SERBIA PARAKALON NË MOSKË MË NËNTË MAJ Do t’i bashkohet parakalimit rus në Moskë në shënimin e 70 vjetorit të përfundimit të Luftës së Dytë Botërore, me gjithë mospajtimin e perëndimit
E Hënë, 04.06.2015, 09:16pm (GMT+1)
Presidenti rus Putin duke parakaluar në Beograd në tetor të vitit 2014
Ushtria serbe do të marrë pjesë në parakalimin ushtarak në Moskë më 9 maj, në 70 vjetorin e kapitullimit të Gjermanisë naziste, që kishte shënuar edhe fundin e Luftës së Dytë Botërore.
Vendimi për pjesëmarrjen është marrë nga presidenti serb Tomislav Nikoliç, me gjithë kërkesave që i janë bërë nga përfaqësues evropianë që të mos e bëjë një gjë të tillë.
Një pjesë e madhe e shefave të shteteve perëndimore përfshirë edhe aleatet e dikurshëm të Moskës gjatë Luftës së Dytë Botërore kanë paralajmëruar se nuk do të marrin pjesë në parakalim në shenjë proteste ndaj ndërhyrjes së Rusisë në Ukrainë përmes aneksimit të siujdhesës së Krimesë një vit më parë.
Serbia synon integrimin në Bashkimin Evropian dhe shpreson të fillojë negocimin e kapitujve në kuadër të bisedimeve për anëtarësim gjatë këtij viti. Por, ajo po ecë nëpër një rrugë të ngushtë ndërmjet perëndimit dhe aleatit të saj tradicional, Rusisë, që nga shpërthimi i krizës në Ukrainë.
Beogradi kishte refuzuar t'u bashkohet sanksioneve evropiane kundër Rusisë, por, në të njëjtën kohë, ndonëse pa e dënuar aneksimin e Krimesë nga ana e Rusisë, është shprehur në mbështetje të tërësisë tokësore të Ukrainës.
Serbia vazhdon të ruajë lidhjet emocionale e kulturore me Moskën, posaçërisht edhe për shkak të qëndrimit të saj kundër pavarësisë së Kosovës që u shpall në vitin 2008 më mbështetjen e Shteteve të Bashkuara dhe Evropës perëndimore. za
www.voal-online.ch
|