Prishtina po e thellon veprimtarinë diplomatike për nxitjen e njohjeve të reja të Kosovës së pavarur dhe sovrane
E Shtunë, 03.14.2009, 09:52am (GMT+1)
Prishtina po e thellon veprimtarinë diplomatike në drejtim të nxitjes së njohjeve të reja të shtetit të pavarur dhe sovran të Kosovës. Në këtë kuadër kryetari i AKR-së, Bexhet Pacolli, priti në selinë e tij një delegacion nga Parlamenti i Mbretërisë Hashemite të Jordanisë, të kryesuar nga kryetari i komisionit parlamentar për Ekonomi, Yosef Al-Karneh dhe anëtarin e këtij komisioni Khalil Alhajaj. Vizita e vendit arab është realizuar në vijim të vizitave të këtij delegacioni në Kosovë, në përgjigje të vizitës së Myftiut të Kosovës, Naim Tërnava, bërë shtetit të Jordanisë kohë më parë. Në pritjen miqësore Pacolli njoftoi gjerësisht parlamentarët jordanezë për rrjedhat politike në Kosovë dhe kërkoi njohjen sa më të shpejtë të pavarësisë së Kosovës nga ky shtet. Kryetari i AKR-së Pacolli, me këtë rast mori ftesë që gjatë vizitës që ai do të ketë në Jordani nga data 22 deri me 25 prill 2009, të takohet edhe me kryeministrin dhe kryeparlamentarin e këtij vendi. Kryeministri kosovar Hashim Thaçi në mbledhjen e qeverisë i ka vlerësuar pozitivisht aktivitetet në procesin e njohjes së Kosovës. Kryeministri tha se në këtë aspekt, Kosova e ka mbështetjen e plotë të Shteteve të Bashkuara, të vendeve të Bashkimit Evropian dhe të personaliteteve të njohura ndërkombëtare. "Kosova po ndërtohet si një shtet normal demokratik, multietnik me perspektivë të sigurt për të qenë pjesë e NATO-s edhe BE-së", nënvizoi Thaçi.
|
Comments (0)
Dërgoja shokut
Printo
