Zgjedhet në Shqipëri komentohen edhe në shtypin gjermanofon.  Lidhur me këto zgjedhje  në Shqipëri në numrin e saj të sotëm (26.06.) gazeta Neue Zürcher Zeitung ndër të tjera shkruan:

"Kanë kaluar mbi 22 vjet që kur protestuesit e zemëruar në Sheshin Skënderbe në qendër të Tiranës, përmbytën një statujë të madhe të diktatorit Enver Hoxha. Ngjarja është quajtur ndonjëherë si kthesa demokratike,  si fundi i një prej tiranive më të errëta. Që nga rënia e sundimit të tmerrshëm stalinist në Shqipëri padyshim që shumëçka ka ndryshuar për të mirë, dhe një popullsi që ishte e mbyllur hermetikisht për rreth katër dekada nga bota e jashtme dhe ishte terrorizuar në kampet e internimit, me ekzekutime masive dhe hakmarrje ndaj familjarëve, më në fund  arriti të gëzojë të drejtat themelore të njeriut."

Në vazhdim artikulli in NZZ flet për një demokraci të brishtë në Shqipëri:

Logo: Neue Züricher Zeitung, NZZ

"Dy dekada nuk kanë qenë të mjaftueshme për ta shndërruar Shqipërinë në një demokraci funksionale. Përkundrazi, demokratizimi ndodhet ende në fillim të tij. Që nga viti 1992, kur u mbajtën zgjedhet e para shumëpartiake, asnjëra palë humbëse asnjëherë nuk e ka pranuar humbjen dhe nuk e ka gjetur veten në rolin e opozitës...."

"Vend ballkanik është i polarizuar politikisht nga dy parti të cilat qëndrojnë të armiqësuara përballë njëra-tjetrës dhe duket se nuk janë të afta për asnjë lloj bashkëpunimi...." shkruan më tej gazeta NZZ. "Midis Berishës (PD) dhe Ramës (PS) sundon një klimë e fyerjes. Të dy duan të jenë fitues dhe politika mbetet në vendnumëro.  Që me bashkëpunim mund të fitojnë të dyja palët dhe sidomos popullsia, kjo nuk ka vend në mendjen e tyre...."

"Programet e dy blloqeve të fuqishme janë pothuajse identike dhe karakterizimi i PD-së si "konservatore e djathtë" dhe i PS-së si "social-demokratike" të fut në qorrsokak", nënvizon gazeta NZZ. "Të dy partitë paraqiten si pro-perëndimore, të orientuara drejt tregut të lirë dhe janë për anëtarësimin e vendit në Bashkimin Evropian. Shkak i konfrontimit është vetëm gjuetia për "minierat e floririt". Sepse vetëm kështu mund të sigurohet "froni shtetëror", mund të mbahen me tendera në kondicion të mirë kompanitë e lidhura ngushtë me partitë dhe anëtarët e partisë, që kanë pozita qeveritare."

Rating (Votes: )

Comments (0)

Dërgoja shokut

Printo

---