FRAGMENTI 1: KËTË ORË DUKET SE PO MARR PJESË NË NJË NGJARJE
 
Këtë orë duket se po marr pjesë në një ngjarje,
ju më kërkoni arsyen e lotëve të mi.
 
Nuk mund t
'jua them:
Është një sekret ende i pashpallur.
 
FRAGMENTI 2: DO TË DOJA TË TË THOSHJA FJALËT MË TË VËRTETA
 
Do të doja të të thoshja fjalët më të vërteta,
por nuk guxoj,
nga frika se ti do të qeshësh.
 
Ja pse gënjej,
duke thënë të kundërtën e asaj që mendoj.
 
Kështu e bëj absurde dhimbjen time
Nga frika se mos ti
Bën të njëjtën gjë si unë.
 
 
FRAGMENTI 3: PA FOLUR FARE KE ARDHUR TE UNË
 
Pa folur fare ke ardhur te unë
si një mbretëreshë,
krejt fshehurazi
ke vënë këmbët e tua
brenda shpirtit tim.
 
FRAGMENTI 4: NË GJUMIN TËND, NË ZGRIPIN E ËNDËRRAVE
 
Në gjumin tënd,
në zgripin e ëndërrave,
pres duke parë në heshtje
fytyrën tënde,
si yllin e mëngjesit
që shfaqet më parë se kudo tjetër
në dritaren tënde.
 
Me sytë e mi do të pi buzëqeshjen e parë
e cila,
si një lastar, do të gjelbërojë
mbi buzët e tua gjysmë të hapura.
 
Dëshira ime, e dashur,
Është kjo e vetmja në botë.
 
FRAGMENTI 5: NËSE NUK MUND TË MË DUASH, E DASHURA IME
 
Nëse nuk mund të më duash,
e dashura ime,
më fal për dhimbjen time.
 
Mos më shiko të lutem përbuzshëm,
nga larg.
 
Do të rikthehem në qoshen time
dhe do të rri në terr.
Me të dyja duart e mia
do e mbuloj
turpin tim lakuriq.
 
FRAGMENTI 6: DO TË DOJA TË ULESHA PRANË TEJE NË HESHTJE
 
Do të doja të ulesha pranë teje
në heshtje,
por nuk kam guxim:
 
kam frikë, druaj se mos
zemra ime më ngjitet
tek buzët e mia.
Ja pse flas në mënyrë të budallepsur
dhe e fsheh zemrën time
prapa fjalëve.
 
E trajtoj mizorisht dhimbjen time
nga frika
se mos t'i bën të njëjtën gjë
ndaj dhimbjes tënde.
 
FRAGMENTI 7: AJO ËSHTË KAQ PRANË ZEMRËS SIME
 
Ajo është kaq pranë zemrës sime
si një lule e vogël
pranë tokës.
 
Ajo është e ëmbël e ëmbël
si gjumi që vjen
nëpër trupin e lodhur.
 
FRAGMENTI 8: SI NË NJË ËNDËRR
 
Si në një ëndërr,
dashuria
vjen me hapa të heshtur.
 
FRAGMENTI 9: TË KAM PARË NË ËNDËRR TY, E DASHUR
 
Të kam parë në ëndërr ty, e dashur,
ulur pranë shtratit tim
ma nxirrje gjumin ëmbëlsisht
me duart e tua dhe me flokët e tua,
duke më bërë të ndjej
njomështinë njerëzore të gishtave të tu.
 
Shikoja ëmbëlsisht
fytyrën tënde,
duke luftuar me lotët
që ma turbullonin shikimin,
gjersa butësia e fjalëve të tua të ëmbëla
ma ndërpreu ëndërrën,
si një dritë ylberore.
 
FRAGMENTI 10: I MARR DUART E TUA
 
I marr duart e tua
e i shtrëngoj në kraharorin tim.
 
Përpiqem të mbush plot krahët e mi
me bukurinë tënde,
 
Përpiqem
ta vjedh me puthjet e mia
buzëqeshjen tënde,
 
Përpiqem
të pi në shikimet
e syve tu të zes
me sytë e mi,
e dashur.