Arrestimet janë kryer nga policia e Kosovës
Policia e Kosovës ka arrestuar të premten tetë persona të dyshuar për trafikim me qenie njerëzor.
Në mesin e të arrestuarve dy janë femra.
Arrestimet janë kryer të enjtën në zonën e Prizrenit dhe të Ferizajit, si pjesë e operacionit policor të koduar "Marashi".
Grupi kriminal, për të cilin thuhet se ekzistojnë dyshime të bazuara se është marrë me trafikimin e qenieve njerëzore, përfshin gjashtë shtetas të Kosovës dhe dy të Shqipërisë.
Gjatë operacionit policor që ka përfshirë tri zona në Prizren, Rahovec dhe Shtime, policia ka arritur të identifikojë edhe tri viktima, prej të cilave, dy shqiptare të moshës 15 dhe 16 vjeçe dhe një boshnjake 20 vjeçare.
Gjatë kontrolleve policia ka konfiskuar një revole dhe armë të ftohta si dhe sasi të vogla të substancave narkotike.
Me urdhër të prokurorit publik në Prizren, një shtetase e Shqipërisë është liruar në procedurë të rregullt, ndërsa anëtarët tjerë të grupit po mbahen në paraburgim.
Operacioni i koduar me emrin "Marashi" u realizua pas hetimeve disamujore.
Ai është pjesë e strategjisë nacionale për luftimin e trafikimit të qenieve njerëzore.
(http://www.bbc.co.uk/albanian)