Aleanca për Ardhmërinë e Kosovës (AAK) vlerëson se gjendja aktuale politike në vend është shumë e keqe.
AAK rithekson se përgjegjësia për degradimin e shtetit të Kosovës bie mbi koalicionin e deritashëm qeverisës PDK-LDK dhe mbi kryeministrin në shkuarje, Hashim Thaçi.
Niveli i lartë i korrupsionit, krimit të organizuar dhe qeverisja mbi bazën e interesave personale dhe grupore janë dëshmuar si dukuri negative që po rrezikojnë ekzistencën e shtetit demokratik të Kosovës.

AAK rikonfirmon qëndrimin e deritashëm se Kosova ka nevojë për ndërrim të mentalitetit qeverisës si domosdoshmëri për të shpëtuar popullin e Kosovës nga krizat e njëpasnjëshme që ka sjellë kjo Qeveri. Krizat nuk mund të tejkalohen përmes krizave të reja, prandaj zgjedhjet parlamentare duhet të jenë të përgatitura mirë, të jenë të lira, të ndershme dhe demokratike.

AAK është e bindur se do të dalë fituese e zgjedhjeve të ardhshme parlamentare, duke u bazuar në komunikimin e përditshëm që ka me qytetarët e Kosovës në të gjitha anët.
AAK është e përkushtuar që të ndërrojë formën e qeverisjes dhe nuk është interesuar që të ketë vetëm ndërrim të Qeverisë. Kryeministri Ramush Haradinaj do të ofrojë një Qeveri që punon pandërprerë për interesin e popullit të Kosovës dhe jo për interesin e anëtarëve të Kabinetit të tij.

Vizioni i AAK-së mbetet forcimi dhe funksionalizimi i shtetit, përmirësimi i jetës së qytetarit, shteti ligjor, zhvillimin ekonomik, hapja e vendeve të reja të punës, zhvillimi i demokracisë dhe integrimi i Kosovës në NATO dhe BE.

(http://www.rtv21.tv)