Te Bjeshkët e Nemuna rrëzë bjeshkës së Rusolis
dhe Homshurit, qytetarë të shumtë janë të shqetësuar për tokat të cilat
po vijnë në diskutim mes Kosovës dhe Malit të Zi.
Banorët e kësaj
ane thonë se nuk kanë tokë t'i falin askujt, derisa kërkojnë nga
Kuvendi i Kosovës që urgjentisht të merren masa në këtë drejtim që të
mos lejojnë autoritetet e Malit të Zi të bëjnë ndarje kufitare sipas
dëshirës së tyre, ata thonë se ka 15 vjet që policia malazeze nuk i
lejon të dalin për t'i punuar tokat e tyre.
"Gjithherë ka qenë e
jona kemi marrë amanetin prej babës, babëgjyshit e katragjyshi që këto
prona janë tonat, janë të Kosovës dhe nuk do t'i japim kurrë. Do t'ia
përcjellim gjeneratave tjera që vijnë përndryshe do të ketë pasoja nëse
nuk vendoset qysh themi dhe qysh ka qenë mund të ndërmarrim edhe masa më
radikale po nuk kemi dëshirë po nëse nuk merren masa populli është i
shqetsum dhe mund të dalë jashtë kontrolle situata", ka thënë Sadri
Zekaj, anëtar i këshillit protestues të banorëve për çështjen kufitare,
përcjell televizioni publik i Kosovës.
Ai kërkon nga institucionet lokale dhe qendrore që të merren më seriozisht me këtë çështje.
Javë
më parë banorët e kësaj ane ia kanë kërkuar Qeverisë së Kosovës,
Komisionit Shtetëror për Demarkacionin e kufirit me Malin e Zi, që
urgjentisht të merren masa në ketë drejtim që të mos lejojnë autoritetet
e Malit të Zi të bëjnë ndarje kufitare sipas dëshirës së tyre, ngase
shumë hektarë të zonës së Rugovës e Komunës së Istogut do të aneksohen
në mënyrë paqësore nga Mali i Zi.