Në foto: Jam Memaj, pronari i lokalit
Pronari i lokalit në Dajt, ku shfaqen në foto duke drekuar katër drejtues të
lartë të Policisë së Shtetit me të dyshuarin për vrasjen e kryekomisarit Lamaj,
Arben Frroku, rrëfen të vërtetën e drekës. Jak Memaj sqaron se në karrigen ku
shfaqet i ulur Frroku ka qenë i ulur vetë para se të vinte ai dhe ia ka liruar
për të qëndruar sa për një dolli me shefat e Policisë. Në një intervistë për
gazetën "Panorama", Jak Memaj, pronari i lokalit ku është bërë fotografia e publikuar
dy ditë më parë nga mediat, shprehet se Agron Kuliçaj, Tonin Vocaj, Muhamet
Rrumbullaku dhe Nikolin Bala kanë ardhur në lokal në një kohë që biznesmeni
Arben Frroku ndodhej duke drekuar me 4 persona të tjerë para tyre. Sipas tij,
fotoja është shkrepur 2 vjet ose 2 vjet e gjysmë më parë nga vajza e tij.
Gjithashtu, Memaj sqaron se Frroku njihte Vocajn dhe Balën, ndërsa ishte hera e
parë që takonte Kuliçajn dhe Rrumbullakun. Madje, Muhamet Rrumbullakun ishte
hera e parë që e takonte edhe vetë, pasi ai nuk kishte qenë herë të tjera në
lokalin e tij.
Në fotot: Biznesmeni Arben Frroku në një restorant në zonën e Dajtit me: Agron
Kuliçajn, zv.drejtor i Përgjithshëm i Policisë, Tonin Vocajn, drejtor i Krimeve
të Rënda në Polici, Muhamet Rrumbullakun, zv.drejtor i Përgjithshëm për Rendin
dhe Sigurinë Publike
Nikolin Balën, drejtor i Forcave Lëvizëse Operacionale.
Në këmbë pronari i lokalit.
PYETJE: Media ka publikuar një fotografi ku në lokalin tuaj shfaqen duke drekuar bashkë
katër drejtues të lartë të Policisë së Shtetit dhe biznesmeni Arben Frroku, i
cili është i dyshuar për vrasjen e kryekomisarit Dritan Lamaj. E mbani mend se
kur është shkrepur kjo foto?
JAK MEMAJ: Me saktësi nuk e mbaj mend mirë, por mund të them që ka mesatarisht dy apo dy
vjet e gjysmë që është bërë ajo foto. Po të kishin qenë klientë të zakonshëm
nuk do t'i mbaja mend as si fytyra, jo kohën e fotografisë. Po ata i mbaj mend,
se përveçse i kam miq, janë edhe njerëz të respektuar.
PYETJE: Personat që shfaqen në foto kanë qenë bashkë gjatë gjithë kohës? Kanë drekuar
bashkë?
JAK MEMAJ: Jo, jo, nuk kanë qenë bashkë. Kanë ardhur veçmas.
PYETJE: Kush nga ata ka ardhur i pari në lokal?
JAK MEMAJ: Po, Arben Frroku ka qenë para aty. Më vonë kanë ardhur shefat e Policisë.
PYETJE: Me kë ishte ulur Arben Frroku?
JAK MEMAJ: Ka qenë me rreth katër veta, nuk e mbaj mend me saktësi. Me sa kujtoj, ka qenë
edhe një grua me ta. Por e di saktësisht se ku ka qenë ulur Arbeni atë ditë. Ka
qenë në dhomën afër oxhakut që shihni këtu, në hyrjen në anën e djathtë të
lokalit. Ndërsa Tonini me shokët janë ulur te kjo salla e vogël që shihni, që
ka hyrje tjetër dhe është e ndarë nga banaku me sallën ku ishte Arbeni.
PYETJE: Po drejtuesit kur kanë ardhur?
Si orar fiks nuk e mbaj mend, por kanë ardhur në lokal pak kohë pasi ishte ulur
Arbeni me njerëzit e tij.
PYETJE: Ju i njihni personalisht drejtuesit e Policisë që shfaqen në foto?
Patjetër që i njoh. I kam klientë të rregullt, i kam edhe miq. Madje unë jam
ulur në tavolinë me ta. I njoh shumë mirë Toninin, Agronin, Nikolinin.
PYETJE: Edhe Muhamet Rrumbullakun?
Jo. Të them të drejtën Muhamet Rrumbullakun e shihja dhe e takoja për herë të
parë. Ai nuk kishte qenë më përpara në lokalin tim.
