VOAL - Online Zëri i Shqiptarëve - Gjilani: Vendimi pret votat me kusht

Autoritetet për administrimin e procesit zgjedhor në Kosovë thonë se duhet të pritet përfundimi i numërimit të votave me kusht për komunën e Gjilanit, para se të jepet ndonjë vlerësim në lidhje me fituesin eventual të kësaj komune.

Pas miratimit të raportit të Qendrës së Numërimit dhe të Rezultateve në lidhje me hetimin dhe rinumërimin e fletëvotimeve të raundit të dytë të zgjedhjeve lokale për këtë komunë, Komisioni Qendror i Zgjedhjeve i dha të shtunën dritën e gjelbër kësaj qendre për të nisur numërim e mbi 400 votave me kusht.

Sido që të jetë, kryetarja e KQZ-së, Nesrin Lushtak thotë për Radion Evropa e Lirë se është herët të flitet për rezultate finale.

"Prej Qendrës së Numërimit dhe të Rezultateve ne kemi marrë dje një raport. Ky raport ka të bëjë me hetimin dhe rinumërimin e votave të rregullta. Sot po e presim raportin në lidhje me votat me kusht. Andaj, ende nuk mund të jap asnjë përgjegjie konkrete", thekson Lushta.

Nga rreth 35 mijë vota, të cilat u rinumëruan deri më tani në Qendrën e Numërimit dhe të Rezultatave, thuhet se janë gjetur vetëm shkelje minore.

Përfaqësuesi i Fondacionit Ndërkombëtar për Sisteme Elektorale (IFES), si pjesë e ekipit të vëzhguesve ndërkombëtar, që mbikëqyri hetimin dhe rinumërimin, Ched Flego, shpjegon më shumë.

"Ky rishikim vuri në pah që ishin vetëm disa ndryshime të vogla që duhej bëhen. Ky raport iu dorëzua dje KQZ-së, e cila kërkoi edhe numërimin e votave me kusht. Besoj se kjo do të kryhet sot dhe se raporti final do t'i dorëzohet KQZ-së", sqaron Flego.

Komisioni Qendror i Zgjedhjeve në Kosovë pritet që gjatë ditës të zhvillojë mbledhjen e radhës, ku do të jepen më shumë hollësi në lidhje me procesin për Gjilanin.

(http://www.evropaelire.org)