Partia Socialiste, bën të ditur Balkanweb, ka mbledhur sot në mesditë anëtarët
e kryesisë socialiste për të diskutuar rreth zhvillimeve të mëtejshme që do të
mbahen pas zgjedhjeve që u zhvilluan më 28 Qershor. Kreu i PS, Edi Rama
theksoi se nuk do të njohë zgjedhjet nëse socialistëve u mohohet mandati i
fituar me vota në qarkun e Fierit. Rama akuzoi Berishën dhe KQZ për maskaradë
me votën e shqiptarëve, ndërsa hodhi poshtë deklaratën e Ilir Metës se ka
tentuar të blejë vota nga e djathta përpara ditës së zgjedhjeve.
"Berisha të
heqë dorë nga mandati i nëntë në Fier, ndryshe PS nuk do të njohë zgjedhjet,"
kështu deklaroi kreu socialist Edi Rama, gjatë një konference për mediat
menjëherë pas përfundimit të mbledhjes së kryesisë së Partisë Socialiste.
"Nuk do të lejojmë grabitjen e mandatit të 9 në Fier. Maskarada e KQZ-së duhet
të marrë fund. Berisha duhet të heqë dorë nga ideja se mund të garbisi mandatin
e nëntë me forcë, nëse do që PS të njohë zgjedhjet. Ne do të bëjmë të pamundur
që kjo qeveri në formim e sipër, ende pa u bërë qeveri ta nisë me një grabitje
të kësaj përmase " u shpreh Rama.
Kreu socialist hodhi poshtë deklaratat e kreut të LSI-së, në lidhje me ofertat
e bëra nga Partia Socialiste.
"Ilir Meta është i pabesueshëm në çdo gjë që thotë, unë e mohoj atë që ai ka
thënë lidhur me faktin tërësisht të pavërtetë se paska patur një ofertë nga
Partia Socialiste," theksoi Rama.
Ndërkohë, kryesocialisti nënvizoi se partia që ai drejton do të bëjë çdo gjë
për të garantuar shqiptarët në lidhje me përfundimin e procesit zgjedhor në
mënyrën e duhur.
"Ashtu si jemi të vendosur t'i bëhemi barrikadë krijesës që po del nga
marrëveshja e ulët, më e neveritshmja marrëveshje gjatë 18 viteve, mes Berishës
dhe Metës," tha Rama.
Rama theksoi edhe njëherë deformimet e procesit zgjedhor duke shtuar se PS do
të provojë çdo ndërhyrje pavarësisht nga rezultati përfundimtar i zgjedhjeve të
28 qershorit.
"Asnjë nuk ka arsye të votojë nëse nuk ka garanci që vota që jep do të shkojë
aty ku duhet dhe do te numërohet ashtu siç duhet," theksoi Rama.
Ndërkaq, kryetari i PS e konsideroi vendimin e LSI-së për t'u bërë pjesë e
qeverisë së të djathtëve si shfaqje të dyfytyrësisë së Ilir Metës. "89 mijë
njerëz që e votuan për të hequr Berishën, u kthyen në një mall që Meta i shiti
për të blerë karrigen e pafytyrësisë," tha Rama.
Mbledhja e kryesisë së PS ishte e para pas zgjedhjeve te përgjithshme në vend.
Anëtarët e kryesisë socialiste diskutuan rreth zhvillimeve të mëtejshme që do
të mbahen pas zgjedhjeve që u zhvilluan të djelën më 28 Qershor.
Në zgjedhjet parlamentare të Qershorit, nga rezultatet paraprake PS mori 65
mandate, PD 68, LSI 4 mandate, PBDNJ, PR dhe PDI nga 1 mandat. Ndërkohë sot do
të numëroheshin edhe 9 kuti të disa KZAZ-ve të Fierit nga të cilat PS pretendonte
të fitojë edhe një mandat të 9-të në këtë qark. Ndërkaq ende nuk është lexuar
vendimi zyrtar i Komisionit Qendror të Zgjedhjeve.