AI LUM KURRË S'MA PRISHI GJUMIN Cikël poetik nga PATRIK SADIKAJ
E Djelë, 11.23.2014, 11:29am (GMT+1)
GURGULLIMA E ËNDERRAVE
Një lum i vogël poshtë shtëpisë atje në fshat ma gurgullinte ëndrrën e vogëlisë shprestare Tani jam rritur, e ëndrrat gurgullima e jetës i ka hedhur, në atë lumë që kurrë s'ma prishi gjumin...
MIRAZH
U shkërmoqën dallgët në shkretëtirën tartare U kthyen në një pikë pa formë, uji të avullt Dielli, nuk e pa dot pasyqrimin sy më sy Po ç'them unë kështu? det në shkretëtirë! Eh, duhet të kem parë thjeshtë një mirazh
FRIKË
Shtëpia ime është aty ku gozhda ngulet për të varur hartën... e kam të lehtë ta gjej strehën time, e kam pasur gjithmonë kollaj Pork am pasur gjithmonë Frikën se mos dikush e tërheq hartën e brishtë dhe gozhda e vrazhdë të ma shqyejë vendlindjen
MËNGJES...
Është qetësi, po kush foli? Kush lajmin sonte e la jetim? Natës kush ia theu qafën e hënën e ndau më dysh? Yjet ku shkuan pse u fikën, A mos ndoshta drita u nxi? Nga doli zëri që kob mbolli? Pse qiriu tymaxhi u shkim? Ndali ora, nata sytë i mbylli heshtje varri, veç gjumë ka Nata iku e theu qafën e zezë, por dielli mbi male nuk u pa
UNË DHE MALI
Jam i mërzitur... s'kam pse e fsheh më dhëmb zëmra nuk e shmang dot padrejtësia më vret ma merr shpirtin po prapë s'kam fuqi s'kam bre një grusht që t'i bie malit fort ta shemb përtokë ta shkel nën këmbë ta pështyj në surrat ta ha me dru e dhe dua ta shkul prej toke ta kthej në mal pa fe jam bre i mërzitur po malit skam ç'ti bëj është më i forte ai me mua bën si trim më thotë hapur atë që dhe vetë e di mire: "Ti nuk ekziston, je hiç" Hijerëndë shkel syrin plot shpërfillje të forti plot tallje prej pushteti më nënshtron, më mbyt më kthen gurë pa dhe ai më ha, më përpinë e unë s'kam ç'ti bëj eh! ka të drejtë mali unë popull, ai shtet unë hiç. ai gjithçka i forti fiton gjithmonë po të fortë e bëme NE
MALOK QYTETAR (Unë jam Gegë)
Shpesh herë nën zë miqtë, malok më thonë kafshojnë gjuhën se unë mos i dëgjoj mendimin Nuk e thonë me gojë por me mendje Eh! Kjo ma shton hidhërimin... Malok! Pse jo djalë malsie, se dreqi e marrtë! Unë gegë jam e s'kam frikë ta them Unë prej bukurive të maleve jam e do jem Por njeri si gjithë të tjerët dhe unë jam Ani bre ska asgjë se nuk u rrita në qytet Prej maleve erdha vetë e ia dola po besa, vetë Madje atyre që malok më thonë shumë shpesh Dal e u tregoj rrugët e pluhrosura Në kët qytet
FËMIJËVE TË Mi (Do e kuptojnë kur të jenë prind si unë)
Ndjej një dëshirë që se përmbaj dot Është si flaka e zjarrit që s'fiket kurrë Mjaltimi që s'ma jep as mjalti vetë Frymëmarrja që s'ja vodha as malit Ledhatimi më i latuar se ai i zanës Sytë më të ndritur se të shqiponjës I shoh tek rriten e me ta nuk ngihem Është si sofra që nuk zbrazet kurrë Ujë në buzë, e mua prap më pihet Diell mëngjesi që natën ma ndrit Kjo është lumturia kur bëhesh prind Eh pra unë jam tre herë prind sot Shumzojeni të gjithë ndjesitë me tre Besojeni miq, i lumturi jetoj si prind