PYETJE: Si e kishin krijuar këtë miqësi me ta?
Po zakonisht këtu vijnë më shumë njerëz nga anët e mia. Edhe me ata, duke qenë
se ishim nga një krahinë dhe unë zakonisht këndoj me çifteli, edhe ata në një
farë mënyre hiqnin streset e javës kur vinin këtu.
PYETJE: Ti u ule në tavolinë me ta?
Po, unë kam qenë me ta gjatë gjithë kohës. Unë kam qenë i ulur te karrigia që
në foto është i ulur Arben Frroku. Domethënë në mes Agron Kuliçit dhe Tonin
Vocajt.
PYETJE: Po Arben Frrokun e ftuan në tavolinë, apo erdhi vetë?
Arbeni erdhi vetë aty, nga tavolina ku ishte erdhi aty. I lirova karrigen ku
isha ulur. Madje m'u lut mua që të shkoja te tavolina ku ishte ulur ai dhe
miqtë e tij dhe të këndoja një këngë me çifteli. Dhe unë i thashë që isha i
zënë, sepse isha i ulur me shefat. Ia thashë me shaka.
PYETJE: Me aq sa kuptuat ju, Arben Frroku i njihte të gjithë drejtuesit e Policisë që
ndodheshin në tavolinë?
Njihte Toninin dhe Nikolinin. Ndërsa me dy të tjerët, Agronin dhe Muhametin, me
aq sa pashë unë, e prezantuan këta, pra Tonini dhe Nikolini. Kuptova që nuk i
kishte njohur më përpara as Agron Kuliçajn, as Muhamet Rrumbullakun. I thanë që
është një mik i yni nga Puka dhe unë i lirova vendin Arbenit që të ulej pak
aty.
PYETJE: Po ju ku u ulët?
Unë, sa ka qëndruar Beni aty, kam ndenjur në këmbë. Siç më keni parë edhe në
foto.
PYETJE: Ndenji gjatë në tavolinën e drejtuesve Arben Frroku?
Po, siç duket i shijoi këtu ku ishte, këngët me çifteli, muhabeti dhe iku pak
me vonesë te tavolina e vet. Sa pinë nga një gotë raki. Tani nuk e di
saktësisht se sa ka qëndruar. Më tha mua që të shkoja t'u merrja leje personave
që kishte lënë te tavolina dhe më tha t'u thosha që do vonohej pak dhe mos të
mërziteshin.
PYETJE: Po Arbenin si e kishit njohur?
Si Tonini, Nikolini dhe Agroni që vinin shpesh në lokalin tim, edhe Arbeni
vinte shumë shpesh. Përveçse e kisha klient të rregullt, unë e njihja si
pukjan, e njihja familjarisht.
PYETJE: Cilët ikën të parët nga lokali?
Kanë ikur shefat përpara. Pasi ikën ata, kemi ndenjur me Benin edhe dy orë pas
duke pirë duke kënduar.
PYETJE: Kush e ka shkrepur aparatin për të bërë ato fotografi që u publikuan?
Fotografinë e ka bërë Alma. I thashë unë që të na bënte një fotografi. Madje
fotografitë pastaj ia kam dhënë Toninit dhe kur erdhi një herë tjetër, e pyeta
pse nuk m'i kishte sjellë fotot. Më tha që i kishte hedhur në Facebook. Jo, i
thashë unë, i dua në letër.
Krimet e Rënda, hetim kanosjes së zëvendësit të Lamajt
SMS kërcënuese ndaj Arapit, nga një numër me parapagesë
Mesazhi kërcënues i mbërritur në telefonin e ish-shefit të
Krimeve të Komisariatit Nr. 6, Arianit Arapi, 5 minuta pas vrasjes së Lamajt,
është dërguar nga një numër me parapagesë i blerë në tregun e zi. Numri
rezulton i regjistruar me një emër që nuk i përket personit që ka kryer
kërcënimin. Prokuroria e Krimeve të Rënda ka nisur hetimet për kërcënim ndaj
kryekomisarit Arianit Arapi, me detyrë të mëparshme shef i Krimeve në
Komisariatin e Kombinatit, ndryshe sipas pozicionit që kishte në atë kohë,
vartës i kryekomisarit të vrarë Dritan Lamaj. Ajo që bëhet e ditur momentalisht
nga burime mjaft të rezervuara e konfidenciale, është fakti që mesazhi
paralajmërues për Arapin, që i shprehte qartë se pas vrasjes së Lamajt ishte
radha e tij, rezulton të jetë dërguar nga një numër me parapagesë që nuk është
blerë në dyqanet e kompanive celulare, ku mund të regjistrohej saktësisht.
