Editorial: Tani PS vendin e ka në Kuvend
E Djelë, 09.27.2009, 02:58pm (GMT+1)
Voal-online Pas konfirmimit të kryetarit të PS në detyrën e tij, pritet hapi tjetër i kësaj partie, hyrja në Kuvendin e Shqipërisë, duke dëgjuar kështu zërin e pakicës brenda saj dhe duke dëshmuar shkallën e tolerancës qytetare e të frymës demokratike në radhët e partisë. Pakica ka të drejtë kur kërkon që opozita të ketë rolin e saj në reformat e thella të cilat e presin vendin, reforma pa të cilat nuk mund të realizohen as premtimet thelbësore që vetë e majta e Shqipërisë ua ka bërë bashkëqytetarëve, integrimin sa më të shpejtë të vendit në Bashkimin Evropian. Në këtë kuadër, ka rëndësi të posaçme realizimi pa vonesë i liberalizimit të vizave për qarkullim të lirë të qytetarëve të Shqipërisë në vendet e Bashkimit Evropian. Partia Socialiste nuk bën që të mungojë në këto procese kaq jetike. Ajo do ta dënonte veten rëndë me këtë mungesë. Janë të gjitha mundësitë që, nëpërmjet pranisë në Kuvend, PS të luajë më së miri rolin e saj opozitar konstruktiv. Duke ngritur peshën e Shqipërisë në zhvillimet e brendshme, në zhvillimet shqiptare përgjithësisht e ato rajonale në tërësi, si dhe në integrimet perëndimore, Partia Socialiste do të krijonte hapësirë të mëtejshme për veten si në opinionin e brendshëm ashtu edhe në atë të jashtëm. Ndihmesa e opozitës në këto faza historike për vendin dhe për kombin është e pazëvendësueshme. Vetëm nga institucioni i Kuvendit do të arrihej bashkimi i partisë, bashkimi i së majtës, ngjallja e dëshirës së anëtarësisë dhe elektoratit për ta kthyer partinë e tyre dhe të majtën në pushtet. Kështu do të merrnin kuptim edhe ambicjet e ardhshme të kësaj partie. Pjesëmarrja në Kuvend do të ishte në të mirë të afirmimit të atyre të rinjve që debutojnë në institucionin më të lartë të një republike paralamentare, siç është Shqipëria. Kështu do të arrihej edhe ndërthurja optimale midis eksponentëve me më shumë përvojë dhe atyre më të rinj.
www.voal-online.ch
|