Voal-online - Për 50 vjetorin e pranimit në Këshillin e Evropës, Zvicra fton 50
të rinj nga Evropa Lindore për të njohur institucionet dhe kulturën e këtij
vendi, bën të ditur Departamenti Zviceran i Punëve të Jashtme në një deklaratë
shtypi të lëshuar me këtë rast.
Nga 1-7 maj 2013, të ftuarit, mes tjerash,
do të qëndrojnë në Landsgemeinde në Glaris, për t'u takuar me përfaqësuesit e
Asamblesë Ndërjurasiane në Moutier e për të diskutuar me një grup
bashkëmoshatarësh zviceranë për majën e Stockhornit.
Udhëtimi i tyre do të nisë
nga Strasburgu me një vizitë në Këshillin e Evropës dhe do të përmbyllet në
Friburg, ku do t'ia dorëzojnë këshilltarit federal Didier Burkhalter dhe
Sekretarit të Përgjithshëm të Këshillit të Evropës Thorbjørn Jagland një deklaratë
për aspiratat e tyre ndaj Evropës së nesërme.
Udhëtimi i 50 të rinjve nga Evropa Lindore do të ketë natyrë studimi dhe
njohjeje të institucioneve politike, të traditave dhe të kulturës zvicerane. Të
rinjtë vijnë nga 12 vendet e fundit të Evropës Lindore të pranuar në Këshillin
e Evropës (Shqipëria, Moldavia, Maqedonia, Ukraina, Kroacia, Rusia, Gjeorgjia,
Armenia, Azerbaixhani, Bosnia, Serbia, Mali i Zi).
Gjatë javës, të rinjtë do ta përshkojnë Zvicrën duke marrë pjesë në manifestime
të lidhura me tematika të Këshillit të Evropës: të drejtat e njeriut, shteti i
së drejtës, demokracia. Në kantonin Jura do të marrin pjesë në mënyrë të
veçantë në një takim në Moutier me përfaqësuesit e Asamblesë Ndërjurasiane,
organ model për ndërmjetësimin e konflikteve.
Në Glaris do të jenë të pranishëm
në Landsgemeinden tradicionale dhe në vijim në një paraqitje njohëse mbi
sistemin demokratik zviceran.
Në kantonin e Bernës Këshilli Zviceran i
Veprimtarive Rinore do t'i takojë të rinjtë në majën e Stockhornit për një laboratori
të shkëmbimeve ndërkulturore me një grup bashkëkohësisht zviceranë, me të cilët
së bashku do të japin një deklaratë për aspiratat ndaj Evropës së nesërme.
Pikëmbërritja do të jetë Universiteti i Friburgut, ku më 6 maj 2013 do të
mbahen kremtimet solemne për 50 vjetorin e pranimit të Zvicrës në Këshillin e
Evropës e ku të rinjtë do t'ia dorëzojnë zyrtarisht këshilltarit federal Didier
Burkhalter e Sekretarit të Përgjithshëm të Këshillit të Evropës Thorbjørn
Jagland deklaratën e përbashkët lidhur me pritshmëritë e tyre ndaj
përgjegjësve të politikës evropiane.
Udhëtimi është parë edhe si një rast për të kultivuar miqësitë përtej kufijve. Zvicra
dëshiron të ndajë me vendet e reja anëtare të Këshillit të Evropës besimin e
saj në të drejtat e njeriut, në liritë themelore e në demokracinë, të cilat i
konsideron premisa të pazëvendësueshme për përparimin e Evropës së ardhshme.
Në
kontekstin e 50 vjetorit të pranimit të Zvicrës në Këshillin e Evropës, të
martën e shkuar në Asamblenë Parlamentare të Strasburgut këshilltari federal
Didier Burkhalter ka mbajtur një fjalim mbi rëndësinë e Këshillit të Evropës
dhe mbi përkushtimin e Zvicrës në favor të respektit dhe të zbatimit të
drejtave të njeriut, të shtetit të së drejtës dhe të demokracisë, përfundon
deklarata e shtypit e lëshuar nga Departamenti Zviceran i Punëve të Jashtme.