VOAL - Online Zëri i Shqiptarëve - Hashim Thaçi: Si kurrë më parë e ardhmja e Kosovës është e sigurt, është e ardhme evropiane

Qeveria e Republikës së Kosovës ka ndërmarrë të gjitha angazhimet për të ndërtuar kapacitetet e saja që do të shërbejnë si pikë kontakti për ministritë e linjës dhe donatorët, dhe angazhohet për një bashkëpunim të ngushtë për koordinimin e donacioneve, ka theksuar kryeministri Thaçi.
Në takimin e sotëm, janë prezantuar sektorët e financave, arsimit, tregtisë, industrisë, energjisë dhe transportit.
"Ky forum paraqet dialogun e vazhdueshëm ndërmjet qeverisë dhe donatorëve. Në forumin e sotëm është pasqyruar procesi i koordinimit me donatorët. Një proces i tillë do të vazhdojë me formimin e grupeve punuese sektoriale" ka thënë kryeministri Hashim Thaçi.
Grupet punuese sektoriale do të formohen deri në qershor, ndërsa takimi i radhës i Forumit të Nivelit të Lartë do të mbahet në shkurt 2010. Kryeministri është zotuar se Qeveria e Kosovës do t'i përmbush të gjitha obligimet e veta në raport me llogaridhënien dhe transparencën.
"I garantojmë donatorët se do të ketë llogari për çdo cent të shpenzuar. Si kurrë ndonjëherë më parë e ardhmja e Kosovës është e sigurt si e ardhme evropiane. Ky është vullneti i popullit të Kosovës dhe ky vullnet e ka mbështetjen e komunitetit ndërkombëtar", ka vlerësuar kryeministri Hashim Thaçi.
Lawrence Meredith, kryesuese e Njësisë për çështjet e Kosovës në DG ELARG, Komisioni Evropian, ka vlerësuar se viti i kaluar ka qenë vit historik për Kosovën. Kosova ka shpallur pavarësinë dhe në konferencën e donatorëve ka marr premtimin për mbi 1.2 milionë euro donacione për Kosovën.
"Në këtë kontekst, ngjarja e sotme është mundësi e mirë. Ne e përgëzojmë qeverinë për progresin e bërë në muajt e kaluar, që nga shpallja e pavarësisë dhe sidomos e përshëndesim themelimin e agjencisë për koordinim, zhvillim dhe integrime evropiane", është shprehur Meredith.
Në emër të USAID, Patricia Rader, ka theksuar se është e qartë se Qeveria e Kosovës ka arritur progres gjatë vitit që shkoi.
"Do të vazhdojmë të punojmë me kolegët tanë në qeveri dhe me popullin e Kosovës, sidomos në energji dhe në mirëqenien sociale", është shprehur Patricia Rader.
Përfaqësuesit e institucioneve financiare ndërkombëtare, Banka Botërore dhe Fondi Monetar Ndërkombëtarë, janë shprehur se ngjarja e sotme ka qen një rast që bashkërisht të shpjegojmë politikat që janë duke u implementuar dhe evidentimin e progresit nga ministritë e Kosovës.
Kryeministri Hashim Thaçi është përgjigjur në interesimet e gazetarëve për reflektimin e krizës financiarë globale në raport me realizimin e donacioneve për Kosovën, duke theksuar faktin se proceset zhvillimore në Kosovë gjatë viti të kaluar kanë qenë mjaft pozitiv, si në rritjen e shënuar ekonomike, rreth 5.5% edhe në rritjen e buxhetit për 15%.
Implementimi i donacioneve është një proces, ka thënë kryeministri Thaçi, që do të vazhdojë për periudhën trevjeçare. Deri tash ka filluar implementimi i 1/3 së donacioneve. Qeveria e Kosovës i ka përmbushur maksimalisht zotimet e veta, ka thënë kryeministri Hashim Thaçi.

Takimi i sotëm ka dëshmuar se besimi në institucionet e Republikës së Kosovës dhe donatorëve ndërkombëtarë është i palëkundur dhe ky besim në takimin e sotëm është rritur.
"Donatorët po i mbajnë premtimet, por i gjithë ky përkushtim i përbashkët vjen si rezultat i menaxhimit të disiplinuar dhe efikas të buxhetit të Kosovës", theksoi kryeministri Hashim Thaçi, yhuhet në njoftimin e Zyrës për informim pranë Kryeministrit. Voal-online.