(Ky opinion është botuar më 8 dhjetor 2010, pra është shkruar 4 vjet më parë. E sjellim për të treguar se Isa Mustafa është recidiv në gabimet e tij dhe i pajustifikuar sepse është e dyta herë që mashtron elektoratin)
Isa Mustafa do të
kujtohet si lideri që u dominua nga ai krah i LDK-së, të cilin ai e dominoi dhe e
mposhti me votën e elektoratit që votoi për të në Kuvendin e Shtatë të LDK-së me qëllim reformimin e partisë.
Sot në LDK nuk ka ndryshuar asgjë, veç
largimit të Fatmir Sejdiut, i cili u zëvendësua me Isa Mustafën. Pjesa tjetër ka mbetur si më parë. Sot Fatmir
Sejdiu ngjan me një viktimë, ndërsa Isa Mustafa me një renegat. Sepse Isa
Mustafa i mashtroi ata që e votuan në Kuvendin e Shtatë, i hëngri me bukë
fjalët e tij për reformim të partisë e doli krejt nga fjala që dha.
Problemi i LDK-së nuk
ishte Fatmir Sejdiu, por lidërshipi, klani, bajraku, organizimi tribal që e çoi
LDK-në në katastrofë në zgjedhjet e 2007, që mbeti po aq i fortë edhe në
zgjedhjet e 2010. Sot Isa Mustafa është në të njëjtin rol që kishte Sejdiu, me
ndryshimin se këtë pozicion e merr nga pozitat e renegatit, pasi i ndryshoi
idealet, fjalët dhe flamujt, duke u shitur e trafikuar tek kundërshtarët. Sepse
nëse Isa Mustafa ishte kundërshtar me Fatmir Sejdiun, ai do të duhej të ishte
kundërshtar edhe me Ekrem Kryeziun apo me ata me të cilët sot del krah për krah
e qafë për qafë në fushatë.
Isa Mustafa në vend të ringjalljes të partisë, zgjodhi të
kthehet në renegat, sepse iu përvodh premtimeve, i mashtroi ata të cilëve u
premtoi reformim e ndryshim, dhe dezertoi duke u bashkuar me ata me të cilët
ishte kundër deri në momentin kur u votua si kryetar i LDK-së, çka do të ketë çmimin adeguat për
Mustafën si lider e për partinë që ai e udhëheq.
Çiftëzimi i Isa Mustafës
me Ekrem Kryeziun, duke iu kundërvënë Ukë Rugovës, është mjerimi më i madh për ish-partinë
më të madhe të Kosovës, e cila në këtë mënyrë shkon e sigurt drejt një humbje
të re, që do ta detyrojë Isa Mustafën të japë dorëheqjen, por do t'i sigurojë
atij dhe klanit që mban partinë me dorë të hekurt, ndejtëse në Kuvendin e ri të
Kosovës, që do të dalë prej këtyre zgjedhjeve.
Orientimi i fushatës së
LDK-së në sulme gjoja kundër PDK-së është farsë e mjerë, pasi klani që ishte prapa Sejdiut sot vazhdon të jetë prapa liderit të LDK-së dalë nga Kuvendi i Shtatë dhe ishte pikërisht ky klan që e qeverisi bashkë me PDK për tre vjet Kosovën, dhe nëse
kjo qeverisje ka dështuar, me të ka dështuar edhe klani, i cili e detyron Isa
Mustafën të harrojë se është Isa Mustafa,
personi që i premtoi elektoratit reformim dhe ndryshim të LDK-së.
Isa Mustafa nga
kritikues i metodave përçarëse dhe klanore të Sejdiut, u kthye në trashëgimtar
dhe vijues i këtyre metodave dhe këtij stili, të cilat do të vazhdojnë ta
tkurrin LDK-në dhe nuk do t'i japin më 12 Dhjetor veç disfatën.
E kam thënë edhe në një
shkrim më parë, dhe e përsëris, se Isa Mustafa e kishte fitoren në dorë, se
fitorja e Isa Mustafës do të ishte më e lehta, nëse do të distancohej nga kasta
e vjetër e do të mjaftohej të shtrinte dorën për bashkëpunim e të hapte derën e
partisë e të mirepriste, si zot i shtëpisë.
Por ai në vend se të
jetë zot i shtëpisë zgjodhi rolin e maxhordomit ( maggiordomo ) shërbyesit; në vend që të zgjidhte rolin e liderit
ndryshe nga ai i humbësit pararendës, liderit me ide dhe vizion
gjithëpërfshirës, ai zgjodhi të dalë
nëpër fushatë në një duet të papërshtatshëm, bajat dhe anakronik me Ekrem
Kryeziun, figurën më të shplarë dhe më intrigante të klanit të Sejdiut. Isa
Mustafa zgjodhi të kthehet në renegat. Në vend që ta bënte këtë fushatë me sa
më tepër aleatë e me sa më tepër miq, të cilët i zgjatën dorën, ai zgjodhi të
jetë kryetari solitar i LDK-së, duke vazhduar e mbajtur në izolim e karantinë
LDK-në, e duke zgjedhur të presë biletën e humbësit.
(Ky opinion është botuar tek VOAL - ZËRI I SHQIPTARËVE - www.voal-online.ch dhe tek Bota Sot më 8 dhjetor 2010 )