Këshilli i Përgjithshëm i Lëvizjes Vetëvendosje, ashtu siç
kishte paralajmëruar, shpalli sot rezultatet zyrtare të zgjedhjeve të
brendshme për kryetar të saj, si dhe rezultatet për ndryshimin statutor.
Në emër të Komisionit të Përgjithshëm Zgjedhor, Hysen Durmishi shpalli se:
Rezultati për ndryshimin statutor, i cili i jep kompetencë Këshillit
të Përgjithshëm që të vendosë për koalicionet në nivel lokal është:
Për: 87.57%, kundër: 9.07%, abstenim: 3.00% dhe të pavlefshme: 0.35%.
Sipas këtij rezultati miratohet ndryshimi i statutit.
Ndërkaq, rezultati zyrtar i zgjedhjeve për kryetar të Lëvizjes Vetëvendosje është:
Për: 96.42%, kundër: 1.88% , abstenim: 1.32% dhe të pavlefshme: 0.37%.
Në bazë të këtij rezultati, Visar Ymeri u shpall zyrtarisht kryetar i Lëvizjes Vetëvendosje.
***
Albin Kurti: Uniteti ynë, çdo pengesë e bën vështirësi, çdo vështirësi e bën sfidë dhe me unitet çdo sfidë e tejkalojmë
Pas shpalljes së rezultateve definitive të votave për kryetarin e
Lëvizjes Vetëvendosje dhe për ndryshimet statusore, Albin Kurti, kryetar
i deritashëm i saj, para Këshillit të Përgjithshëm të Lëvizjes u shpreh
se bashkë me kryetarin e ri dhe Kryesinë e re, ne jemi të Kosovës e të
kombit shqiptar, ne jemi të Republikës e të popullit, ne jemi të lirisë e
të barazisë, ne jemi të shoqërisë e të drejtësisë, kurse ardhmëria
është e jona.
Në mandatin e kaluar unë kam pasur nderin, kënaqësinë dhe privilegjin
që si kryetar i Vetëvendosjes të punoj bashkë me të gjithë juve dhe me
secilin prej jush, në mbledhje të shpeshta të Këshillit të Përgjithshëm,
të cilat mesatarisht janë mbajtur pothuajse çdo dy muaj. Unë nuk di
asnjë subjekt tjetër në Kosovë, madje në asnjë periudhëkohore, madje jo
vetëm në Kosovë, që kaq shpesh i ka mbajtur mbledhjet e Këshillit të
Përgjithshëm, pra mbledhjet e organit më të lartë të një subjekti
politik e demokratik.
Pikërisht ky sinqeritet dhe seriozitet në Këshillin tonë të
Përgjithshëm ka qenë garancion i demokracisë së brendshme në pjesëmarrje
e në vendimmarrje, i thellësisë politike në koncept e në program, i
aktiviteteve të pareshtura kudo në Kosovë, edhe jashtë Kosovës, edhe
brenda Kuvendit.
Ju falënderohem nga zemra, iu përulem me respekt, për respektin e
përzemërt që keni treguar ndaj meje si kryetar. Ju falënderohem për të
gjitha diskutimet e shqyrtimet e veçanta drejt secilit qëndrim e vendim
të përbashkët. Në mandatin e kaluar kam qenë edhe përballë Këshillit,
edhe në Këshill, edhe me Këshillin.
Tash do të jem edhe në Këshill, edhe me Këshillin, dhe, si gjithmonë, për Lëvizjen.
Me këtë rast më lejoni të falënderoj në veçanti delegatët e Këshillit
të Përgjithshëm nga Qendrat tona në Mërgatë, të cilët për mbledhjet
tona të përbashkëta zakonisht vinin enkas në Kosovë dhe gjithnjë me
shpenzime vetjake. Në përgjithësi, në Kosovë e më gjerë, nuk kanë mbetur
më organizata vullnetarësh sikurse kjo e aktivistëve të Lëvizjes
Vetëvendosje. Të tjerët, partitë e tyre i kanë vende pune dhe byro për
vende pune në institucione. Lëvizja jonë është lëvizje e vullnetit
prandaj organizata jonë është organizatë e vullnetarëve. Ne jemi vënë në
lëvizje nga ideja e vetëvendosjes dhe e kemi bërë këtë ide një lëvizje
që gjithmonë do t'i shërbejë popullit tonë për të vendosur vetë.
