Voal-online - Me flokët si luaneshë dhe shikimin kureshtar ka pushtuar botën.
Quvenzhané Wallis është kandidatja më e re në histori si aktorja më e mirë
protagoniste për çmim Oskar, për rolin e saj në filmin "Bishat e Jugut të
Egër". Qe zgjedhur mes katër mijë kandidateve për rolin e Hushpuppy
(Kulaçes). Ishte vetëm 5 vjeçe dhe regjisori Benh Zeitlin mbeti i shushatur nga
paraqitja e saj në provën regjisoriale.
"Për trupën realizuese (the casting) kemi përdorur të njëjtin personale të
fushatës zgjedhore të Obamës - ka shpjeguar regjisori - na janë dashur nëntë
muaj dhe kemi provuar 4 000 veta për ta gjetur protagonisten, por kur ka ardhur
ajo, është ndezur një dritë. Një gjeni si Beethoven që i binte pianos kur ishte
pesë vjeç. I vetmi problem është se, duke qenë një çupërlinë, nuk i kuptonte
disa fjalë, por edhe pse ishte e vogël, sillej si një aktore e vërtetë. Nuk më
është dashur të përdor lodra apo taktika të tjera në sheshin e xhirimit,
thjesht kam mësuar të komunikoj me të me një gjuhë të përshtatshme për një
vajzë të vogël. Të tjerat i ka mësuar vetë. Ka para vetes një të ardhme të
madhe." Vogëlushja ka pozuar në Festivalin e Kanës, me një buzëqeshje të
mrekullueshme, me dy dhëmbët e qenit të rënë. Ka lindur në Luiziana dhe është
më e vogla e katër fëmijëve. Tani përgatitet për natën e yjeve, e shoqëruar nga
mami, mësuesja e babai, i cili është kamionist.
PYETJE: Keni vendosur se çfarë do të vishni për natën e Oskarëve, më 24?
QUVENZHANÈ WALLIS - "Ngjyra ime e parapëlqyer është trëndafilja, por
vërtet nuk di çfarë do të vesh mbi qilimin e kuq. E vetmja gjë e sigurt është
se nuk do të zgjedh një fustan të gjatë, mund të marr në thua, mund ta gris dhe
të bëj një figurë të keqe."
PYETJE: Një ëndërr?
QUVENZHANÈ WALLIS: "Do të më pëlqente pa masë të takohem me Beyoncé."
PYETJE: Si shkon me mësime?
QUVENZHANÈ WALLIS: "Jam një nxënëse shumë e mirë dhe fëmijët e tjerë me
trajtojnë si një fëmijë të rëndomtë."
PYETJE: Cilat lëndë të pëlqejnë më shumë?
QUVENZHANÈ WALLIS: "Mua më pëlqejnë matematika e letërsia."
PYETJE: Si të ka zgjedhur regjisori për rolin?
QUVENZHANÈ WALLIS: "Kam bërë një provë kur isha pesë vjeçe. Me Benh kam
luajtur para kamerave në situata të ndryshme, më ka pëlqyer shumë."
PYETJE: E çfarë mendojnë prindërit për karrierën tënde si aktore?
QUVENZHANÈ WALLIS: "Më mbrojnë nga e gjitha ajo çka do të thotë 'të jesh i
famshëm'. Kam një familje të bashkuar."
PYETJE: Nga se ke pasur më shumë frikë?
QUVENZHANÈ WALLIS: "Nuk e di. Por derrat e egër në film më frikësonin, më
terrorizonte ideja se duhej t'i prekja."
PYETJE: Cilin personazh të filmave Disney e pëlqeni?
QUVENZHANÈ WALLIS: "Nuk kam ndonjë të veçantë, por çmendem për Hello
Kitty."