Voal-online - Kryeministri i Republikës së Kosovës, Hashim Thaçi tha se në veri të Mitrovicës nuk do të ketë vend për kontrabandistë dhe se ligjshmëria do të shtrihet në të gjithë vendin. Këtë konstatim kryeministri Thaçi e bëri për Zërin e Amerikës, pas takimeve që zhvilloi në Uashington së bashku me presidentin Sejdiu me zyrtarë të lartë amerikanë.

 

"Kjo ishte vizita e parë shtetërore e delegacionit të Republikës së Kosovës tek administrata e re e Shteteve të Bashkuara të Amerikës, administrata e Presidentit Obama. Takimi me Sekretaren e Shtetit, znj. Klinton ishte takim mbështetës për Kosovën, një rikonfirmim se administrata e re në Shtetet e Bashkuara të Amerikës do të jetë mbështetëse e fuqishme e pavarësisë së Kosovës, e zhvillimit ekonomik, për hapjen e perspektivës së re të shtetit të ri të Kosovës", ka thënë kryeministri Thaçi.
Ndërsa në takim me zëvendëspresidentin Bajden, si mik i vjetër i Kosovës, ishte gjithashtu një zotim për rolin aktiv që do ta luan edhe vetë z. Bajden personalisht për çështjen e Kosovës, pasi që është edhe i familjarizuar me çështjen e Kosovës, ka thënë Thaçi.
Nga ana jonë, ne e informuam administratën e SHBA-ve se Kosova si shtet, është shtet normal, është shtet funksional, është shtet shumë stabil, se po ndërtojmë institucione efektive, demokratike, multietnike Kosovën si vend demokratik dhe atdhe të të gjithë qytetarëve të saj, ka thënë mes tjerash kryeministri Hashim Thaçi.
Duke u përgjigjur në pyetjen e Zërit të Amerikës se pjesa veriore e Kosovës mbetet ndër sfidat kryesore të qeverisë së tij dhe se ku mbështetet shpresa dhe optimizmi për integrimin e kësaj pjese të vendit, kryeministri Thaçi ka theksuar "se integrimi është rruga e vetme, e ardhmja e Mitrovicës është e ardhmja e Kosovës, nuk do të ketë vend edhe për ata kontrabandistë që ende funksionojnë në veri të Mitrovicës. Tash EULEX është shtrirë në gjithë territorin e Kosovës së bashku me institucionet vendore do të jenë më aktiv, më konkret, më veprues në betejën e tyre për shtrirjen e ligjshmërisë në gjithë territorin e Republikës së Kosovës, ndërsa duam të besojmë se edhe Beogradi do të distancohet nga fantazmat e kohës së Sllobodan Millosheviqit në raport me Kosovën. Pra edhe në Mitrovicë do të kemi një qytet integrues edhe territorial edhe ndëretnik. Do të investojmë në atë pjesë edhe më tepër, vetëm vitin e kaluar kemi investuar mbi 5 milion euro në infrastrukturë për të krijuar një jetë më të mirë dhe më të sigurt, dhe, unë dua të besoj se edhe pas vizitës këtu në Uashington, që ishte një konfirmim dhe mbështetje e fuqishme, se integriteti territorial i Republikës së Kosovës dhe shteti i Kosovës është i sigurt, mbështetja është e garantuar, perspektiva është e hapur dhe ne do ecim bashkërisht dhe duhet të jemi krenarë për punën e përbashkët që kemi bërë në Prishtinë, në Uashington dhe në Bruksel, ka thënë mes tjerash Kryeministri i Republikës së Kosovës, Hashim Thaçi, në një intervistë për Zërin e Amerikës.

Rating (Votes: )

Comments (0)

Dërgoja shokut

Printo

---