VOAL - Online Zëri i Shqiptarëve - Izrael: Manovër e paparë alarmi në të gjithë vendin

Izraeli do të organizojë duke filluar nga e diela një manovër alarmi në të gjithë territorin, me një shtrirje të paprecedent, duke simuluar sulme me raketa, bombardime ajrore masive dhe katastrofa natyrore.
     Manovra, që do të vazhdojë për pesë ditë, pritet të testojë kapacitetet e vendit për t'iu përgjigjur sulmeve të mundshme me raketa nga Libani dhe Rripi i Gazës dhe raketave të hedhura nga Irani apo Siria, i deklaroi AFP-së zëdhënësi i Ministrisë së Mbrojtjes, Shlomo Dror.
     Këto sulme, të tipit konvencional, kimik apo bakteriologjik, do të kishin në objektiv qendra të mëdha urbane.
    Manovra do ta arrijë kulmin të martën e ardhshme kur sirenat do të bien në të gjithë vendin për të njoftuar për një sulm të afërt ajror, duke i bërë thirrje popullsisë të hyjë në vendstrehime në një kohë rekord, që nuk duhet t'i kalojë tre minutat.
     Kjo manovër, e koduar "Turning point 3", do të bëjë të mundur gjithashtu të vihet në provë gadishmëria e shërbimeve të sigurisë në raste tërmetesh dhe epidemish.
     Qeveria izraelite do të simulojë mbledhje të kabinetit gjatë të cilave ministrat duhet të marrin vendime përballë skenarëve të tillë.
     "Do të simulojmë një skenar katastrofik sulmesh kundër Izraelit në të gjiha frontet dhe me mjete të ndryshme", shtoi Dror. Megjithatë, ai theksoi se një "skenar i tillë është mjaft i mundshëm".//ATSH-AFP/