Sekretarja amerikane e shtetit, Hillary Clinton, tha sot në Prishtinë se
Shtetet e Bashkuara kërkojnë vazhdimin e bisedimeve ndërmjet Kosovës dhe
Serbisë, por kundërshtojnë çfarëdo bisedimesh për kufijtë e Kosovës.
Komentet e saj pasuan takimet me udhëheqësit më të lartë të Kosovës,
presidenten Atifete Jahjaga dhe kryeministrin Hashim Thaçi. Sekretarja Clinton,
e cila është shoqëruar nga shefja e politikës së jashtme të Bashkimit Evropian,
Catherine Ashton, tha se për Shtetet e Bashkuara, cështja e statusit të
Kosovës, është e përfunduar.
"Do të jem shumë e qartë, jo vetëm këtu në Prishtinë, por për të gjithë ata që
na dëgjojnë e shikojnë në rajon, se Shtetet e Bashkuara janë të përkushtuara
fuqishëm ndaj tërësisë tokësore dhe sovranitetit të Kosovës dhe për vendosjen e
sundimit të ligjit në tërë Kosovën. Ne kundërshtojmë çdo diskutim për
ndryshimin e territorit apo rihapjes së statusit të pavarur të Kosovës. Këto
cështje nuk janë të hapura për diskutim. Kufijtë e Kosovës së pavarur e
sovrane, janë të qartë dhe të vendosur", tha sekretarja Clinton, e cila bëri
thirrje për vazhdimin e bisedimeve dhe zbatimin e të gjitha mjarëveshjeve të
arritura në bisedimet e deritashme ndërmjet Kosovës dhe Serbisë të
ndërmjetësuara nga Bashkimi Evropian.
"Ne besojmë se dialogu, që kryeministri ka filluar me Catherine Ashton dhe
kryeministrin e Serbisë, është absolutisht thelbësorë dhe ai siguron një rrugë
të përparimit, qëndrueshmërisë dhe paqes afatgjate. Ne po punojmë bashkërisht
me Bashkimin Evropian në këtë drejtim dhe unë dua që personalisht ta përshëndes
kryeministrin Thaçi, që ka marrë guximin politik për takimin me kryeministrin
Daçiç në Bruksel. Ky ka qenë një veprim i guximshëm dhe i zgjuar", tha
sekretarja Clinton, duke u bërë thirrje të dyja palëve që të vazhdojnë zbatimin
e marrëveshjeve dhe të bien dakord edhe për marrëveshje të reja, që janë të
domosdoshme për pëprarimin e të dyja vendeve.
Ajo vlerësoi lartë edhe rolin e presidentes Jahjaga për ndryshimin e imazhit të
Kosovës, duke ritheksuar përkushtimin e qeverisë së saj për të ardhmen e
Kosovës dhe integrimin e saj në strukturat euroatlantike. Ajo siguroi
mikpritësit e saj për vazhdimin e mbështetjes amerikane për Kosovën duke e
cilësuar atë si një cështje të rëndëishme jo vetëm për politikën e jashtme të
Shteteve të Bashkuara por edhe për të dhe familjen e saj.
"‹"‹Ndërkaq, shefja e politikës së jashtme të Bashkimit Evropian, Catherine
Ashton, tha se të gjitha vendet e rajonit duhet ta vazhojnë rrugëtimin e tyre
drejt integrimeve evropiane, duke vënë theksin në rëndësinë e vazhdimit të
bisedimeve ndërmjet Kosovës dhe Serbisë.
"Dialogu që kemi filluar nuk është i lehtë, për asnjërin nga kryeminstrat, si
të Kosovës ashtu edhe të Serbisë dhe e di që edhe për qytetarët e Kosovës nuk
është i lehtë. po ashtu. Por, ky dialog ka për qëllim ndërtimin e një jete më
të mirë për të gjithë qytetarët, përfshirë edhe ata që janë në veri të Kosovës.
Kjo bëhet duke biseduar hapur dhe lirshëm. Kryeministrat Thaçi dhe Daçiç janë
treguar të guximshëm në takimin e mbajtur në Bruksel", tha zonja Ashton.
Kryeministri i Kosovës Hashim Thaçi, u zotua se institucionet e Kosovës do të
përmbushin të gjitha detyrimet në rugëtimin e tyre drejt Bashkimit Evropian,
përfshirë edhe normalizimin e marëdhënieve me Serbinë.
"U pajtuam bashkërisht me sekretaren Clinton dhe baroneshën Ashton, se procesi
i normalizimi të marrëdhënieve ndërmjet Kosovës dhe Serbisë është vendimtar për
evropianizimin e rajonit. Kosova është e vendosur për këtë proces. Por, të jemi
të qartë. Ora e historisë nuk do të kthehet prapa. Shteti i Kosovës po
konsolidohet dhe forcohet çdo ditë. Pavarësia e Kosovës dhe integriteti i saj
territorial dhe organizimi i brendshëm shtetëror janë fakte të njohura
ndërkombëtarisht dhe të padiskutueshme", tha kryeministri Thaçi.
Sekretarja Clinton u bëri thirrje udhëheqësve të Kosovës që të punojnë për
zgjidhjen e shqetësimeve të pjesëtarëve të komunitetit serb. Ajo takoi një grup
pjesëtarësh të këtij komuniteti të rikthyer në Kosovë, gjatë një vizite në
kishën e Shën Nikollës në Prishtinë, një nga objektet fetare që është
rindërtuar nga qeveria e Kosovësn pas dëmtimit të saj në trazirat e marsit të
vitit 2004.
Sekretarja Clinton, qëndroi në Prishtinë në kuadër të një turneu në Ballkanin
perëndimor, që synon nxitjen e reformave ekonomike dhe demokratike në rajonin
ende të ngarkuar me tensione etnike.
Të martën ajo qëndroi në Beograd, ku bëri thirrje për vazhdimin e bisedimeve
për normalizimin e marëdhnëieve me Kosovën pa këkruar njohjen e pavarësis së
saj nga Serbia.
Vizita e saj pritet t'u jap një shtytje të re planeve për përshpejtimin e
bisedimeve ndërmjet Kosovës dhe Serbisë vazhdimi i të cilave pritet gjatë
muajit nëntor.
Beogradi refuzon ta njohë Kosovën që nga shpallja e pavarësisë së saj në vitin
2008. Shtetet e Bashkuara dhe shumë prej fuqive evropiane e kanë njohur
pavarësinë e saj ndërsa janë vënë në kërkim të zgjidhjes së situatës në veriun
e Kosovës të banuar me shumicë serbe, ku nuk njihen dhe nuk pranohen
institucionet e Prishtinës.
Diplomatët euro perëndimorë i kanë bërë thirrje Beogradit të heq dorë nga
mbështetja e strukturave paralele serbe në veri.