BRAZDAT E JETES Shqipërime poetike nga SINAN KËRPAÇI
E Shtunë, 07.12.2014, 03:53pm (GMT+1)
SINAN KËRPAÇI
Angela Goodwin
USHTAR
Ka disiplinë brenda ushtarit, është te hapi kur e troket, Ka ndershmëri brenda ushtarit, mund ta dëgjosh kur flet, Ka guxim brenda ushtarit, te sytë mirë ia dallon, Ka besnikëri brenda ushtarit që ai nuk e tadhton, Ka diçka brenda ushtarit, e mban si të veçuar, Ka një forcë brenda ushtarit nga zemra farkëtuar, Ushtari nuk është një titull që çdokush mund ta paguaj, Ushtari është shpirti njerëzor në thellësinë tuaj, S`mbaron puna e tij në 8 orë, 40, apo më shumë, Ushtari është përherë ushtar, madje edhe në gjumë, Ushtari i shërben sëpari atdheut, jetën e sposton mbrapa, E çka në mendje një civil ai e ndjek me hapa. Po je një civil pa ta thënë këtë nuk do të rri: Sa ta takosh ushtarin ia thuaj se ç`bën ai për ty, Ushtari është arsyeja që themi "Tokë e Lirë". Ushtari është ai që ne na mbron kaq mirë. Nëse jeni një ushtar këtë po ju them ju: Faleminderit Zot për çdo ushtar dhe gjithçka bën këtu!
Walt Whitman ( 1819-1892)
O KAPITEN, KAPITENI IM!
O Kapiten, Kapiteni im, udhëtimi i mundimshëm u krye, Anija triumfoi përmbi valë, çfarë deshëm u shpërblye. Portin e shikoj, kambanat i dëgjoj, gjithë populli feston, Me sy e ndjek kiçin, anijen guximtare. O zemër, zemër, zemër Gjak më pikon, s`je hekur Kur në kuvertë Kapiteni shtrihet Pa jetë, pa puls, i vdekur!
Pa ngrihu Kapiten, pa ngrihu, kambanat i dëgjo, Brof nga vendi, flamuri po valëvitet, trumbeta për ty bie, Për ty buqetat dhe kurorat, për ty dhe bregu plot, Për ty thërrasin, të ndjekin me vështrim. O Kapiten, o Prijësi im, o At, Me krahun jastëk të kam prekur, Ëndërr më duket që në kuvertë Ti je i ftohtë, i vdekur.
O Ati im, pse s`më përgjigjesh, pse goja nuk të flet, O Prijësi im, krahun s`ma ndjen, s`ke puls dhe as vullnet!? Anija hedh spirancën, misioni i lartë u krye, Nga udhëtimi i mundimshëm anija Kapiten, sa madhërishëm Afrohet me fitore. Gjëmoni , o brigje, ju këmbana bini, Unë numëroj hapat në kuvertë Plot dhimbje ku Ai rri shtrirë I ftohtë dhe pa jetë!
( Poezia është shkruar në nderim të presidentit amerikan A. Lincoln.)
Billy Collins
TË VDEKURIT
Thonë se të vdekurit na shikojnë nga parajsa. Ndërsa ne veshim këpucët e përgatisim një sanduiç ata na vështrojnë nga varkat trasparente të parajsës teksa vozisin me ngadalë nëpër përjetësi.
Vështrojnë kryet tona si lëvizin në planetin Tokë, dhe kur shtrihemi në një livadh apo divan të dehur pak nga rrëmuja e mbasdites së gjatë u duket sikur i ndjekim me një vështrim që i bën të ndalojnë lopatat, të bien në heshtje, të presin si prindër sa të na zërë gjumi.
Joe Wenderoth
JETA IME
Sidoqoftë ajo u gjend në dhomën time. E gjeta atje, ishte si e zënë në grackë. S`ishte asgjë më shumë se një kafshë e trembur. Që nga ai çast e ngrita lart. E ruajta për vete, e mbajta në dhomën time, u kujdesa për të mirën e saj. E quajta kafshën "Jeta Ime". I sigurova ushqim dhe i dhashë të hajë me këto duar. E lashë në shtratin tim të frymonte në gjumin tim. Dhe kafsha, brenda dashurisë time, kujdesit të pandryshuar u rrit e fuqishme dhe e aftë për gracka dinake. Një ditë, s`ka shumë kohë, po shëtisja dorën në kurrizin e kafshës dhe arrita në bindjen se ajo fare lehtësisht mund të më vriste mua. Po ajo prandaj jeton, prandaj edhe e ngrita lart. Që nga ai çast nuk kam ditur ç`të bëj me të. Ndalova së ushqyeri atë vetëm për të kuptuar që rritja e saj nuk ka të bëjë fare me të ngrënit. Nuk e pastrova më dhe pashë që ajo pastron veten. E pushova këngën për ta vënë në gjumë dhe pashë që e zë gjumi më shpejt pa këngën time. Nuk di ç`të bëj. Nuk vazhdoj t`i krijoj mundësi "Jetës Time" për gracka. E lashë kafshën vetëm dhe tani ajo më lë vetëm mua gjithashtu. Nuk kam asgjë për të thënë, asgjë për të bërë. Midis "Jetës Time" dhe mua një heshtje po vjen. E bashkë nuk jemi në këtë heshtje.
