SHKËMBI Poezi të reja nga QAZIM D. SHEHU
E Mërkurë, 11.12.2014, 09:23am (GMT+1)
SHKËMBI
Në valë të afshit vetanak, Lule mbi shkëmb të egër, Zemra hapet kanat- kanat, Dridhet lule e egër.
Mëkati rrudhet, rrudhet, Shkëmb në stuhi, E ngre kokën e lutet, Kur dielli mbi shkëmbin rri.
Vragë e zemrës ngjan e fortë; Thërrime mund të bëhet, Në derdh në të një pikë lot, Kur loti verbohet...
DASHURIA
...shkund reflekse dashuria, mbi rrugë, anash , me ngulm. Vanë pas saj mendtë e mia, Si ushtarë drejt për sulm.
Veç dashuria s`është armiku, Më keq se ai, herë ,herë, Të mbërthen me kthetra çeliku, Të ul në tokë gjunjëprerë.
Dhe të kthjellon e të marros, Turrjelë e vështrimit shpon, Nën peshën e saj të gropos, Të ngre lart si zog mbi hon...
STUHIA
Duhmë stuhie është fryma e fundit, E gjigandit tek na kurseu. Dielli i paqmë puthi sa mundi, Tokën me ar e ngjeu.
Dhe në këtë prehje të magjishme, Gjurmë stuhie më nuk ka, Veç na thotë sa e hijshme, Ish stuhia që e fortë ra....
PËRRALLAT
Përrallë e të fortëve na përkund, Me dorë të lagësht të Salierit. Aromon,e në tym shkund, Lule të freskëta të ferrit, Të Bukurën e Dheut e shoh në një sallon, Duke ia krehur mustaqet zotnisë. Dredhitë e Qerosit janë përsosur, Në dyll vulash vulosur, Divi.As që duket gjëkundi. Një hije përthithi forcën e tij, T`i bëjsh ballë, ulurin , nduk, Të zhbën në pazotësi. Përralla e realitetit nxin, Div, Qeros, E Bukura e Dheut, Vetëtima të shuara vetëtijnë...
LETRA PASTRUESE
Pushtetbërësit dhe pushtetmbajtësit, Ata, Të cilët mezi i kemi, Na japin portretet mbrëmjeve, Në qelqe ekranesh për letër. Sa shkojmë të zgjasim dorën drejt letrës, Fytyra e tyre humbet. Atëhere lëshojmë klithmë kur e vërteta, Dhunën e tyre mbron me të drejtë...
QAZIM D. SHEHU
|