Ka ngjallur shumë reagime emisioni i fundit Opinion në TV Klan mbi temën e përgjimeve. "Përgjuesit
tanë publikë u shfaqën në një emision që të fyente inteligjencën për
shkak të spekulimit ordiner me përgjimet, dhe dëshirën për t'iu dukur
pushtetit të ri aleat, për shkak të përgjimeve" shkruan gazetari Mero Baze.
Pasi i quan çifti 2F, A.Frangajn dhe B.Fevziun e TV Klan, Baze tregon një detaj nga 21 Janari:
"Kur protesta mbaroi dhe Berisha po hamendej të vriste, më erdhi
një SMS nga Edi Rama dhe Preç Zogaj njëkohësisht, të cilët mund ta
kishin dërguar në kohë të ndryshme, por telefonat ishin bllokuar. Më
pyesnin se çfarë po ndodhte para dyerve të Kryeministrisë, meqë unë po
rrija bashkë me kolegët e mi tek "Kullat Binjake" përballë derës. U
ktheva përgjigje me humor të zi, duke u thënë se njerëzit po largohen
prandaj "dërgoni dikë t'i bëjë shurrën tek dera e Kryeministrisë dhe
ikni". Ky ishte pak a shumë teksti i shkruar. Disa javë më vonë, Fatos
Lubonja, i cili për shkak të punës i duhet të rrijë në mjediset e TV
Klanit, bëri një shkrim ku akuzonte Edi Ramën për 21 Janarin, duke e
akuzuar se mori mendtë e atyre që e këshillonin "të bënin shurrën tek
dera e Kryeministrisë". Megjithë kontekstin banal ku e kishte përdorur,
më duhet të them që unë nuk e kisha bërë publike SMS-në. Nga e dinte
Fatos Lubonja çfarë kisha komunikuar unë me SMS me Ramën? Vetë Lubonja
është tipi i publicistit që ka neveri për shërbimet sekrete. E vërteta
ishte se SMS ishte përmendur në mjediset e TV Klanit, d.m.th që përveçse
ishte përgjuar Rama, ose unë, ajo dhe ishte qarkulluar nga përgjuesit
dhe shantazhuesit publik të regjimit. Kjo më gëzoi shumë, se të paktën
kishte mbërritur mesazhi tek Berisha, por më trishton tani kur shikoj që
përgjuesit tanë publik dhe denoncuesit tanë, bëjnë rolin e viktimës së
të përgjuarit shkruan Baze.
Publicisti i njohur që drejton faqen popullore online TemA, i akuzon
drejtuesit e Tv Klanit si "spiunë publik të regjimit të Berishës, që
frikësonin shoqërinë në emër të pushtetit dhe abuzonin me të".
"Një kështjellë e pakonkurueshme e përgjuesve publik të regjimit
kanë qenë gazetarët dhe drejtuesit e TV Klanit. Mes tyre, më të shquarit
kanë qenë çifti "2F", Fevziu-Fragaj. Frangaj ishte ai që mbante nën
terror çdo menaxher reklamash apo kompani që guxonte të çonte një
reklamë tek TemA, Dita apo për një farë kohe dhe tek Top Channel. Çifti
"2F" ishin ata që denonconin kush ministër i foli kujt gazetari armik,
apo ku u pa duke pirë kafe.... Këta ishin ata që i mbushnin mendjen se
Sokol Olldashi komunikonte me mua apo dikë tjetër nga media kritike
kundër Berishës (çka nuk ishte as e vërtetë), për t'u dukur të
rëndësishëm pranë tij. Këta ishin përgjuesit publik të regjimit, ata që e
përdornin pushtetin e frikshëm të Sali Berishës për përfitme personale,
për të terrorizuar drejtorët e kthimit të pronave që kanë rrëshqitur
hartat e pronave nga Kodrat e Manzës, në bregdet në Gji të Lalzit, që
kanë kthyer qindra hektarë tokë të diskutueshme në Farkë dhe Dajt..." shkruan Baze.
Një debat më vete ka hapur në rrjetet sociale fakti që dy nga të
ftuarit e emisionit të sipërcituar kanë qenë vetë të lidhur me
ish-Sigurimin famëkeq të para "˜90-s. Artan Hoxha dhe Preç Zogaj, të dy
kanë bërë më herët nga një rrëfim publik ku kanë pranuar bashkëpunimin
me ish-Sigurimin.
Edhe deputeti socialist, Erion Braçe, ka reaguar mbi të njëjtin emision "Opinion" duke shkruar në FB:
"Nga gazetat po mësoj për emisionin mbi përgjimet të B.F dje. Dua
t'u them dy gjëra: E para, lista e të përgjuarve jo vetëm që nuk është e
plotë, por edhe nuk është e saktë. Është i painformuar apo ka zgjedhur
të jetë politikisht i rremë, këtë nuk e di, por është zgjedhje e tij.
Natyrisht, zgjedhje në funksion të alibisë së poshtër që paska patur i
gjithe emisioni. E dyta, alibia se "kundërshtarët e Berishës nuk janë
përgjuar, por ata kanë folur me kriminelë që janë në përgjim", është më e
ndyrë se vetë përgjimi..."
Lidhur me përgjimet e SHISH, detaje nga të cilat DITA publikoi dy
javë më parë dhe pjesa tjetër e medias iu bashkua këtij denoncimi së
fundmi, ka shkruar edhe gazetari i njohur Lorenc Vangjeli.
Në numrin e kësaj të shtune të së përjavshmes JAVA, ai flet për një
personazh enigmatik afër Berishës të përgjuar gjithashtu, por nuk e
zbulon identitetin e tij.
Shkruan Vangjeli: "...Skandali i SHISH ka dhe një surprizë pothuaj
të pabesueshme: në listën e emrave të përgjuar nga SHISH është dhe një
individ shumë i njohur në Tiranë për shkak të marrëdhënies së tij të
veçantë me ish-kryeministrin Berisha".
Veç tij Berisha ka përgjuar edhe një nga besnikët e tij më të zëshëm,
ish-zëvendësdrejtorin e përgjithshëm i policisë Agron Kuliçaj. Vangjeli
shkruan gjithashtu se nga 20 biznesmenët më të mëdhenj të vendit, 6
janë përgjuar.dita