SHPRESË DIMËRORE
Uuu. mëngjes i hershëm dimëror, akull I ftohtë Sytë ndizen xixë menjëherë nga uji dëborë Është dimër, kohë e ftohtë shumë, është acar Dhoma nuk është më e nxehtë se dimri Dhe këmbët më pak të ngrira se hardhia Është dimër, normalisht kam veç ftohtë Vishem hollë, me një cipë vese që të pret Po dal, po për ku se punë s'ka t'më presë Po dal se nuk rri do në shtëpinë e akullt Mbase dimri e akulli më japin pak Shpresë
BISEDË ME VAJZËN
Çfarë lodhje sot, - u ankova në shpi Më dëgjoi vajza ime që gati më rri Ja lexova në sy shqetësimin njomëzak Pata frikë se mos mbushej në vaj Unë i qesha ngadalë për ta qetësuar Sytë më tradhtuan, s'ka për të më kuptuar buzët e saj diçka mërmëritën nën zë Duart e saj ndryshe ledhatuan të mijat Është 10 vjeçe por unë e kam si shoqe Nuk i mbaj të fsheta, sekrete a të vërteta Është ëngjëlli im me motrën e të vëllanë Për ta jetoj, për ta punoj ditë dhe natë E ndjeva si borxh t'i them të vërtetën E dashur bijë, babai ska gjë, e ka me jetën E ka ajo fajin, ne thjesht rob të saj jemi Që të rriteni ju pa halle me të lufte kemi më pa gjatë me sytë e pafaj gati në lot më theri fort trishtimi i saj plot shkëlqim Por prej syve pashë shpresë, gjeta shpëtim
LIRIA QË I VRASIM VETES
Duam liri! E duam dmosdo! Po çfarë duam? Liri pra! Ajër pa kufij Ç'farë do të thotë kjo? Liri, more liri! Po cilën liri duam? Atë që vetës ia mohojmë Ta vrasim frikën që na vret Dëshpërimin që na mbyt Vobektësinë që na gjunjëzon Liri pra, liri Jo lirinë që s'na e japin të tjerët Lirinë që vetës ia burgosim në frikë Atë frymëmarrjen e thellë Sa oqeani i pafund Deri ne fund të qiellit që s'ka formë S'ka cak as mbarim Ta mundim veten Ta bëjmë një hiç frikën Dëshpërimin, varfërinë Të fitojmë luftën me veten Ta nënshtrojmë ndrydhjen e shpirtit Ta lëshojmë të lirë në fluturim
LIBRI I JETËS
Titulli më ndolli Hyrja më tërhoqi Fletët e para më gëzuan Faqet e mesit më lodhën Kapitulli i fundit një mundim Te faqja e fundit u dëshpërova Mbylla kapakun Nuk lexova më
SHIU I SHPIRTIT
Është kohë e bukur Jashtë bie vetëm shi Pikat e ujit mbi tjegulla Me ndezin një zjarrmi Pikat e lotit lagin shpirtin E në zemër bëhen hi Une gjethet e zgërlaqura çaj i bëj mali I bëj për ty bien pikat e shkreta, bien në tjegulla kërcasin fort lotët si rrëke rrjedhin shpirtin e mbytin në vetmi si lum zëmërimi në zemër thahen lumenjtë e zemërimit gjethët shqyehen nga pemët në gotë kam vetëm çajin e zi është kohë e bukur jashtë por në boshllëkun tim ka shi...
