KRASNIQI PËRFORMOI SHUMË MIRË, U NDËRPRE NDESHJA PAS LËNDIMIT
E Djelë, 03.22.2015, 09:14am (GMT+1)
Haxhi Krasniqi pas një lufte dominante, nuk arriti që të çojë deri në fund meçin, pasi një goditje nga Jurgen Brahmer e ka lënduar atë duke bërë që fitues i duelit të jetë boksieri gjerman, i cili njëherësh e ka mbrojtur titullin e kampionit në WBA në kategorinë gjysmë të rëndë. Përkundër përgatitjeve të mëdha të Krasniqit dhe motivimit të tij të madh, në fund përvoja e Brahmer-it doli të jetë vendimtare.
Ishte Krasniqi ai që e filloi duelin në mënyrë të mrekullueshme duke dominuar raundet e para dhe duke shpërqendruar kundërshtarin e tij. Megjithatë, Brahmer në momente të caktuara është treguar i saktë duke e goditur fuqishëm Krasniqin dhe duke bërë që ai në raundin e nëntë të humbë fokusin. Në këtë raund kur Krasniqi vendosi të sulmonte kundërshtarin dhe e bëri këtë me sukses, ishte Brahmer ai që e shfrytëzoi përvojën dhe me të majtën e goditi fuqishëm dy-tri herë, madje duke ia çarë buzën Krasniqit. Kjo ishte e papërballueshme për Krasniqin, i cili nuk arriti që të vazhdojë duelin. Brahmer doli fitues me automatizëm, pasi mjeku, trajneri dhe gjyqtari konstatuan se Krasniqi nuk mund të vazhdojë duelin. Brahmer kështu e ka mbrojtur titullin e kampionit në WBA në kategorinë gjysmë të rëndë, derisa Krasniqit i mbetet që të rikuperohet dhe të stërvitet fuqishëm për të kërkuar rikthimin në majën e boksit botëror, pasi dueli që ai shfaqi ishte jashtëzakonisht i mirë dhe i ka shkaktuar shumë telashe Brahmer-it. Ky i fundit ka pasur një numër të madh të publikut në anën e tij, pasi Rostocku është një prej rajoneve me më së paku të shqiptarë, vend që e ka zgjedhur pra boksieri gjerman. Duhet theksuar se Krasniqi ka hyr i pari në ring. Ai pati një hyrje emocionale në ring, i veshur në kuq e zi dhe me melodinë e këngës "Baresha" nga Nexhmie Pagarusha.
www.voal-online.ch
|