Pavarësisht se drejtori i Përgjithshëm i Policisë, Hysni Burgaj, konfirmoi dy
ditë më parë kërcënimin e kryekomisarit, vetë Arapi nuk pranoi të komentonte mbi
këtë çështje përveç deklaratës se ndodhet në krye të detyrës si shef i
Komisariatit të Pogradecit.
Nga: ETLEVA DELIA
Flet nga qelia i dyshuari për vrasjen e kryekomisarit
"Dreka jo rastësi, shefat në foto i njoh e i kam miq"
Arben Frroku
Arben Frroku: Pafajësia ime është vula në pasaportë. Kam dëshmi më të forta se
Policia.
Arben Frroku, i dyshuari për vrasjen e kryekomisarit Dritan Lamaj, deklaron se
drejtuesit e Policisë së Shtetit me të cilët është shfaqur në foto kur po
drekonin dy vjet më parë, i njeh dhe i ka miq. Madje, drekën në Dajt ai nuk e
quan të rastësishme, siç pretendojnë drejtuesit që ndodheshin në të njëjtën
tavolinë me të. Në një intervistë që Frroku dha dje për "ABC News" nga qelia në
Policinë e Selanikut, mohoi përfshirjen e tij në vrasjen e Lamajt. Madje
deklaroi se pafajësia e tij është vula e doganës së Kapshticës që ai ka në
pasaportë kur po shkonte në Selanik. Gjithashtu Frroku pretendon se ka edhe
dëshmi që provojnë pafajësinë e tij, që janë më të forta se ato që e akuzojnë.
Kur jeni arrestuar nga policia greke?
Unë jam arrestuar, me orën këtu, rreth orës 3 dhe me orën shqiptare rreth orës
2 të mëngjesit. Kanë qenë të gjitha forcat e Policisë, forcat speciale të
Policisë së Selanikut, me armë të mbushura, që m'i drejtuan.
Ku ishit të momentin që erdhën dhe ju arrestuan?
Unë isha në hotel. Isha në gjumë. Bashkë me një kushëririn tim që kishte dalë
me leje nga këtu dhe djalin e dajës që e kam edhe shofer.
Policia shqiptare ka njoftuar se ju jeni arrestuar në një hotel në Selanik bashkë me Jak Jakun dhe ju janë gjetur armë zjarri dhe lëndë narkotike, kokainë. Si është e vërteta?
Absolutisht asgjë. Nuk kanë gjetur as armë, as kokainë, asgjë. Mua më kanë gjetur në gjumë. Jaku me gjithë Sokolin kanë qenë në një dhomë tjetër. Ndërsa unë kam qenë në dhomë vetëm në momentin e ndalimit dhe nuk kemi pasur as armë, as lëndë narkotike, asgjë. Ato janë llafe nga Policia e Shtetit.
Kur keni kaluar në Greqi, nga cila pikë kufitare?
Unë kam kaluar në Kapshticë, me makinën time. Shofer ka qenë djali i dajës, Jaku, me të gjitha rregullat. Kemi dorëzuar pasaportat, janë vulosur dhe kam kaluar normalisht. Kemi bërë edhe një kontroll të lehtë në doganën greke dhe kemi vazhduar rrugën.
Sa ka qenë ora kur keni kaluar kufirin?
Nuk e mbaj mend me saktësi, por përafërsisht mund të ketë qenë ora 7 ose 8 e darkës.
Po nga Tirana në çfarë ore jeni nisur?
Kam pasur një ndeshje futbolli në Laç me Kamzën, se unë jam presidenti i klubit të Tërbunit. Rreth orës 4 pasdite jemi nisur nga Laçi për të ardhur në Tiranë. Në Tiranë kam mbërritur rreth orës 5 dhe rreth kësaj ore jam nisur për në Selanik.
Cilën rrugë keni përshkuar, keni kaluar nga "Vasil Shanto"?
Jo, fare. Kam kaluar nga "Komuna e Parisit". Unë telefonin e kam Vodafone, jo vetëm unë, por e gjithë kompania ime. Nëpërmjet valëve mund të zbulohet itinerari im, çdo lloj lëvizjeje që kam bërë.
Nga: FLAMUR VEZAJ
(Shkrimin e plote bashke me intervistat i lexoni sot ne Panorama)