PASQYRA E PLAKJES
Ndonjëherë, jo gjithmonë, mendoj! Ulur diku në cep të dhomës gri... Me muzikën e lojrave të fëmijëve si muza të mendimit tim në vesh Ndonjëherë e kam menduar vërtet Si do jem kur mosha të më rrekejë? Kur të mos jem më ky që jam sot I mbyll sytë dhe rrudhat imagjinoj Një shkop të vyshkur në dorë dhe ca këmbë të dehura krah tij shoh Të gjitha detajet më vijnë në mend Por jo imazhi që do kem i plakur krejt Sytë futur thellë ndër minierat e jetës, buzët e rrudhura që shurbin kafenë A thua se një lumë kalon ndër to? Një pikturë dot vetes nuk ia bëj jo Si do jem kur ora të më vijë të shkoj...
OPTIMIST DERI NË PESIMIZËM
Më akuzojnë se jam pesimist Që jetën e shoh errët sterrë Në fakt ata që këndojnë poezitë e mia ndoshta se kanë kuptuar pesimizmi nuk është një teori Nuk keni aspak të drejtë more Mbase tek unë s'keni besim Unë jam optimist i lindur Jam më shumë seç duhet Optimist deri në pesimizëm Kjo e ngatërron pak punën
NATYRË E QETË...
Monopatet përplasen ndër fusha Si dashnorë të urryer ëmbëlsisht Dielli thyhet në rrezet e tij Si armiqtë ndër beteja Toka ia përplas në fytyrë gurët dallgëve Deti shkëmbin bën copë e çikë Nata, ditës i jep dritë Ajri i pafundësisë na mbetet në fyt Si hala e peshkut lejlekut Mishi i drenushës së bukur në dhëmbet e luanit njerëzit, jo si kafshët në fyt halë kanë njëri-tjetrin
HIJE
Një pellg i pisët me sy ia bëntë diellit Rrezes si pasqyrë, nuk donte t'i shërbente Dielli rrugën pa fund, indiferent vazhdoi Në mes pellgut la veç hijen time të lodhur Nuk më pëlqeu pasqyrimi plot me baltë E një shkelm pellgut, me inat ia dhashë Pellgu qeshi me hijen time, po me inat Nuk e tha, por e dëgjova kur më përshau Vazhdo rrugën, ik qyqar i ngratë plot baltë
ERMITI I HARRUAR
Jam eremit! - thashë gati me zë Por prapë gojën, vetes ia mbylla Po ç'ermit zeza unë i shkreti njeri Unë as qytetarë nuk u bëra dot! Po zëri më kapi sërisht për fyti Dua të jem zëri i një eremiti! Kështu më mbyti, kështu më tha Eh more zë i shkretë, zë qyqar Iu përgjigja unë gati në të qarë Eremit nuk bëhet dot një shqiptar Ne jemi, të tillë kemi lindur dikur Por rrugës ne harruam cdo gjë Harruam se jemi popull, jo turmë
FLETA E FUNDIT
Thonë se Jeta është një libër me shumë fletë herë herë me shumë pak Ashtu është, e bukur... e thartë dhe e ëmbël... e hidhur dhe pa kuptim... e zezë si shkronjat e librit e bardhë si fleta e letrës është një libër që duke e jetuar shkojmë pa e kuptuar te faqja e fundit
NATË DASHURIE
Është mesnatë, shtrirë i vdekur pa gjumë në sy me puthje ngrirë atë puthjen tëndë dhuratë lamtumire përvijuar në buzë buza jote akull me ftoh, më ngrin më vdes ngadalë është mesnatë puthja më gërvisht buzët e gjakosura gjumë nuk kam ti më s'më ngroh unë vetëm fare ti nuk e di se si është natë pis e zezë, pa fund unë jam vetëm ti veç lamtumirë
LOTET E SHPIRTIT
Ca pika shiu ranë vrik ndër duar Të nxehtë si dhimbja që lëshuan Në sy nuk kishte asnjë pikë uji Lotët kishin dalë nga shpirti S'më njomën, më dogjën
PATRIK SADIKAJ
|