1. Zanafillat antike:
Zanafillat e Hallouinit datojnë herët në Festivalin Keltik antik të
Samhain (shqiptohet Souin ). Keltët, të cilët jetonin 2000 (dy mijë )
vjet më parë në hapësirën ku sot është Irlanda, Britania e Madhe dhe
Franca veriore, e festonin Vitin e tyre të Ri më 1 Nëntor. Kjo ditë
shënonte fundin e verës e të korrave dhe fillimin e territ, të ftohtit,
një periudhë e vitit që shpesh shoqërohej me vdekjet e shumta të
njerëzve në atë kohë. Keltët besonin se një natë para Vitit të Ri,
lidhjet midis botës së të gjallëve dhe botës së të vdekurve
turbulloheshin. Natën e 31 tetorit, ata festonin Souinin, kur besohej se
fanatazmat e të vdekurve riktheheshin në tokë. Ata besohej se
shkaktonin trazira dhe dëmtonin të korrat. Keltët mendonin se prania
fizike e shpirtërave të mbarë globit e bënte më të lehtë për Druidët,
pra prifërinjtë Keltë, që ata të predikonin të ardhmen. Për një popull
krejtësisht të varur nga natyra dhe dukuritë e saj këto
profeci ishin një burim i rëndësishëm për të larguar frikën dhe për të
sjellë qetësinë shpirtërore dhe durimin që duhej gjatë një dimri të
gjatë dhe të zymtë.
Për ta
përkujtuar ngjarjen, Druidët përgatitnin zjarre gjigante të shenjta, ku
njerëzit grumbullonin prodhime dhe kafshë si sakrificë ndaj perëndive
keltike. Gjatë festimit, keltët vishnin kostume lëkura bagëtish e me
kokat bagëtish dhe përpiqeshin t'ia parathonin fatin njëri-tjetrit. Kur
festimet mbaronin, ata ndiznin zjarret në vatrat e tyre me prushin e
marrë prej zjarreve të shenjta që t'i ndihmonte ata të ishin të mbrojtur
nga dimri që po vinte. Në vitin 43, romakët e pushtuan pjesën më të
madhe të territorit të keltëve. Gjatë katër shekujve sa sunduan në
hapësirat keltike, dy festivale romake u kombinuan me festimet
tradicionale keltike te festimit të Souinit. I pari ishte Feralia, një
ditë nga fundi i tetorit kur romakët tradicioanlisht përkujtonin ikjen e
të vdekurve. I dyti ishte për t'u nderuar Pomona, perëndesha romake e
frutave dhe e durëve. Simbol i Pomonas është molla dhe mishërim i këtij
festimi në Souin me sa duket shpjegon traditën e "bobbing" (zgrapcimit )
për mollët që praktikohet në ditët tona.
Nga
Shekulli VIII, ndikimi i krishterimit u përhap në hapësirat keltike. Në
këtë kohë, Papa Bonifac IV e caktoi 1 Nëntorin Ditën e të Gjithë
Shenjtorëve (All Saints' Day ), një ditë kur do të nderoheshin të gjithë
shenjtorët dhe martirët. Gjerësisht besohet sot se papa po përpiqej ta
vendoste festivalin keltik në kuadrin e festës së sanksonuar nga kisha.
Festa është quajtur edhe All-hallows ose All-hallowmas (nga anglishtja e mesjetës Alholowmesse
që do të thotë Dita e të Gjithë Shenjtorëve) dhe natën përpara saj,
natën e Souinit, filluan ta thërrasin All-hallows Eve dhe, më vonë,
Halloween. Madje pastaj, në vitin 1000, kisha e caktoi 2 Nëntorin Ditën e
të Gjithë Shpirtërave (All Souls' Day ), një ditë për të nderuar të
vdekurit. Ajo është festuar ngjashëm me Souinin, me zjarre të mëdhenj
gjigantë, me parada dhe me veshje kostumesh të shenjtorëve, engjejve dhe
djajve. Të tria festat, vigjilja e Ditës së të Gjithë Shenjtorëve (pra
Halloween ), Dita e Gjithë Shenjtorëve dhe Dita e të Gjithë Shpirtërave
janë quajtur Hallowmas (Halloumas ).
2. Traditat moderne:
Tradita amerikane "trick-or-treating" (veshjes së posaçme me maska nga
fëmijët ) me sa duket e ka zanafillën nga paradat e Ditës së të Gjithë
Shpirtërave në Angli. Gjatë festimeve, qytetarët e varfër do të lypnin
ushqime dhe familjet do t'iu jepnin atyre ëmbëlsira të quajtura "soul
cakes" (keke të shpirtërave ) në shkëmbim të premtimit të fëmijëve se
ata do të luteshin për të afërmit e vdekur të familjes. Shpërndarja e
kekeve të shpirtërave ishte trimëruar nga kisha si mënyrë për të
zëvendësuar praktikat e lashta të dërgimit të ushqimit dhe të verës
shpirtërave të të vdekurve. Praktika, e cila quhej më parë "going
a-souling" është marrë nga fëmijët të cilët vizitonin shtëpitë e fqinjve
të cilët iu jepnin fëmijëve pije të lehta, ushqime dhe para. Tradita e
veshjes së kostumit të Hallouinit ka rrënjë evropiane dhe keltike.
