Gjykatësja në procesin kundër atletit jug-afrikan Oscar Pistorius shpalli Pistoriusin të pafajshëm për akuzën për vrasje me paramendim.
Pistorius, i cili akuzohet për vrasjen e të dashurës, modeles Reeva Steenkamp, qante me ngashërim kur gjykatësja Thokozile Masipa po lexonte vendimin.
Gjykatësja tha se ishte e qartë se i pandehuri synonte të përdorte armën natën e vrasjes së Reeva Steenkamp, por kjo nuk nënkupton se ai kishte synim të vriste dikë. Provat për paramendim në aktet e tij, tha gjykatësja, nuk ishin krejt bindëse.