"Nesër, (e hënë më 14 shtator) nën organizimin e 22 organizatave shoqërore që veprojnë në Kosovë, do të mbahet demonstrata gjithëpopullore kundër protokolleve EULEX-Serbi dhe kundër hipokrizisë së krerëve institucionalë të Kosovës. Kjo demonstratë është për sovranitet", thuhet në një komunikatë për opinion të lëshuar nga përfaqësuesit e organizatave që kanë thirrur demonstratën.
Përfaqësuesit e organizatave që e kanë thirrur demonstratën mbajtën sot konferencën e fundit për shtyp para demonstratës ku ata e shpalosën trajektoren dhe disa nga parullat që do të mbahen nesër në demonstratë.
Sipas komunikatës, demonstrata do të fillojë në ora 12:00, nga Biblioteka Kombëtare e Kosovës në Prishtinë, për të vazhduar rrugës "Eqrem Çabej" deri te Mensa e Studentëve. Prej aty do të kthejmë rrugës "Agim Ramadani" për të vazhduar drejt objekteve të Institucioneve të Kosovës: Kuvendit, Qeverisë dhe Presidencës. Aty do të ndalemi dhe do të mbajmë dy fjalime nga dy përfaqësues të organizatave bashkë-organizuese të demonstratës. Pas fjalimeve do të vazhdojmë nëpër Bulevardin Nënë Tereza, deri te Hoteli Grand ku do të kthejmë rrugës "Garibaldi" deri në prekjen e kësaj rruge me rrugën "Luan Haradinaj", ku e kemi ndalesën e dytë, te selia qendrore e EULEX-it. Edhe këtu do t'i kemi dy fjalime nga përfaqësuesit e organizatave, saktëson komunikata e organizatorëve.
Përveç fjalimeve demonstruesit do të bartin në dorë edhe pankarta me parulla kundërshtuese, thuhet mes tjerash në komunikatën e organizatave të cilat kanë thirrur demonstratën e nesërme. (http://www.rtklive.com)
Comments (0)
Dërgoja shokut
Printo