Jack Prelutsky ( 1940 - )
GËZOHU QË HUNDËN E KE NË FYTYRË
Gëzohu që hundën ti e ke në fytyrë dhe jo të ngjitur atje ku s`rri mirë, se po të ishte në vendin ku s`ka punë me hundën do mërziteshe shumë.
Sikur mos ta kishe hundën ku e ke, sanduiç midis gishtave të këmbës të qe kënaqësi s`do të ishte ndonjëherë që këmbëve 24 orë t`u merrje erë.
Kjo hunda jetën si do t`ua nxinte sikur në majë të kokës këmbëkryq të rrinte, kënaqësia do të ishte krejt e huaj kur qimet të gudulisnin hundën tuaj.
Sikur brenda veshit hunda të qe eja merre vesh cdo të bëhej atje, në çastin që teshtima do dilte e thellë ai veshi juaj do ushtonte si shpellë.
Por hunda rri ku është elegante vërtet, rri e nuk luan nga vendi i vet, në tjetër vend ajo nuk rri mirë: gëzohu , o fatlum që e ke në fytyrë!
Pablo Neruda (poet nobelist)
KËTU TË DUA
Në pishnajën e errët era rend pa fre. Hëna vezullon fosforeshente ujërave që rrjedhin. Ditët, po ato, ndjekin njërq-tjetrën.
Dëbora sillet rrotull në flutura vallëzimi. Një pulëbardhë e praruar rrëshqet nga perëndimi. Ndonjëherë një vel. Yje, yje të largët. Oh, kryq i zi anijeje! I vetmuar.
Ndonjëherë ngrihem herët dhe shpirti im kullon. Larg deti oshëtin përsëri e përsëri. Ja një port.
Këtu të dua. Këtu të dua dhe horizonti më kot të fsheh. Midis këtyre gjërave të ftohta ende të dua. Ndonjëherë puthjet e mia ju shkojnë pas anijeve të rënda Që çajnë detin pa mbërritur kund. Shikoj veten të braktisur si këto spiranca të vjetra.
Kalatat trishtohen kur mbasditja lidh varkat atje. Jeta ime bëhet e lodhshme, e uritur për një motiv. Të dua e s`të kam. Ç`je kaq larg! Neveria ime ndeshet me mugëtirat zvarritëse. Por ja, vjen nata dhe më këndojnë yjet.
Hëna e rrotullon ëndrrën e pagjumë. Yjet më të mëdhenj më vështrojnë me sytë e tu. E ndërsa të dashuroj pishat brenda erës Shushurijnë emrin tënd me gjethe halësh.
William E. Stafford
BRAZDAT E JETËS
Rrudhat na rrëfejnë si ishte, si rrodhi koha, dhe si ndodhi sërishmi e sërishmi. Ato na tregojnë si jeta të merr në vorbullën e saj dhe të gëzohet si një mik.
Çdo plagë është plagë lufte. Në kishë një grua i zbulon fytyrën diellit e ne mund të lexojmë mençurinë e shkruar: shfletohet jeta në atë libër, shpalosen brengat që nuk mund t`i shprehin dot as psalmet.
Radhë fëmijësh ngrenë fytyrat e shpresës vendeve ku brazdat e jetës do bëjnë fole.
Robert Creeley
OH JO
Nëse ju do rropateni shumë larg do të vini te një çast i ndjerë dhe sapo të shfaqeni atje do ta keni një vend si dhe të tjerë
për t`u rehatuar në një karrige rrethuar me buzëqeshje ironike, me forma plastike në trajta fytyre që ashtu si ti ruajnë vendet e tyre.
Robert Pinsky
KËNGË SAMURAI
Kur nuk kisha çati bëra Guximin çatinë time. Kur nuk Kisha darkë darkova sytë e mi.
Kur nuk kisha sy unë dëgjova. Kur nuk kisha veshë unë mendova. Kur nuk kisha mendim unë prita.
Kur nuk kisha baba bëra Kujdesin babain tim. Kur nuk kisha Nënë përqafova rregullin.
Kur s`e kisha një mik bëra Heshtjen mikun tim. Kur nuk kisha Armik u ballafaqova me kurmin tim.
Kur nuk kisha faltore bëra zërin tim Faltoren time. Nuk e kam një Prift, gjuha ime është kori im.
Kur nuk kam asnjë mundësi Fati është mundësia ime. Kur mos Të kem asgjë vdekja do të jetë fati im.
Nevoja është taktika ime, pavarësia Është strategjia ime. Kur s`e kisha Një të dashur ju fala gjumit.
Shqipëroi: SINAN KËRPAÇI
|