Nëse një vëlla, një baba, një bashkëshort apo i dashur vret një motër, një
vajzë, një grua apo të dashurën e tij, pse nuk e shikon situatën paraprake me
gjakftohtësi, por me vrullin e parë i vë lakun në fyt. Ligji, policia e gjykata
meren me dënimin e fajit, e jo dikush që nuk është as ligji e as gjykata, t'ia
marrë jetën asaj. Çfarëdo lloj gabimi apo faji ajo të ketë kryer, ata mund t'i
drejtohen drejtësisë e jo pushkës e sopatës sikur therrin një bagëti.
Shumë tronditëse janë faktet e shifrat e fundit mbi vrasjet mbi vajzat e gratë
në Shqipëri. 118 viktima vetëm për vitin 2012. Një tmerr i vërtetë, si në kohën
e inkuzicionit. Organizata mbarëkombëtare pajtimit të gjaqeve ngre zërin,
organizon takime, konsulta, biseda mes familajrëve, por përsëri shifrat rriten
pa asnjë efekt. 1208 familje të ngujuara për këtë vit. Mijra fëmijë të izoluar,
e pa shpresë për jetën. Edhe pleq po vriten për hakmarrje kohëve të fundit. Ku
po shkon kështu vendi ynë, çështë kjo kasaphanë në njerëz, e kur do ti vijë
fundi.
Pse duhet të vritet një femër? Nëse nuk e do, ndaje. Nëse të tradhëton përsëri
ndaje, por mos e vrit e mos e masakro. Ti zotni x apo y që i mer jetën asaj
kushdo qofsh, nuk je as ligji as drejtësia, por një kriminel që ke lyer duart
me gjak, e duhet të marësh dënimin që meriton. Por edhe nëse krimineli mer
dënimin, viktima përsëri nuk kthehet më, nuk vjen më në jetë. Vrasësi vret e
largohet në drejtim të pa ditur, shpëton. Po pse i trembet dënimit kur kryen
një vrasje, pse nuk dorëzohet. Atij i dhimbset jeta, po për atë që vret pse nuk
mendon, po i pret kokën si një pulë e përpiqet ta fshehë ku të mundet.
Këto janë ngjarje që duhet të trondisin jo vetëm familjarët e viktimave, por
mbarë shoqërinë tonë, e duhet të meren masat më ekstreme për një vrasje të
kryer qoftë me ose pa paramendim. Akte të tilla dhune ose vrasje kemi patur jo
vetëm në veri të vendit, por edhe në mes të Kryeqyetit të Tiranës. Shqipëria
është anëtare e NATO-s me të drejta të plota, e përderisa këto shifra po rriten
dita ditës ti kërkohet ndihmë NATO-s që të ndalen vrasjet e dhunimet tek vajzat
e gratë.
Si pasojë e atij mentaliteti të trashëguar edhe në Amerikë nëpër familjet
shqiptare kemi patur akte e fenomene të tilla, ku burri ka vrarë gruan për
motive të dobta, ose pa motiv fare, vetëm sepse ai është sipas tij "ligji" e
ajo duhet ti bindet atij deri në vdekje. Marrëzi e sëmurë, e injorancë pa fund.
Në një rast burri pasi ishte grindur me të shoqen në sy të fëmijëve e urdhëron
atë që të dalë në rrugë në mes të dimrit e dëborës, e të qëndronte atje deri në
mëngjes. Çjanë këto dënime, çjanë këto masa ndëshkuese për një grua, për një
bashkëshorte, nënë e fëmijëve të tij? E më pas kur ai mer vesh se një i afërm i
familjes e kishte strehuar kërkon që ta vrasë, vetëm e vetëm pse nuk kishte
qëndruar gjithë natën jashtë në acarin e ftohtë, në mes të rrugës, poshtë
godinës ku jetonin edhe fëmijët e tyre. Kjo është një ngjarje e jetuar, e
njohur, e vërtetë. Po sa të tilla kemi, e të panjohura akoma....
Femra është vërtetë nga natyra si seks - më e dobët se mashkulli, por ai nuk
duhet të masë forcat e tij me femrën. Le të përballet me drejtësinë për krimin e fajin që kryen. The Women's
Organizatin Hope & Peace, organizatë e gruas shqiptare amerikane po i
shikon me kujdes këto raste e është duke dhënë ndihmesën e duhur për familjet
me probleme të tilla.
New
York, Dhjetor 2012