EDITA TAHIRI: S'KA BISEDA JASHTË ÇËSHTJEVE TEKNIKE
E Enjte, 03.31.2011, 10:36am (GMT+1)
Beograd, 31 mars 2011(11.00) Shefja e ekipit të Prishtinës në dialogun me Beogradin Edita Tahiri ka deklaruar se përveç temave teknike, nuk do të nisin kaptina të tjera, të cilat mund të zgjidhin problemet thelbësore. Ajo në një intervistë për "Veçernje novosti" kategorikisht ka hedhur poshtë çfarëdo mundësie kompromisi për çfarëdo teme tjetër e cila del nga kornizat teknike. Në konstatimin se autoritetet e Beogradit theksojnë mundësinë që në fund të këtj dialogu mund të bisedohet edhe për çështjet më komplekse, zonja Tahiri tha se ka dëgjuar për këtë lloj retorike nga shefi i ekipit serb Stefanoviq. "Mendoj se kam qenë e qartë kur kam thënë se Kosova ka pranuar këtë dialog me qëllimin që të ndihmojë të zgjidhen çështjet teknike. Për Kosovën çështja e statusit është një kaptinë e mbyllur. Kosova sot është një shtet i pavarur të cilin e ka njohur, të shprehem kështu, pjesa më e fuqishme e botës. Gjykata Ndërkombëtare e Drejtësisë gjithashtu e ka konfirmuar legjitimitetin e pavarësisë. Kosova sot është anëtare e Bankës Botërore dhe FMN. Ky, pra, është një dialog për çështjet teknike", është shprehur Edita Tahiri. E pyetur nëse gjatë këtij dialogu do të bisedohet edhe për veriun e Kosovës, zonja Tahiri tha se për Prishtinën kjo është një çështje e paqenë. "Veriu nuk ekziston si tem", tha ajo, duke shtuar se ekziston çështja e serbëve që jetojnë në pjesën veriore të Kosovës dhe të cilët nën ndikimin e Beogradit, hamendësohen që të integrohen në realitetin dhe institucionet kosovare. Sipas Tahirit, ekziston një pjesë tjetër e serbëve nga viset e tjera të Kosovës të cilët sot plotësisht janë të integruar në institucionet e Kosovës, duke shtuar se edhe njëri nga zëvendëskryeministrat është serb. Edita Tahiri tha se në fund të dialogut pret normalizimin e marrëdhënieve midis dy shteteve dhe të pushojë përzierja e Serbisë në jetën institucionale të Kosovës, në fushën e çështjeve teknike që po shqyrtohen. Tahiri akuzoi Serbinë se edhe më tej po bën pengesa, dhe për shkak të përzirjes së Serbisë, sistemi elektroenergjetik dhe ai telekomunikacionit nuk po mund të normalizohen.
(http://www.rtv21.tv)
www.voal-online.ch
|