Voal-online - Spanja e ka siguruar NATO-n se paqeruajtësit e saj në Kosovë do të tërhiqen në harmoni me nevojat ushtarake e politike të aleancës.  "Të dy palët janë pajtuar, që tërheqja duhet të bëhet në mënyrë të koordinuar, graduale dhe fleksibile", tha zëdhënësja e NATO-s, Carmen Romero. Këto komente u bënë mbrëmë pas takimit njëorësh ndërmjet ministres së mbrojtjes së Spanjës, Carme Chacon dhe sekretarit të përgjithshëm të aleancës Scheffer, i cili kishte tërhequr vërejtjen kundër çfarëdo zvogëlimi më të madh të trupave në Kosovë. Spanja kishte paralajmëruar se 630 ushtarët spanjollë në Kosovë, do të largoheshin gradualisht deri në muajin gusht të këtij viti. Zëdhënësja e NATO-s Romero, tha se "procesi i brendshëm i konsultimeve ushtarake dhe politike, do të vazhdoj në NATO".

Kryeministri i Kosovës Hashim Thaçi, në një intervistë ekskluzive për BBC-në ka deklaruar se krijimi i instucioneve shtetërore të Kosovës si dhe prania e misionit evropian kanë bërë që UNMIK-u, misioni i Kombeve të Bashkuara, të jetë i tepërt dhe i padobishëm. Me z. Thaçi bisedoi Seladin Xhezairi, në programin Zigzag, dhe fillimisht e pyeti se cili ishte vlerësimi i tij për dhjetëvjetorin e sulmeve të NATO-s ndaj objektivave ushtarako-policore serbe:  Kryeministri Thaçi: Ishte vendimi më i drejtë i Aleancës Veriatlantike, vendim i pritur dhe meritor për Kosovën. Në Kosovë zhvillohej lufta për çlirimin e plotë, njëherë e përgjithmonë nga Serbia. Serbia kishte ndërmarrë ofensivat apo mund të them veprimet gjenocidale ndaj popullatës shqiptare. Vazhdonin deportimet që i përngjanin një holokausti të ri.

Evropa e Lirë - Lagjja e Boshnjakëve në veri të Mitrovicës, sipas mekanizmave të rendit, gjatë ditëve të fundit ka qenë vatër e incidenteve të ndryshme, që kanë tensionuar situatën e sigurisë në atë pjesë të vendit. Autoritetet e sigurisë në Kosovë pohojnë se situata e sigurisë në veri të Mitrovicës vlerësohet si e qetë, por me tensione të vazhdueshme, për shkak të, siç thuhet, veprimeve të grupeve kriminale apo atyre me interesa të ndryshme në atë pjesë të vendit. Zëdhënësi i Policisë rajonale në Mitrovicë, Besim Hoti, thekson se arsye tjetër e tensionimeve të herëpashershme të situatës së sigurisë në veri, e sidomos në Lagjen e Boshnjakëve, është dhe veprimi i strukturave paralele serbe. “Absolutisht, ne gjithmonë e kemi marrë parasysh që funksionimi i strukturave paralele, të cilitdo nivel qofshin ato, të sigurisë apo të niveleve tjera të funksionimit paralel, është burim i tensioneve ose iniciues i problemeve të ndryshme”, tha Hoti.

RTK - Oda Kosovaro-Arabe për Miqësi dhe Bashkëpunim Ekonomik ka njoftuar qytetarët e Republikës së Kosovës, të cilët dëshirojnë të udhëtojnë në Mbretërinë e Arabisë Saudite, se tani e tutje këtë mund ta bëjnë me pasaportat e Republikës së Kosovës. “Në një nga vendimet e veta të fundit Qeveria e Mbretërisë së Arabisë Saudite ka bërë njohjen zyrtare të pasaportave të Republikës së Kosovës dhe ka autorizuar përfaqësitë konsullore që të pajisin me viza qytetarët e Republikës së Kosovës”, thuhet në një njoftim të Odës Kosovaro-Arabe për Miqësi dhe Bashkëpunim Ekonomik. Voal-online.

Evropa e Lirë - Zëvendës kryeministri i Kosovës, Hajredin Kuçi, u ka bërë sot thirrje shteteve, që kanë përfaqësues në misionin e OKB-së, që ata t'i tërheqin nga Kosova. Për kërkesën e Britanisë, për zvogëlimin e përfaqësuesve të vet në misionin EULEX, zëvendës kryeministri Kuçi tha se kjo nuk është arsye për shqetësim dhe se Kosova nuk mbrohet me numrin e përfaqësuesve të misioneve ndërkombëtare, por me politikën e bashkësisë ndërkombëtare. Ai ka vlerësuar pozitivisht tërheqjen e përfaqësuesve të Rusisë nga UNMIK-u. Voal-online

RTK - Komiteti për çështje të jashtme i Parlamentit të Bahreinit ka aprovuar dje propozimin për njohjen e pavarësisë së Kosovës. Kreu i këtij komiteti Al Muavda ka kërkuar njohje të menjëhershme të pavarësisë së Kosovës dhe vendosje të marrëdhënieve diplomatike me shtetin e ri. Ai po ashtu ka kërkuar që njohjen e pavarësisë së Kosovës ta bëjnë edhe shtetet islamike dhe ato arabe. Lajmi bëhet i ditur nga agjencia shtetërore e lajmeve të këtij vendi. Mbretëria e Bahreinit është shtet në Lindjen e Mesme, me kryeqytet Manama (Al Manamah)
Premtimin se vendimi për njohjen e Kosovës do të vijë me kohë, shefi i diplomacisë kosovare, Skender Hyseni, e ka marrë edhe nga ambasadori i Ganës në OKB, Leslie Kojo Christian. Voal-online.

Autoritetet në komunën e Gjakovës i dhanë të mërkurën një sheshi të këtij qyteti emrin e ish anëtarit të kongresit amerikan Tom Lantos, në shenjë nderimi për rolin e tij në zgjidhjen e çështjes së Kosovës. Në një akademi solemne në këtë qytet u tha se Tom Lantos ishte mbështetës i madh i çështjes së Kosovës gjatë viteve më të vështira të saj. Aty u përkujtua edhe vizita e tij në Gjakovë në maj të vitit 1990, kur ai së bashku me ish ligjvënësin Xhozef DioGuardi ishin ndër të parët zyrtarë amerikan që vizituan në atë kohë Kosovën. Ajo vizitë, u tha në akademi, nxiti shpresa të mëdha tek qytetarët e Kosovës.  Tom Lantos, i vetmi i mbijetuar i Holokaustit i zgjedhur në kongresin amerikan, vdiq në moshën 80-vjeçare, pesë ditë para shpalljes së pavarësisë së Kosovë të cilën ai e kishte mbështetur fuqishëm shumë kohë përpara se kjo çështje të merrte rëndësinë që ka sot në skenën ndërkombëtare.