VOAL - Online Zëri i Shqiptarëve - Nesër Kosova shënon dhjetëvjetorin e "Eksodit 99"

Voal-online Sipas RTK-së nesër fillojnë manifestimet për shënimin e 10 vjetorit të eksodit masiv të shqiptarëve të Kosovës të vitit 1999. E veçanta e ditës përkujtimore "Eksodi 99", do të jetë përurimi i "Kullës së Eksodit" në Kukës, që do të mbetet gjurmë e së kaluarës dhe shenjë falënderimi gjithë Shqipërisë, për mikpritjen e ngrohtë në ditët më të vështira të historisë sonë. Organizatorët e "Eksodit", thanë se ky manifestim bëhet me qëllim që të mos harrohet e kaluara.

Në dhjetë vjetorin e "Eksodit 99", manifestimi përkujtimor fillon më 15 prill, me nisjen e 99 pjesëmarrësve nga Mitrovica drejt Xërxës. Ndërkaq, më 16 prill, pritet të bashkëngjiten qytetarët të shumtë nga mbarë Kosova për të marshuar drejt Kukësit.
Kryetari i Organizatës Joqeveritare "Eksodi 99", Mehmet Tahiri, tha se e veçanta e këtij manifestimi në këtë 10 vjetor jubilar, është edhe zbulimi i Kullës, i cili do të mbahet në Kukës të Shqipërisë.

Motoja e këtij manifestimi është që të mos harrohet e kaluara, tha Tahiri, duke shtuar se duhet të falënderojmë për zemërgjerësinë dhe mikpritjen që na kanë bërë qytetarët e Kukësit dhe të gjithë Shqipërisë.
Gjatë dy ditëve të manifestimit "Eksodi 99" do të bëhet edhe vendosja e kurorave në varrezat e Jasharajve në Prekaz, marshimi i qytetarëve në këmbë përgjatë qyteteve të Pejës e Gjakovës, ku arritja në Xërxë do të shënohet më një program kulturo-artistik. Më pas do të bëhet marshimi i qytetarëve nga Xërxa në Prizren, duke vazhduar drejt kufirit për të arritur në Kukës.
Në këtë manifestim, me rastin e përurimit të "Kullës së Eksodit 99", pritet të marrin pjesë krerët më të lartë të institucioneve shtetërore nga Kosova dhe Shqipëria.
Nga organet kompetente të Shqipërisë, për pjesëmarrësit në këtë manifestim, është siguruar leja e kalimit kufitar pa dokumente udhëtimi.