Kosova është e gatshme të fillojë me realizimin e lidhjes hekurudhore me Shqipërinë. Prioritet, sipas Limajt, është ndërtimi i rrugës dhe modernizimi i Hekurudhës Prishtinë Shkup si dhe koncesionimi i Portit të ShëngjinitHapja e korridoreve të reja të rrugore, hekurudhore dhe detare ishte temë e diskutimit të sotëm mes komunitetit të biznesit pranë Odës Ekonomike të Kosovës dhe Ministrit të Transportit dhe Postë-telekomunikacionit, Fatmir Limaj.

Prioritet, sipas Limajt, është ndërtimi i rrugës dhe modernizimi i Hekurudhës Prishtinë Shkup si dhe koncesionimi i Portit të Shëngjinit.

Bizneset vendore, përveç problemeve të ndryshme po ballafaqohen edhe me atë të lëvizjes dhe të transportit të mallrave. Për këtë arsye, kryetari i Odës Ekonomike Safet Gërxhaliu kërkoi nga Ministri Limaj angazhimin drejt hapjes së korridoreve të reja.

"Në rend të parë u bisedua për një formë të krijimit të partneritetit me palën shqiptare nga Shqipëria për Hekurudhën Prishtinë-Prizren-Tiranë-Durrës, ndërtimin e rrugës me rëndësi kombëtare, politike e ekonomike Prizren - Tetovë, koncesioni i rrugës Prishtinë-Shkup, është po ashtu, e një rëndësie të veçantë", tha Gërxhaliu.

Nga ana e tij, Ministri Limaj tha se presin që Qeveria shqiptare të fillojë ndërtimin e hekurudhës në pjesën e saj, pasi në Kosovë ka më pak punë, sepse, janë vetëm 17 km nga Prizreni deri në kufi.

"Kurdo që shteti shqiptar të jetë i gatshëm në realizimin e projektit edhe ne do të jemi të gastshëm në implementimin e këtij projekti", tha Limaj.

Por, prioritet për Limajn është ndërtimi me koncesion i autostradës dhe modernizimi i linjës hekurudhore Prishtinë-Shkup. Prioritet tjetër për Qeverinë e Kosovës është edhe Porti i Shëngjinit. Limaj ka kërkuar nga Oda Ekonomike që të jetë pjesë e bisedimeve ndërmjet ekspertëve të vendeve përkatëse.

"Po ashtu, kërkova nga Oda Ekonomike të shikojnë interesimin e komunitetit të biznesit, për të marrë me koncesion Portin e Shëngjinit, nëse do të shkojë deri te koncesionimi, sepse, Qeveria e Kosovës nuk do të investojë asnjë cent, por, vet komuniteti i biznesit", tha Limaj.

Limaj, gjithashtu, njoftoi se janë në pritje të Qeverisë shqiptare që t'i kryej procedurat në Parlamentin shqiptar për t'ia dhënë edhe juridikisht Portin e Shëngjinit, Kosovës.

(http://www.rtklive.com)