Dje në një stadium të Prishtinës u dogj një flamur maqedon dhe, menjëherë, ky akt nga politika zyrtare e Meqedonisë u "konsiderua provokacion i rëndë " që nxit hedhjen në erë të bashkëjetesës etnike në Maqedoni, midis shqiptarëve, që sipas shifrave zyrtare janë 25 % e popullsisë, ndërsa sipas shifrave reale janë 700 - 800 mijë ose më tepër.
Në fakt, asnjëherë nuk ka pasur bashkëjetesë paqësore midis shqiptarëve dhe maqedonëve, dhe jo për fajin e shqiptarëve. Mbi shqiptarët, siç do të thoshte Prof.Ali Aliu në emisionin Opinion, Maqedonia, ka ushtruar 100 vjet segregacion dhe racizëm të egër, çka solli edhe shpërthimin e konfliktit të vitit 2001. Rrjedhojë e tij ishte edhe Marrëveshja e Ohrit, e cila synonte që, më në fund, shumica pretenduese maqedonase t'i trajtonte shqiptarët si komb shtetformues, pra në mënyrë të barabartë.
Por Marrëveshja vazhdon të mbetet në letër. Dhe këtë e dëshmon më së miri Enciklopedia Maqedone, e financuar me 500 mijë Euro nga qeveria e Maqedonisë, e cila tani bën sikur nuk di asgjë për çka është shkruar nga ata pseudoshkencëtarë që i ka paguar ajo vetë.
Për segmentin ekstremist maqedon, i cili e nxiti konfliktin e viti 2001, problemi shqiptar është një obsesion. Dikur Milosheviçi thoshte se shqiptarët e Kosovës ushtrojnë genocid demografik kundër Serbisë, për "fajin" se kombi shqiptar kishte një lindshmëri të lartë dhe serbët jo. I njëjti problem është edhe për krahun ekstremist të politkës maqedone.
Ky krah nuk e do integrimin e Maqedonisë në Europë as në NATO. Nuk e do, sepse integrimi i Maqedonisë si një shtet me prerogativa europiane, do ta kthejë Maqedoninë në një shtet të tipit Perëndimor, ku racizmi etnik do të ishte i dënueshëm me ligj, dhe regjistrimi i popullësisë do të ishte real. Dhe segmenti ekstremist maqedon natyrisht nuk e do këtë.
Kjo është arsyeja që Maqedonia po e zgjat sa s'ka edhe ndryshimin e emrit, megjithë trysninë e Greqisë, e cila ka 20 vjet që kërkon ndryshimin e emrit dhe prapë nuk ka arritur që ta bëjë këtë, paçka se është anëtare e BE-së apo NATO-s.
Takimi i Ali Ahmetit me Gruevskin, që u bë dje, ishte një takim konformist, jo në të mirë të bashkëjetesës, por për t'iu hedhur hi syve shqiptarëve, çka nuk mund të ndodhë, sepse koshienca e shqiptarëve për padrejtësitë etnike që ka ushtruar Maqedonia kundër tyre, është super e ndriçuar që kur plasi konflikti i 2001, që e udhëhiqte vetë Ali Ahmeti, i cili e njeh shumë mirë segregacionin që kanë pësuar shqiptarët, nga shteti kundër të cilit ai ngriti armët.
Shteti Maqedon, e di shumë mirë se e Enciklopedia e Maqedonisë të cilën e sponsorizoi ai, është një provokacion i hapur për të minuar bashkëjetesën shqiptaro-maqedone, e cila përderisa Marrëveshja e Ohrit nuk është implementuar mbetet gjithnjë e minuar.
Gruevski dhe Ahmeti e dinë mirë se sovraniteti i Maqedonisë mbrohet duke e denoncuar dhe e nxjerrë jashtë botimit Enciklopedinë akltuale maqedone, si dhe duke larguar nga Akademia e Maqedonisë ata shkencëtarë me një botëkuptim çubrilloviçian, të cilët janë vënë në shërbim të nxitjeve nacionaliste- ultrashoviniste, të racizmit dhe segregacionit etnik në shekullin e XXI.
Alhmeti duhet ta detyrojë Gruevskin, dhe nëse nuk ia arrin dot, atëherë të dalë nga qeveria dhe të bëjë aleancë me të gjithë faktorin shqiptar, në mënyrë që Maqedonia të hyjë në zgjedhje të reja parlamentare.
Nëse faktori ndërkombëtar nuk mendon se është koha e favorëshme që Maqedonia të hyjë në zgjedhje të reja, atëhere le të ushtrojë trysni serioze tek qeveria e Maqedonisë, që Enciklopedia aktuale të hidhet në koshin e plehrave dhe Enciklopedia e vërtetë e Maqedonisë të ndërtohet në baza të bashkëjetesës dhe bashkekzistencës etnike dhe fetare, e cila përjashton çdo lloj racizmi dhe segregacioni etnik.
Nga ana tjetër, edhe Greqia duhet të lëvizë, që segmentet ekstremiste të Maqedonisë të mos i pretendojnë rrënjët e tyre tek ata që janë pjesë e Enciklopedisë të Greqisë dhe trashëgimisë botërore të njerëzimit. Sepse sllavët gjithnjë e kanë pranuar se në Ballkan kanë filluar të zbresin vetëm në shekullin e shtatë pas Krishtit.
Comments (0)
Dërgoja shokut
Printo
