Voal-online -Një ndërrim i drejtimit të erës në fund të javës mund ta shtyjë renë e hirit nga Islanda drejt Arktikut, sipas Organizatës Botërore të Meteorologjisë.

"Ndryshimi i presionit atmosferik, bashkë me shiun e presionit të ulët, jo vetëm e shtyjnë renë e hirit drejt Arktikut, por do të kontribuojnë edhe për ta zbritur renë në një lartësi më të vogël," parashikojnë meteorologët.

Ndërkohë një mjegullë e re e hirit vullkanik nga Islanda, raportohet se ka lëvizur sot në drejtim të Britanisë.

Shërbimi kombëtar për trafikun ajror tha se ashtu siç qëndrojnë gjërat tash, në Skoci, Angli dhe Uells, ende pritet që hapësira ajrore të hapet më vonë gjatë ditës.

Megjithatë, tash për tash, aeroportet në Britani mbeten të mbyllura.

Hapësira ajrore britanike ishte mbyllur të entjen e kaluar për shkak të shqetësimeve se hiri vullkanik mund të shkaktoj dështim të motorëve të aeroplanave.

Miliona udhëtarë janë bllokuar ose u janë anuluar fluturimet, në pjesën veriore të Evropës dhe më gjërë.

Megjithatë, pritet që gjatë ditës së sotme, do të fluturojnë më tepër aeroplanë.

Këtë e ka paralajmëruar mbrëmë edhe Komisionari i transportit i BE-së, Sim Kallas:

"Prej mëngjesit të 20 prillit ne mund të shohim në mënyrë progresive më tepër aeroplana të fillojnë të fluturojnë", tha Sim Kallas.

Fluturimet në disa linja kanë filluar sot edhe nga aeroporti i Rinasit.

Në ditët e ardhshme vende të ndryshme evropiane do të vlerësojnë shtimin e fluturimeve në linja të ndryshme.