Protestuesit janë tërhequr edhe nga barrikada dhe bllokimi i rrugëve në aksin
rrugor që lidh Bit Pazarin me Çairin në Shkup.
Policia ka qëndruar në vendin e ngjarjes me përforcime shtesë të njësiteve
speciale. Gazi lotësjellës ka arritur që të shpërndajë protestuesit, të gjitha
rrugët janë zhbllokuar dhe ka nisur normalizimi i situatës.
MPB pritet të informojë me detaje të tjera mbi ngjarjen, duke paralajmëruar se
janë arrestuar disa protestues të rinj dhe se po ndërmerren masa për pastrimin
e terrenit nga dëmet e shkaktuara nga protestat dhe eskalimi i tyre që u
shoqërua me dhunë, demolime dhe incidente. Ndërkohë në këtë zonë nuk ka lëvizje
të lirë dhe se po mbretëron situatë e tensionuar.
Zëdhënësi i MPB-së, Ivo Kotevski ka deklaruar për MIA se disa persona janë
arrestuar, dhe se priten edhe ndalime të tjera nga protestuesit, kryesisht të
rinj.
"Gjatë dhunës dhe protestave janë lënduar dy policë, janë dëmtuar dy makina
policie, si dhe disa shenja komunikacioni dhe stacione urbane të autobusëve.
Por, dëmi më i madh i është shkaktuar makinave private dhe objekteve. Janë
demoluar makina private", ka theksuar Kotevski, duke shtuar se policia akoma
është në terren. (INA)
(Foto: INA)
17:04 - Turma e protestuesve po qëndron në udhëkryqin që lidh Bit Pazarin me
lagjen Çair të Shkupit, ndërsa në afërsi të tyre janë të pranishme edhe forca
të mëdha policore.
Njësitet speciale janë grumbulluar në këtë pjesë të qytetit të banuar me
shumicë shqiptare për të shpërndarë turmat protestuese. Siç mësohet nga gazetari
i agjencisë INA, në këtë zonë i është vënë flaka edhe një autobusi urban, me
ç'rast tërë zona është mbuluar nga tymi. Ardhja e zjarrfikësve është penguar
nga protestuesit, me ç'rast ata janë tërhequr për momentin për shkaqe sigurie.
Zona ku janë protestuesit është mbuluar edhe nga gazi lotsjellës i shpërndarë
nga policia speciale.
14:20 - Dhjetëra të lënduar, demolime dhe revoltë e të rinjëve shqiptarë është
bilanci i protestës së të rinjve shqiptarë sot në Shkup, kundër dhunës së
djeshme të huliganëve maqedonas.
Qindra të rinj shqiptarë shqiptarë sot protestuan nëpër rrugët e Shkupit dhe
para Qeverisë në shenjë proteste kundër dhunës së huliganëve maqedonas.
Protesta ka nisur nga Çarshia e Vjetër duke vijuar më pas para Qeverisë, mirëpo
situata ka eskaluar para Qeverisë kur protestuesit janë përballur me forca të
mëdha policie dhe kordonët e vendosur që blinduan pjesën qendrore të Shkupit
dhe nuk lejuan depërtimin dhe lëvizjen e turmës drejt pjesës qendrore të
Shkupit.
Në një moment të tensionimit të situatës, turmat e protestuesve janë përleshur
me policinë, me ç'rast raportohet për dhjetëra të plagosur nga radhët e
protestuesve, por edhe nga ana e policisë. Në pjesën qendrore të Shkupit janë
regjistruar demolime, dëmtime dhe thyerje të makinave të policisë dhe ato
private.
Policia për shpërndarjen e turmave protestuese ka përdorur gaz lotësjellës,
ndërsa janë arrestuar edhe dhjetëra protestues. Turmat është shpërndarë
drejt Çarshisë së Vjetër në Shkup, ndërsa akoma vazhdon situata të jetë e
tensionuar. Protesta e sotme u organizua në shenjë revolte kundër dhunës së
ushtruar dje nga huliganët maqedonas, ku pati dhjetëra të lënduar dhe rrahur
shqiptarë, përfshirë, fëmijë, gra dhe pleq. (INA)