E, megjithatë, secili prej nesh, pavarësisht vetëmohimit e
sakrificave, pavarësisht angazhimit e kontributit, ka përfituar më shumë
prej Lëvizjes Vetëvendosje sesa që Lëvizja ka përfituar prej nesh veç̧ e
veç̧. Secili nga ne jemi rritur e jemi ngritur në Lëvizje e nëpërmjet
Lëvizjes, me njëri-tjetrin e midis të gjithë neve. Lëvizja është shumë
më e madhe sesa çdonjëri prej nesh, Lëvizja është më e madhe edhe sesa
të gjithë ne së bashku, prandaj të gjithë ne bashkë, prandaj secili me
njëri-tjetrin, duhet të lëvizim edhe shumë, edhe gjatë, edhe drejtë,
edhe mirë, edhe pandalshëm, përpara!
Dhe, nuk kam dyshim se do t'ia dalim. Ky Këshill i Përgjithshëm edhe
ma ftoh mendjen, edhe ma ngroh zemrën. Bashkë me kryetarin e ri dhe
Kryesinë e re, ne jemi të Kosovës e të kombit shqiptar, ne jemi të
Republikës e të popullit, ne jemi të lirisë e të barazisë, ne jemi të
shoqërisë e të drejtësisë, kurse ardhmëria është e jona. Uniteti ynë,
çdo pengesë e bën vështirësi, çdo vështirësi e bën sfidë dhe me unitet
çdo sfidë e tejkalojmë.
***
Visar Ymeri: Vetëvendosje do të jetë bashkë me qytetarin kudo ku ka padrejtësi
Duke iu drejtuar anëtarëve të Këshillit të Përgjithshëm të Lëvizjes
Vetëvendosje, pas zyrtarizimit të shpalljes së tij për kryetar, Vizar
Ymeri, fillimisht i përgëzoi të gjithë anëtarët e Lëvizjes "për një
proces demokratik të zgjedhjeve që i organizuan fundjavën e kaluar, më
21 dhe 22 shkurt të këtij viti, duke shtuar se besimin që ma dhanë është
përgjegjësi për mua", për të vazhduar se këtë përgjegjësi do ta
shndërroj në angazhim të përbashkët me ta, për një Vetëvendosje më të
fuqishme, drejtë një Kosove që vendosë vetë, e cila vendosë të
zhvillohet, vendosë të barazohet, vendosë të solidarizohet,
sovranizohet, dhe e cila vendosë të bashkohet.
Ashtu siç nuk u kursyet kurrë ju, ashtu nuk do të kursehem kurrë as
unë - në punë, në terren, në demonstratë e protestë, në publik e media.
Organizata jonë është organizata politike më demokratikja në
Republikën e Kosovës. Për shkak se është e barabartë, dhe insiston në
barazinë mes aktivistëve. Demokracia nuk është vetëm formë a procedurë
anemike që përmbushet vetëm kur plotësohen kriteret formale, sikur kjo
të jetë tender publik që i kërkon së paku dy ofertues. Demokracia është
hapësirë e përditshme dhe e barabartë e angazhimit e diskutimit politik,
mundësi e gjerë pjesëmarrjeje në vendimmarrjen politike që nuk
përjashton askënd, program i qartë politikash që afirmojnë sovranitetin
popullor, të mirën e përgjithshme e pronësinë publike. Ashtu siç është
në Vetëvendosje dhe ashtu siç, fatkeqësisht, nuk është në Kosovë.
Se si mund të flasim për demokraci kur tash e 16 vjet nga çlirimi e 7
vjet nga shpallja e pavarësisë, asnjë prej vendimeve të rëndësishme për
vendin, le që janë marrë pa u pyetur fare populli, por madje pa e marrë
fare parasysh vullnetin e interesin e tij kolektiv. Dhe, për më tepër,
si mund të quhet demokraci kur asnjë prej institucioneve ose udhëheqësve
të tyre, asnjëherë nuk dhanë llogari për asnjë prej veprimeve të tyre,
pavarësisht shkallës së dëmit të krijuar, apo gjerësisë së mundësisë së
shpërdoruar e humbur.
Demokracia është një lëvizje e vazhdueshme drejt progresit. Pra
demokracia është Lëvizje. Partitë politike në Kosovë janë statike. E ju e
dini çfarë ndodh me ujin që rri në një vend.
Ne nuk do të qëndrojmë në një vend. Sepse jemi të pakënaqur.
Dhe kjo pakënaqësi vetëm sa do të shkojë e do të rritet.
Qeveria aktuale e Republikës së Kosovës e ka intensifikuar ofendimin
dhe përdhosjen që po ia bën qytetarit. Nga deklarimet skandaloze të
Mustafës për përgjegjësinë e prindërve në humbjen e jetës së fëmijëve
shqiptarë të Kosovës në Hungari, e deri te deklarata e fundit e
Stavilecit për madhësinë e familjes si shkaktare të mjerimit social të
qytetarit të Kosovës, e shpërfaqin refuzimin kategorik të zyrtarëve
qeveritarë të marrin përgjegjësinë për situatën ekonomike e sociale në
vend. Dhe kjo mungesë përgjegjësie shtrihet në dy rrafshe: është ikje
nga përgjegjësia e zyrtarëve për politikat dhe vendimet e tyre që po e
shkaktojnë këtë gjendje; është po ashtu ikje e institucioneve shtetërore
nga përgjegjësia që kanë karshi qytetarëve. Kjo po e shndërron Kosovën
në një shtet që nuk mundet, që e bën shtetin të pamundur.
