TAYLOR DHE DIAMANTET E PËRGJAKUR, NAOMI CAMPBELL E THIRRUR TË DËSHMOJË
E Shtunë, 05.22.2010, 11:28am (GMT+1)
Procesi zhvillohet në Hagë, ndaj ish presidentit liberian Charles Taylor, zotërisë gjakatar të luftës, i cili më 1997 ia kishte dhuruar një gur të çmuar supermodeles Campbell
Voal-online -Bukuroshja Naomi, i pandehuri Taylor dhe një diamant i pagdhendur që kullon gjak. Rrezikon ta verë në siklet të madh ikonën e Modës së Lartë, kërkuar nga Gjykata Ndërkombëtare e Hagës të shkojë e të dëshmojë në procesin kundër ish presidentit liberian, akuzuar për krime të tmerrëshme kundër njerëzimti dhe dhunë mizore ndaj dhjetëra mijë burrave e grave. Gozhduar nga qindra dëshmi, nga filmime dhe nga raporte të panumërta të hetuesve, Charles Taylor do të gjykohet si protagonist absolut i asaj që është quajtur "lufta e diamanteve". Ish zotëria e luftës liberiane është akuzuar se ka shitur diamante dhe ka blerë armë për i rebelët e Revolutionary United Front (RUF) - Frontit të Bashkuar Revolucionar - të Sierra Leones, duke ushqyer një luftë brutale civile, e cila ka rrënuar vendin afrikan nga viti 1991 deri 2000.
Midis dëshmive të mbledhura nga Gjykata Ndërkombëtare e Hagës është edhe ajo e aktores Mia Farrow. Ajo ka treguar se në shtator të vitit 1997, gjatë një darke në shtëpinë e Nelson Mandelës, Naomi Campbell i ka rrëfyer se kishte marrë, natën e mëparshme, një diamant të madh të pagdhendur nga ana e njerëzve që e shoqëronin presidentin Taylor, edhe ai midis të ftuarve në darkë. Supermodelja nuk ka folur kurrë për këtë temë. E ka shmangur edhe ftesën e Hagës. Gjatë një pranie të saj të fundit në Oprah Winfrey Show ka replikuar e inatosur, me njëfarë reagimi sikur asaj po i kërkonin llogari: " Nuk dua të kem të bëj aspak me rastin e atij njeriu. Ka kryer krime të tmerrëshme, nuk dua të vë në rrezik familjen time."
Por përfaqësuesi i akuzës publike të Hagës këmbëngul. Thotë se dëshmia e zonjës Campbell është e nevojshme për ta mbërthyer përfundimisht gjeneralin gjakatar. Para dy ditësh prokuroria i është rikthyer prapë kësaj teme dhe ka kërkuar nga Gjykata Ndërkombëtare e Hagës që të merret parasysh kërkesa e saj. "Kemi nevojë për një pozicion të qartë," ka shpjeguar prokuroria. Por këtu përfshihet edhe publiciteti dhe dukja. Prania e një personazhi kaq të njohur në një proces për dhunë dhe tmerre, do ta tërhiqte vëmendjen e mediave ndërkombëtare. Naomi që pranon një diamant në kulmin e një lufte civile të provokuar pikërisht nga ata gurë të çmuar dhe plot gjak nuk mund të mbeten jashtë vëmendjes. Me një shoqërim përfytyrimesh aspak zbavitëse./Elida Buçpapaj
Përktheu Elida Buçpapaj
|