Qindra vjet më parë, dimri ishte një kohë e pasigurtë dhe e frikshme.
Furnizimet me ushqime shpesh ishin të pakta dhe shumë njerëz kishin
frikë nga terri, nga ditët e shkurtëra të dimrit plot trishtim. Në
Hallouin, kur besohej se fantazmat riktheheshin në tokë, te të gjallët,
njerëzit mendonin se do t'i merrnin me të mirë fantazmat nëse ua linin
shtëpitë në dispozicion, pra bosh. Që të mos njiheshin nga fantazmat
njerëzit mbanin maska kur largoheshin nga shtëpitë me të rënë errësira
kështu që fantazmat nuk i njihnin dot të afërmit e tyre. Në Hallouin,
për t'i mbajtur fantazmat larg shtëpive të tyre, njerëzit vinin pjata me
ushqime jashtë shtëpive të tyre për t'i pajtuar fantazmat dhe për ta
parandaluar orvatjen e tyre për të hyrë në shtëpitë.
3.Evoluimi i festave:
Emigrantët evropianë që shkonin në Amerikë, çonin atje llojlloj
zakonesh. Për shkak të sistemeve të ngurta protestante, karakteristike
për Anglinë e Re (New England- përafërsisht SHBA e sotme ) të kohëve të
hershme, festimi i Hallouinit në kohët koloniale ishte shumë i kufizuar.
Më përhapur ishte në Maryland dhe në kolonitë jugore. Besimet dhe
zakonet e grupeve të ndryshme etnike europine, sikurse të amerikanëve
dhe indianëve përziheshin, një version i veçantë i Hallouinit amerikan
filloi të shfaqet. Festimet e para përfshinë "play parties" (mbrëmje
lojërash ), ngjarje publike që mbaheshin për të festuar të korrat, ku
fqinjtë duhej të përjetonin bashkë historitë e familjeve të tyre, të
parashikonin fatet e njëri- tjetrit, të kërcenin dhe të këndonin.
Festimet e Hallouinit të periudhës koloniale përfshin edhe tregimin e
historive me fantazma dhe gjithfarë fantazirash. Nga mesi i Shekullit
XIX, festimet e përvitshme të vjeshtës ishin bashkë, por Hallouinin ende
nuk festohej kudo.
Në
gjysmën e dytë të Shekullit XIX, Amerika u vërshua nga një valë e re
emigrantësh. Këta emigrantë të rinj, sidomos në miliona irlandezë që
iknin nga uria që kishte pllakosur Irlandën pas vitit 1846, ndihmoi në
popullarizimin e Hallouinit në gjithë Amerikën. Duke marrë nga traditat
irlandeze dhe angleze, amerikanët filluan të veshin kostume dhe të
shkojnë shtëpi më shtëpi për të kërkuar ushqime apo para, një praktikë
që sot quhet tradita e "trick-or-treat". Vajzat besonin se, në Hallouin,
ato mund të hyjnizojnë emrin dhe pamjen e burrave të ardhshëm duke bërë
magji me penj të tjerrur, me zgrapcime të mollëve apo me pasqyrat.
Nga
mbarimi i Shekullit XIX, Hallouini në Amerikë u bë një festë që
shërbente më shumë për bashkimin e fqinjve që të shkëmbenin vizita mes
tyre, sesa për fantazmat, magjitë dhe shtrigëritë. Në fillim të Shekulli
XX, mbrëmjet kushtuar Hallouinit u bënë festa ku të rritur e fëmijë
festonin së bashku. Mbrëmjet kishin në qendër lojëra, ushqime, veshje
festive. Prindërit, të inkurajuar nga gazetat dhe nga liderët lokalë
bënin diçka "frikësuese" ose "qesharake" në festimet e Hallouinit. Në
këtë mënyrë Hallouini humbi shumëçka nga karakteri fetar apo
supersticioz (bestytnor ) gjatë Shekullit XX.
Në vitet
1920 e 1930, Hallouini u bë festë jofetare, por qendrat e banimit i
organizonin festimet me parada, me mbrëmje të mëdha, me dëfrime dhe të
ngrëna. Pavarësisht organizimit të mirë u vunë re akte vandale gjatë
këtyre festimeve. Nga vitet 1950 liderët lokalë ia dolën me sukses të
kufizonin vandalizmin dhe Hallouinin e morën në dorë kryesisht të
rinjtë. Falë numrit të madh të fëmijëve në bumin e lindjeve të asaj
periudhe (baby boom ), mbrëmjet kaluan nga qëndrat e mëdha në shkolla
dhe familje. Në
1920- 1950, tradita shumëshekullore e "trick-or-treating" rilindi.
"Trick-or-treating" u përhap te të gjithë pa përjashtim. Sot amerikanët
shpenzojnë çdo vit rreth 7 miliardë dollarë në festimet e Hallouinit,
duke e shndërruar në festën e dytë më komerciale të vitit në
Amerikë./Elida Buçpapaj