KOMBËTARJA GJERMANE PËR FEMRA RRIT REKORDIN E SUKSESEVE NË FUTBOLL
E Martë, 07.30.2013, 03:54pm (GMT+1)
Kombëtarja gjermane për femra fiton për herë të tetë Kampionatin Europian të Futbollit për Femra.
Pas fitores së Kampionatit Europian të Futbollit për femra në Suedi, kombëtarja gjermane e femrave u kthye në Gjermani. Në festimet në Frankfurt futbollistet gjermane i nderojnë mijëra fansa. Skuadra e trajneres Silvia Neid mundi dje Norvegjinë në një lojë të fortë 1:0. Lojtaret më të spikatura ishin portierja Nadine Angerer, e cila diti të përballojë dy 11-metersha dhe Anja Mittag. Për Gjermaninë kjo është fitorja e tetë e Kampionatit Europian të Futbollit për femra. Një nga lojtaret e njohura të kombëtares gjermane është futbollistja me origjinë nga Kosova, Fatmire Bajramaj.
Fillimi i kampionatit nuk ishte aq shpresëdhënës për skuadrën gjermane, ndërkohë që finalja kundër Norvegjisë u kthye në një lojë dramatike. Fitorja i dedikohet portieres Nadine Angerer, e cila u cilësua si heroina e ndeshjes së finales.
Në këtë kampionat luajtën 12 skuadra europiane. Hapjen e kampionatit e shënoi ndeshja me skuadrës së femrave italiane dhe finlandeze. Si rivalët më të fortë të skuadrës gjermane konsideroheshin Franca, Rusia, Anglia dhe Spanja.
www.voal-online.ch
|