumëllojshmërisë DV-2014, që do të thotë se qytetarët
shqiptarë janë të pranueshëm për të aplikuar për këtë program.
Si funksionon Programi i Vizave të Shumëllojshmërisë?
Në mbarë botën, vendasit e vendeve që kualifikohen për lotarinë i plotësojnë
regjistrimet e tyre për lotarinë në www.dvlottery.state.gov gjatë një periudhe
kohore prej 30 ditësh, e cila zhvillohet pothuajse gjatë së njëjtës periudhë të
vitit. Për vitin 2012, kjo periudhë do të fillojë më datë 2 tetor në orën 18:00
dhe do të mbarojë më datë 3 nëntor në orën 18:00, me orën në Shqipëri.
Aplikuesit, të cilët do të regjistrohen online, do të përzgjidhen në mënyrë të
rastësishme nga një kompjuter në Qendrën Konsullore Kentucky. Duke filluar nga
data 1 maj 2013, pjesëmarrësit do të mund të kontrollojnë faqen e internetit në
www.dvlottery.state.gov nëse janë përzgjedhur, duke përdorur numrin e
konfirmimit që i shfaqet aplikuesit në ekranin e kompjuterit pas regjistrimit
të suksesshëm për lotarinë. ¨shtë shumë e rëndësishme që të ruhet numri i
konfirmimit që ju merrni pas regjistrimit fillestar elektronik! Juve do t'ju
duhet ky numër konfirmimi në mënyrë që të shikoni nëse jeni përzgjedhur apo jo
për Lotarinë DV-2014.
Përse po e reklamoni Programin e Vizave të Shumëllojshmërisë?
Ne duam të rrisim shkallën e njohurive rreth rregullave të Programit të Vizave
të Shumëllojshmërisë dhe t'i ndihmojmë shqiptarët të bëjnë zgjedhjen e duhur
për të marrë pjesë apo jo në Programin e Vizave të Shumëllojshmërisë.
Ka disa gabime, si për shembull regjistrimi për programin e lotarisë më shumë
se një herë, apo mospërfshirja e një anëtari të familjes, të cilat rezultojnë
në skualifikim të menjëhershëm. Ne duam që të interesuarit të njohin rregullat
në mënyrë që ata të shmangin këto gabime që mund të ishin shmangur lehtësisht.
Mënyra më e mirë për të shmangur këto gabime të thjeshta është që të lexohen
rregullat e publikuara në gjuhën shqipe në faqen e internetit
http://albanian.tirana.usembassy.gov/dv.html.
Për më tepër, çdo vit ka shqiptarë që shfrytëzohen nga faqe interneti apo
individë që gjoja përfaqësojnë qeverinë e SHBA. Nuk ka asnjë pagesë për t'u
regjistruar për Programin e Vizave të Shumëllojshmërisë dhe të vetmet faqe
zyrtare të qeverisë amerikane përfundojnë me ".gov". Ne e kuptojmë se shumë
shqiptarë nuk e flasin gjuhën angleze dhe mund të kenë nevojë për dikë që t'i
ndihmojë ata që të plotësojnë regjistrimin për Programin e Vizave të
Shumëllojshmërisë. Nëse juve ju duhet ndihmë, duhet të zgjidhni dikë që është i
besueshëm për ju dhe që nuk do t'ju shfrytëzojë duke ju kërkuar shuma
marramendëse parash për të plotësuar regjistrimin tuaj në lotari. (Mbani mend
që qeveria e Shteteve të Bashkuara NUK ka vendosur asnjë tarifë për
regjistrimin për lotarinë!) Ambasada dhe qeveria amerikane nuk mbështet asnjë
noter, përshpejtues, ndihmues apo palë të treta. Nuk ka rëndësi se kush e
plotëson regjistrimin tuaj në lotari; personi, emri i të cilit është në
formularin e aplikimit për lotari duhet të ruajë numrin e konfirmimit, sepse
atij do t'i duhet ai numër për të kontrolluar nëse ka fituar.
