Voal-online - Federata Ndërfetare Ndërkombëtare për Paqe Botërore e OKB-së, ia jep Lisen Bashkurtit titullin "Ambasador i Paqes". Bashkurti 52-vjeçari, me gradën shkencore të As/Profesorit, ka dhënë ndihmesë në fushën e Marrëdhënieve Ndërkombëtare. Ai është
Presidenti i Akademisë Diplomatike Shqiptare, njohës i katër gjuhëve të huaja; anglisht, frëngjisht, italisht dhe serbo-kroatisht, njihet për publikimin e më shumë se 15 librave dhe rreth 150 artikujve studimorë e shkencorë dhe eseve botuar në Shqipëri, Maqedoni, Kosovë, Kroaci, Mal të Zi, Finlandë, Shtetet e Bashkuara të Amerikës, me vlerë në fushën e diplomacisë.
Bashkurti ishte Ambasador i Shqipërisë në Republikën e Hungarisë dhe në Këshillin Evropës, Strasburg, Francë, si dhe në disa detyra si; Ekspert në Protokollin e Shtetit në Ministrinë e Jashtme, Shef i Zyrës për OKB-në në MPJ, Përfaqësues i Shqipërisë në sesionet e 49 dhe 50 të OKB-së në Nju Jork, Drejtor i Analizë-Prognozës, Drejtor i Organizatave Ndërkombëtare, Shef i Sektorit të Kosovës, Shef i Sektorit të Kosovës në Ministrinë e Punëve të Jashtme, etj.
Kontributi i Bashkurtit është dhe në mësimdhënie. Ai ka qenë Dekan i Fakultetit te Marrëdhënieve Ndërkombëtare e Diplomaci në Universitetin Iliria, Kosovë dhe më pas po dekan në Universitetin Euro-kolegj, Strugë, Maqedoni, Rektor i Universitetit Ndërkombëtar të Strugës dhe aktualisht është Rektor i Universitetit Mbretëror Iliria-Kosovë.
Është lektor i disa akademive diplomatike dhe universiteteve jashtë vendit. Po kështu Ministër Këshilltar Lisen Bashkurti është Zëvendëspresident Nderi i ACCD-Londër. Ai ka asistuar në disa misione ndërkombëtare si; vëzhgues i OSBE-së në zgjedhjet e përgjithshme në Ukrainë, vëzhgues i OSBE-së në Referendumin e Malit të Zi për pavarësi, Vëzhgues i OSBE-së në zgjedhjet e përgjithshme në Malin e Zi.
Atij i janë dhënë disa medalje si; "Medalja e Artë", për studimin "Mbi marrëdhëniet Shqiptaro-Amerikane", "Katër Medalje të Argjendta", për kontributin si Ambasador i Shqipërisë në Hungari, "Medalja e Argjendtë", "Intelektual i shquar i shekullit të 21-të për vitin 2007" nga Qendra Ndërkombëtare e Biografive, Kembrixh, Angli, është përfshirë në Fjalorin e Oksfordit për vitin 2007 "Për kontributin në hulumtimet në Marrëdhëniet ndërkombëtare dhe Diplomaci "Who is Who", "Excellence Award-2007", Qendra Ndërkombëtare e Biografive, Kembrixh, Angli, dhe "Njeriu i vitit 2009", nga Instituti Amerikan i Biografive, ABI.