DASHURITË E MËDHA Poezi nga QAZIM SHEHU
E Premte, 04.25.2014, 08:53am (GMT+1)
DASHURITË E MËDHA
U afrohemi dashurive që do vijnë, t`i përfshijmë në përqafim. rrapëllijnë, japin shenja ... pas tyre vjen era. presim, presim, në krahë të tyre të mbesim. Ikën dashuritë e vogla të trembura nga ta, Një shenjë të vogël kjo ikje s`na la. dashuritë e mëdha kurrë s`erdhën, Tani ç`të bëjmë? Edhe pa të voglat mbetëm...
PURGATOR
Njeriu mbetet gjysmëbotë, Gjysmën tjetër s`e thotë. Mbetet gjysmëdritë ,gjysmëterr, Gjysmë terri në gjysmë dritë, Kurrë veten s`e jep, Pse ai kapërcen çdo ditë, Kufijtë në ferr. Pa arritur në purgator, Ku presin ta lajnë në horror ...
GJILPËRAT
Mbeten të lehta gjërat, Të shkojmë drejt tyre a dimë, Kur vejmë majë më majë gjilpërat, Fjalët në ajër ngrijmë. Pa ulur majën e një gjilpëre, Ta lejojmë tjetrën të shpojë, S`mund t`i bindemi një gjëje, Pa rrëfyer ç`dhimbje ka, Pa folur me gojë...
GDHENDJE
Ti gdhend hijen e ikjes ngado, mbi ty bie dielli i shqetësimit tim, Është vërtet ikje apo një kërkim kot, Për të gjetur hijen time në kthim. Ti më ndjek hijen,unë portretin tënd, Hije nëpër hije shkoi kjo jetë. Dielli nga kjo u lodh, Mbeti i zbetë
DITA HUMBET...
Dita humbet nëpër gjurmët e saj, Hapat e vetmisë ngulen thellë, Në një truall që lëviz pa skaj, Me vetminë e vet mbështjellë. Dita humbet dhe bëhet e bukur, Veten e vet tërheq drejt bukurisë, Një të papritur e ka ruajtur, T`ia heqë maskën vetmisë...
SHKUMA
Nga rrënjë e malit del burimi, Shpërndan dritën e freskisë së amshuar, Kur shuajmë etjen s`na intereson gjëmimi I ardhjes së forcës së bekuar. Kur ndizemi shkojmë sërish aty, Lusim rrënjën të shpërthejë më shumë, Por edhe rrënjën e kap zemërimi, Mbi ujë hedh një fllad me shkumë...
QAZIM SHEHU
|