Një kujtim i përbashkët, nga dita e parë e shkollës: mësues, nxënës e prindër
1.
"Mirësevini, fëmijë të dashur!", ishte ky urimi i zemrës, që u dëgjua shpesh,
ditën e diel, më 9 shtator 2012, në Qendrën Kulturore të Shoqatës "Bijtë e
Shqipes", në Filadelfia të Amerikës. Këtu zhvillon programin mësimor shkolla
shqipe "Gjuha jonë". Vinin njëri pas tjetrit prindërit, me fëmijët e tyre
përdore, për ta filluar vitin e ri arsimor. Sadik Elshani, kryetar I Shoqatës, i priste buzagas
para hyrjes kryesore. Takonte duart me prindërit, përshëndeste fëmijët dhe ju
uronte atyre mirëseardhjen.
Gjithë gjallëri, fëmijët më "të vjetër" të kësaj shkolle, që kishin mbyllur në
qershor një vit të sukseshëm dhe tani do të vazhdonin vitin e dytë, të tretë,
të katërtë ose të pestë, në ciklin e plotë 5-vjeçar të kësaj shkolle,
takoheshin me njëri tjetrin, përqafoheshin dhe gjithë gëzim tregonin për
pushimet verore. Më të ndrojtur ishin fëmijët, që vinin për herë të pare. Por,
sapo njiheshin me të tjerët, gjallëroheshin menjëherë. Edhe mësueset e shkollës
ua kthenin me ngrohtësi përqafimet fëmijëve, që kishin patur një vit më parë në
klasat e tyre, por sidomos atyre, që vinin aty për herë të parë.
Mësueset e shkollës shqipe, në Filadelfia
Pas një periudhe verore të qetë, Qendra Kulturore e Shoqatës u zhurmua përsëri
nga zërat e ëmbël të fëmijëve. Ndihej atmosfera e gëzushme në këtë mjedis të
mirëpritur. Shumica e fëmijëve, tashmë, janë të lindur këtu në Amerikë. Por,
aty këtu, ka ndonjë të ardhur kohët e fundit nga Shqipëria. Ka nga ata që, të
ndihmuar nga prindërit, flasin shqip, paçka se jo mire. Por ata nuk dinë të
shkruajnë e as të lexojnë. Por ka edhe nga ata, që emrin e vet e shqiptojnë me
theksin anglez. Por edhe këta të fundit do të fillojnë ta mësojnë gjuhën shqipe
në këtë shkollë, që sivjet i çeli dyert për të dhjetin vit radhazi. Është
shkolla, ndoshta, më e vjetra në Diasporën Shqiptare të Amerikës. Por ajo, që
ka rëndësi më tepër, është shkolla, ku në ciklin e saj 5-vjeçar e kanë mësuar
gjuhën shqipe me dhjetëra fëmijë.
2.
Ja pra, më 9 shtator 2012 nisi në këtë shkollë viti i ri arsimor 2012 2013.
Prindërit, fëmijët, mësueset, anëtarë e dsahamirë të Shoqatës sonë, morën pjesë
në ceremoninë e thjeshtë, të organizuar nga Këshilli Drejtues i saj, për
fillimin e këtij viti arsimor. Kështu,
z. Sadik Elshani përshëndeti në emër të Këshillit Drejtues të Shoqatës, që
është edhe organizatori dhe administratori i shkollës shqipe "Gjuha Jonë". Ai
ua uroi fëmijëve mirëseardhjen e për suksese edhe për këtë vit, si dhe zhvilloi
me prindërit një bisedë të ngrohtë e miqësore. Midis të tjerave, ai përmendi
edhe detyrat, që u takojnë Shoqatës, prindërve dhe mësueseve, për një
mbarëvajtje sa më të mirë të procesit mësimor, gjatë tërë vitit shkollor.
Në përfundim të ceremonisë u bë një foto e përbashkët e fëmijëve, prindërve dhe
mësueseve, një kujtim i bukur dhe i paharruasr i kësaj dite të shënuar.
Mbas ceremonies, fëmijë e të rritur u ftuan në koktejlin e zakonshëm, që
organizon Shoqata jonë, në këto raste.
Si para ceremonisë, ashtu edhe mbas saj, prindërit plotësuan fletë-regjistrimet
e fëmijëve, në bazë të të cilave janë të gjitha dokumentet, që ruan Shoqata
"Bijtë e Shqipes" në fondin e saj, për çdo vit mësimor. Ndërsa fëmijët, të
cilët rrinin aq "urtë" gjatë ceremonies, filluan përsëri ta zhurmojnë mjedisin
e Qendrës Kulturore. Ndërsa prindërit shkëmbenin mendime me njëri tjetrin,
por edhe me mësueset.
Znj. Erblina Koka, zv.kryetare e parë e Shoqatës, nuk përtoi të bënte shumë
fotografi, kurse kameramani Florian Bezhani filmoi çdo gjë.
...Kështu e nisi përsëri rrugën e saj Shkolla Shqipe "Gjuha Jonë", në Filadelfia,
për vitin e ri shkollor 2012 2013, që shënoi dhe fillimin e vitit të dhjetë,
në jetën e kësaj shkolle.
Edhe ne ju urojmë nga zemra fëmijëve të kësaj shkolle: Gjithnjë suksese, në
mësimin e gjuhës sonë të bukur shqipe!
(
E dërgoi për publikim, Prof. Murat Gecaj Tiranë )
Comments (0)
Dërgoja shokut
Printo