Sot fillon një mandat i ri në drejtimin e Lëvizjes Vetëvendosje. Në
këtë mbledhje të sotme do ta zgjedhim kryesinë e re të Lëvizjes
Vetëvendosje. Dua ta shfrytëzoj këtë rast t'i falënderoj të gjithë ata
aktivistë që me punën dhe përkushtimin e tyre e bënë Lëvizjen ajo që
është sot. Të gjithë ata që me përgjegjësi i drejtuan pikat e Lëvizjes,
Qendrat e saj, Këshillet e qendrave, Këshillin e përgjithshëm, Komitetet
e Lëvizjes, Sekretariatin e përgjithshëm, deputetët e Grupit
Parlamentar, qeverinë lokale në Prishtinë, kryetarin e Komunës së
Prishtinës, Shpend Ahmetin, Kryesinë e Lëvizjes Vetëvendosje dhe
kryetarin e deritashëm të Lëvizjes, Albin Kurtin.
Por njëkohësisht ju thërras të gjithëve që ta shumëfishojmë
përpjekjen dhe përkushtimin tonë. Sepse punët e përgjegjësitë e mëdha
janë përherë para nesh, e asnjëherë prapa.
Ky vit do të jetë vit i zhvillimeve të rëndësishme për Republikën e Kosovës, por edhe për organizatën tonë.
Lëvizja Vetëvendosje është në proces të ristrukturimit. Unë, bashkë
me kryesinë e re, do të angazhohem pa kursim në fuqizimin e aktivizmit
të Lëvizjes nëpër Kosovë e jashtë saj. Do t'i forcojmë strukturat dhe
kapacitetet tona organizative në të gjitha nivelet e organizatës, dhe në
tërë hapësirën gjeografike e shoqërore të Kosovës. Kudo ku ka
padrejtësi, kudo ku ka cenim të interesit të përgjithshëm, Lëvizja
Vetëvendosje do të jetë aty bashkë me qytetarin e kundër padrejtësisë, e
kundër shkeljes.
E padrejtësi e cenim të interesit ka kudo. Te marrëveshjet me Serbinë
që po e cenojnë shtetin e po e ndajnë territorin; te refuzimi i
shndërrimit të Trepçës në ndërmarrje publike që po ia vazhdon asaj
amullinë shumëvjeçare që po shkatërron atë por edhe interesin ekonomik e
social të vendit; te tenderi për TEC Kosova e Re që po ia humb Kosovës
mundësinë për kontroll sovran mbi resurset energjetike dhe përdorimin e
tyre për zhvillim e mirëqenie ndërkohë që e kanos qytetarin me
shtrenjtim të çmimit të energjisë; te Gjykata Speciale që po shtrembëron
të vërtetën për luftën e po e tjetërson sovranitetin vendor në gjyqësi;
te kontratat e vazhdueshme me Bechtel Enkan që po i shpërdorojnë paratë
publike të Kosovës në projekte super të shtrenjta pa ndonjë planifikim
ekonomik; te euforia privatizuese e Qeverisë që po e kanos me
zhvleftësim dhe shitje secilën ndërmarrje publike duke e transformuar
pasurinë e përgjithshme në përfitim privat; te uzurpimi i pronës publike
që po ia ngushton hapësirën shoqërisë duke e rritur atë për një numër
të vogël njerëzish; te bankat që përfitojnë nga paratë tona e nuk e
kreditojnë fare ekonominë; te arsimi që nuk jep dije por e atomizon
shoqërinë; dhe te shëndetësia të cilën e kanë shkatërruar për të
përfituar zyrtarët qeveritarë.
Kështu koncentrohet pasuria në një klasë të vogël njerëzish. Dhe
pastaj këta fillojnë të mendojnë se duhet të kenë më shumë të drejta,
dhe e përdorin pushtetin për t'i siguruar vetes më shumë të drejta.
Padrejtësisht.
Mirë që jemi shumica këndej. Këtë shumicë do ta bëjmë Vetëvendosje
Dhe për këtë na duhet Vetëvendosje e organizuar mirë. Na duhen të gjithë
aktivistët e Lëvizjes Vetëvendosje dhe secili prej tyre.
Bashkë është e mundshme. Është e mundshme të bëhemi bashkë. Dhe kur bëhemi bashkë çdo gjë është e mundshme.
Comments (0)
Dërgoja shokut
Printo
