Voal-online - Autoritetet kosovare ndalojnë hyrjen në territorin e Kosovës të Ministrit serb për Kosovën, Goran Bogdanovic. Ministri serb kishte parashikuar një vizitë në enklavën serbe por nuk kishte siguruar paraprakisht lejen e institucioneve të Kosovës, por vetëm atë të UNMIK-ut. Lajmin e ka konfrimuar Ministri i Punëve të Brendshme të Kosovës, Zenun Pajaziti, gjatë një interviste për Radio Televizionin e Kosovës.
Pajaziti sqaroi se qeveria ishte njohur me vizitën e Bogdanovic vetëm përmes kërkesës së tij mbërritur nga UNMIK. Autoritetet kosovare thanë se refuzuan kërkesën për vizitën e Bogdanovic nisur edhe nga fakti se mesazhi që ai kërkon të përcjellë tek enklavat serbe bien ndesh me përpjekjet e institucioneve vendore dhe ndërkombëtare për paqe dhe stabilitet në vend. Vizitat e Bogdanovic në Kosovë vazhdimisht janë shoqëruar me thirrje të hapura dhe publike të tij drejtuar serbeve për të mos pranuar institucionet e Kosovës.