Voal-online - Policia nepaleze ka hapur një hetim për të hedhur dritë në
grindjen ku dje pasdite u përfshinë dy alpinistë, zvicerani Ueli Steck e
italiani Simone Moro, e një grup i madh i sherpave në fushimin bazë 2 të
Everest.
Të dy alpinistët janë sulmuar e goditur në vijim të një ndërhyrjeje të tyre
lidhur me fiksimin e litarëve në një faqe shkëmbore të Lhotse, në rreth 7200
metra lartësi. Kur kanë zbritur në fushim, të dy sportistët janë rrethuar nga
rreth njëqind sherpa.
"Na kanë thënë se po të mos largoheshim nga fushimi 2 brenda një ore, do
të na nxirrnin me forcë," ka treguar 45 vjeçari Simone Moro në sajtin web
Montagna.tv. Moro i kishte shpëtuar për pak një thike, e cila kishte goditur
çantën e tij. Ndërsa 36 vjeçari bernas, Ueli Steck, i njohur për shpejtësinë
dhe shkathtësinë në ngjitjet e Alepeve si në Veri të Eiger, ishte goditur me
një gur në fytyrë, mbi gojë.
Përplasja nuk është shndërruar në tragjedi vetëm falë ndërhyrjes së alpinisteve
të tjerë të huaj. Moro, i palënduar, ka deklaruar se dëshironte të vazhdonte
ngjitjen, ndërsa Steck, i dëmtuar seriozisht, ka vendosur të largohet dhe është
zhvendosur në Kathmandu.
Ngaqë ia kishte shpëtuar jetën një alpinisti tjetër, pikërisht në vargmalin
Himalaja, më 2008 alpinisti zviceran Ueli Steck e kolegu i tij Simon
Anthamatten morën në Zyrih çmimin Prix Courage, çmimin e Trimërisë.