Voal-online -Dikur të mbajtur larg syve të botës, fëmijët e të ndjerit Michael Jackson janë bërë sensacione të Internetit, pasi videot amatoriale të dy prej tre fëmijëve të tij, duke luajtur para kamerave, përfunduan në YouTube.
Jackson, i cili vdiq 50 vjeç qershorin e shkuar nga një mbidozë barnash tejet të fuqishme, bëri gjithçka për t'i ruajtur nga mediat fëmijët e tij Prince Michael, 13 vjeç, Paris, 12, dhe Prince Michael II, 8, madje edhe duke ua mbuluar fytyrat atyre.
Por në më pak se një vit pas vdekjes së tij, dy më vegjlit - herën e fundit të parë në publik në ceremoninë e çmimeve Grammy në janar - janë vënë në qendër të vëmendjes pasi videoklipet e Paris dhe Prince Michael II qarkulluan në Internet.
Gjyshi i tyre Joe Jackson i tregoi uebsajtit të famozëve Popeater se familja është e tronditur nga rrjedhja e materialeve, duke pasur parasysh dëshirën e Michael Jackson për t'i pasur fëmijët e tij jashtë vëmendjes së publikut.
Ai konfirmoi se nuk i kishin dërguar fëmijët në internet videot e tyre. Pronari i uebsajtit frëngjisht të fansave KingofPop-Kids.com, i cili postoi shumë nga videoklipet, tha se fansat e Jackson janë përgjegjës që kanë hakuar në filmimet e familjes së këngëtarit.
"Ne nuk e dimë se kush është hakeri (hacker) por jemi duke u përpjekur ta gjejmë," tha Joe Jackson për Popeater.
CNN tha se videot ishin në Internet dy javë rresht në prill para se anëtarët më të vjetër të familjes Jackson e kanë kuptuar dhe i kanë hequr ato, por ndërkohë të tjerë përdorues të YouTube kishin bërë kopje dhe i kishin publikuar ato, duke tërhequr qindra mijë shikues.
Telefonatat në familjen Jackson nuk patën përgjigje.
Videoklipet i tregojnë dy fëmijët më të vegjël duke bërë çapkënëritë e njohura fëminore si të gjithë në moshën e tyre. Në një klip në YouTube, Paris reciton para kamerës, ndërsa në një tjetër shkon mu ngjitur kamerës dhe thotë: "Majmun, të lutem më ndihmo."
Prince Michael II, i njohur edhe si Blanket, është parë me kushëririn e tij Donte në disa videokliüe, duke imituar skena nga "Star Wars" dhe duke kënduar.
Videot janë mirseardhur nga disa adhurues.
"Unë mendoj se është mrekulli të shohësh Prince Michael II të lumtur. Ai po luan lojëra normale të cilët i luajnë fëmijët normalë," thoshte një koment në Internet postuar nga "Judyr"./Elida Buçpapaj
(http://www.reuters.com)