Deutsche Welle: BE,
SHBA, Rusia dhe Ukraina ranë dakord në Gjenevë për një plan paqeje për
Ukrainën. Mund të flitet për suksesin e madh, të cilin e kanë pritur
gjatë të gjitha palët?
Gunther Krichbaum: Dakordimi në Gjenevë është padyshim një sinjal
inkurajues dhe prandaj ne si Komisioni për Çështje Evropiane e
përshëndesim pa rezerva dakordimin. Megjithatë, suksesin e madh unë nuk
arrij ta dalloj. Për sukses të madh unë do të flas kur marrëveshja të
pasohet vërtet nga vepra.
Një mision vëzhgues i OSBE-së do të mbikqyrë zbatimin e marrëveshjes. A prisni probleme në zbatimin e saj?
Një rol vendimtar këtu luan qeveria ruse, zoti Putin. Çelësi për
zgjidhjen e të gjithë konfliktit në të kaluarën ishte në Moskë e edhe
tani ai ndodhet në Moskë. Prandaj: Rusia duhet ta shuajë zjarrin, që ka ndihmuar të ndizet në javët e fundit.
Një konferencë të përbashkët shtypi të ministrave të jashtëm nuk
pati. Në vend të kësaj, ministri i Jashtëm rus, Sergej Lavrov u shkëput
dhe lexoi i pari deklaratën e përbashkët. Kjo nuk është saktësisht
shprehje e një vije të njësuar, të përbashkët. Ose si e shikoni këtë?
Javët e fundit është hedhur dëm shumë besim nga ana e Rusisë. Ne kemi
rënë pas në modelet e Luftës së Ftohtë. Në vendet baltike, në Poloni,
por edhe në Gjeorgji dhe në Republikën e Moldavisë ekziston një pasiguri
e madhe. Këto dy vendet e fundit kanë të ashtuquajtura "konflikte të
ngrira". Kjo do të thotë se
qeveria qendrore nuk ka qasje në të gjitha pjesët e vendit. Kështu për
shembull, në Republikën e Moldavisë ishin shumë nervozë. Këtu ne kemi të
bëjmë me "konfliktin e ngrirë" të Transnistrisë. Dhe "presidenti" i
atjeshëm, zoti Shevçuk, ka deklaruar ditët e fundit se do t'i pëlqente
të bëhej pjesë e Federatës Ruse. Prandaj: mbetet thirrja drejtuar
Moskës, që deklaratat të ndiqen nga vepra.
Pas shpalljes së planit të paqes, Lavrovi e akuzoi qeverinë e Kievit
se angazhon trupa kundër popullit të saj dhe kërcënon të drejtat e
minoritetit rusishtfolës. Ministri i Jashtëm i Ukrainës, Andrej Deshçiza
tha se me Rusinë ka mosmarrëveshje për shkaqet bazë të shpërthimit të
konfliktit dhe të dyja palët kanë mendime të ndryshme përsa i përket
paprekshmërisë territoriale të Ukrainës. Kjo të lë përshtypjen, sikur
paqja e negociuar është tepër e brishtë.
Po, ajo është e brishtë. Dhe njëkohësisht ne mund të flasim për shansin e
një paqeje. Ditët e fundit situata dukej fare ndryshe. Prandaj ne tani
duhet ta mbështesim këtë marrëveshje. Edhe vetë në Ukrainë, kampet e
ndryshme dhe natyrisht edhe rajonet duhet të bashkëpunojnë më mirë me
njëri-tjetrin. Në rastin e Ukrainës ne nuk kemi të bëjmë me një ndarje
më dysh. Në njërën anë popullata ukrainishtfolëse e Ukrainës, nga ana
tjetër popullata rusishtfolëse. Ukraina përbëhet nga shumë rajone dhe
është me më shumë shtresa, se sa e perceptojmë ne nganjëherë në
Gjermani. Duhet menduar me të vertëtë sa përgjegjegjësi mund t'u jepet
këtyre rajoneve - por pa e rrezikuar në substancë shtetin e Ukrainës.
Intervistën e zhvilloi Marco Müller.
Gunther Krichbaum është kryetar i Komisionit për Çështje Evropiane të
Bundestagut Gjerman dhe deputet i CDU/CSU prej vitit 2002 në
Bundestagun Gjerman.