Ku duhet të aplikojnë njerëzit për lotarinë?
E vetmja mënyrë për t'u regjistruar në Programin e Vizave të Shumëllojshmërisë
është që të plotësohet formulari në www.dvlottery.state.gov. Nuk ka asnjë
tarifë për t'u regjistruar për lotarinë, por të lexohen udhëzimet (në shqip në
http://albanian.tirana.usembassy.gov/dv.html) që të sigurohen nëse kualifikohen
dhe që e kuptojnë se si plotësohet formulari përpara se të plotësohet
formulari. Nëse personi nuk i ka kualifikimet e duhura për lotarinë, ai
nuk do të marrë një vizë edhe nëse do të jetë përzgjedhur për lotarinë.
Si do të informohen për njoftimin zyrtar të regjistruarit në lotari?
Njoftimet zyrtare nga Departamenti Amerikan i Shtetit do të bëhen VETËM
nëpërmjet Kontrollit të Statusit të Regjistrimit, i cili do të jetë në
funksionim duke filluar nga data 1 maj 2013 në faqen e internetit të lotarisë
www.dvlottery.state.gov. Të regjistruarve në lotari do t'u duhet të përdorin
Numrin e tyre të Konfirmimit në faqen e internetit të lotarisë
www.dvlottery.state.gov. MOS e humbni numrin e konfirmimit! Pjesëmarrësit në
lotari që do të rezultojnë të përzgjedhur NUK do të njoftohen nëpërmjet
e-mail-it. Nëse juve ju humbet numri i konfirmimit, Departamenti i Shtetit do
të mundësojë një mënyrë që ju ta rimerrni atë, por gjithsesi ju duhet të
tregoheni të kujdesshëm se me kë e ndani këtë informacion.
A kualifikohet automatikisht çdokush që është përzgjedhur nga kompjuteri?
Jo. Për t'u kualifikuar për Lotarinë e Vizave të Diversitetit, aplikantët
anembanë botës duhet të plotësojnë kritere shumë të rrepta të kërkesave të
kualifikimit nëpërmjet: 1) arsimit ose 2) profesionit. Aplikantët duhet të
bëjnë zgjedhjen e duhur nëse duhet të aplikojnë apo jo për të marrë pjesë në
Lotarinë e Vizave të Shumëllojshmërisë. Shqiptarët, të cilët nuk kanë kryer një
arsim të shkollës së mesme me kohë të plotë që të jetë i barabartë me edukimin
e shkollës së mesme në SHBA (4 vjet, me kohë të plotë), nuk do të kualifikohen
bazuar në kushtin e arsimit.
Edhe pse në raste të rralla është e mundur të kualifikohen bazuar në
eksperiencën e punës, duhet të mbahet parasysh që profesionet që mund të
përdoren për këtë kualifikim pothuajse gjithmonë kërkojnë një shkallë edukimi
më të lartë se shkolla e mesme e kërkuar për lotarinë.
Cili nivel arsimi plotëson kriteret e kualifikimit për Programin e Vizave të
Shumëllojshmërisë?
Bazuar në kërkesat për arsimin, i cili duhet të jetë i barabartë me
arsimin e shkollës së mesme në Amerikë (4 vjet, me kohë të plotë), shqiptarët
që nuk e kanë mbaruar arsimin e shkollës së mesme me kohë të plotë, nuk do të
kualifikohen për Programin e Vizave të Shumëllojshmërisë. Pra, për t'u
kualifikuar për Lotarinë nëpërmjet arsimit, aplikanti kryesor duhet të ketë
kryer shkollën e mesme me kohë të plotë. Dëftesat e pjekurisë së arsimit me
kohë të shkurtuar pa shkëputje nga puna, shkolla e mbrëmjes, apo me
korrespondencë, përfshirë edhe arsimin 5-vjeçar apo programe me afat më të
gjatë (me kohë të shkurtuar pa shkëputje nga puna, shkolla e mbrëmjes, apo me
korrespondencë), nuk kualifikohen për programin e Vizave të Shumëllojshmërisë
(Lotarisë). Gjithashtu, dëftesat e arsimit profesional 3-vjeçar nuk
kualifikohen për programin e Lotarisë së Shumëllojshmërisë. Edhe nëse ju e keni
kryer shkollën e mesme pjesërisht me kohë të shkurtuar dhe pjesërisht me kohë
të plotë, përsëri kjo dëftesë nuk ju kualifikon për Programin e Vizës së Shumëllojshmërisë.
Ju keni thënë që njerëzit duhet të përfshijnë në aplikimin e tyre për lotari të
gjithë anëtarët e familjes. Po në rastin kur fëmija nuk jeton me aplikuesin
kryesor, ose ai është duke u divorcuar nga bashkëshortja?
Bashkëshortja dhe të gjithë fëmijët, thjeshtërit dhe fëmijët e birësuar, të
cilët janë nën 21 vjeç, duhen përfshirë në regjistrimin për lotarinë, edhe nëse
ata nuk jetojnë me aplikuesin kryesor. Nëse aplikuesi kryesor nuk është
ligjërisht i ndarë nga bashkëshortja e tij, ai duhet ta përfshijë atë në
regjistrimin e tij për lotari. Duhet mbajtur mend që thjesht fakti që emri i
dikujt është përfshirë në regjistrim, nuk do të thotë që ai është i detyruar të
marrë pjesë në procesin e aplikimit apo të emigrojë në SHBA. Pavarësisht kësaj,
nëse aplikuesi kryesor nuk e përfshin një anëtar të familjes që është në
varësinë e tij në regjistrimin për lotari, kjo do të rezultojë në skualifikimin
e rastit.
Një bashkëshorte e ardhshme nuk duhet të përfshihet në regjistrimin elektronik
në rast se statusi civil i aplikuesit kryesor në momentin e aplikimit është
beqar, sepse kjo do të rezultojë në skualifikimin e tij në ditën e intervistës.
Nëse anëtarët e famijes së aplikuesit kryesor janë shtetas amerikanë apo banorë
të përhershëm të ligjshëm në momentin e regjistrimit elektronik për lotari, ai
nuk ka nevojë t'i përfshijë ata në aplikimin e tij.
Nëse dikush është përzgjedhur për Programin e Vizave të Shumëllojshmërisë, ku
duhet ta bëjë pagesën e Vizës së Shumëllojshmërisë?
Tarifa e procesimit të Vizës së Shumëllojshmërisë do të paguhet në të njëjtën
ditë me intervistën zyrtare vetëm në seksionin konsullor, përveç rastit kur
aplikuesi ndodhet në SHBA. Në qoftë se intervista e aplikuesit kryesor do të
jetë në Seksionin Konsullor të Ambasadës Amerikane në Tiranë, ai do të duhet ta
paguajë tarifën në Ambasadë. Shqiptarët nuk duhet të bien viktimë e e-mail-eve
mashtruese që i kërkojnë të dërgojnë para në emër të një individi me postë ose
me shërbime të tilla si Western Union.
A do të paguajë qeveria amerikane për strehimin në SHBA të fituesit të Vizës së
Shumëllojshmërisë, ta ndihmojë të gjejë një punë apo t'i japë asistencë
ekonomike për ta ndihmuar derisa të përshtatet në SHBA?
Jo. Aplikantëve, të cilët pajisen me vizën e DV-së nuk u sigurohet ndonjë lloj
asistence ekonomike apo ndihmë federale. Gjithsesi, ne duam që ata t'ia dalin
me sukses në Amerikë dhe të kalojnë një tranzicion sa më të qetë, kështu që në
disa raste ne mund t'i kërkojmë të gjejnë një sponsor, i cili të jetë dakord që
t'i ndihmojë ata sapo të kenë mbërritur në SHBA. Programi i Vizave të
Shumëllojshmërisë u ofron atyre të përzgjedhurve rastësisht një mundësi të
mrekullueshme për të emigruar dhe për të filluar një jetë të re në Shtetet e
Bashkuara.